ސޯޝަލް ޕްރޮޓެކްޝަން ނިޒާމުގެ ސްކީމްތަކުގެ ސަބަބުން ރައްޔިތުންގެ ޢާންމު ދިރިއުޅުމުގެ ޙާލަތު ރަނގަޅުވެ، ފައިދާކުރާ މިންވަރު ދެނެގަތުމަށްޓަކައި މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސަރވިސަސް ޝިދާތާ ޝަރީފް ގޭގެއަށް ޒިޔާރަތްކުރައްވަން ފަށްޓަވައިފިއެވެ.
އެގޮތުން މާލެއާއި ވިލިމާލޭގެ ހަތަރު ގެއަކަށް އެކަމަނާ މިއަދު ޒިޔާރަތްކުރައްވައިފައިވާއިރު، މިނިސްޓަރުގެ އަރިހުގައި މިނިސްޓްރީން އެކުލަވައިލައިފައިވާ އިންޓަރވެންޝަން ކޮމިޓީގެ މެންބަރުން ބައިވެރިވެވަޑައިގެންފައިވޭ. އިންޓަރވެންޝަން ކޮމިޓީއަކީ ޚާއްޞަ ރައްކާތެރިކަމާއި އަޅައިލުން ބޭނުންވާ ފަރާތްތަކަށް ކުރިމަތިވާ ގޮންޖެހުންތަކާއި މައްސަލަތައް ދެނެގަނެ، އެބާވަތުގެ މައްސަލަތައް ޙައްލުކުރުމުގެ ގޮތުން އުފައްދައިފައިވާ ކޮމިޓީއެކެވެ.
މި ޒިޔާރަތް ޚާއްޞަކޮށްފައިވަނީ ޒަރޫރީ އެކިއެކި ބޭނުންތައް ފުއްދުމަށް ގޮންޖެހުންތައްހުރި މާލީ ތަނަވަސްކަން ކުޑަ، އުމުރުން ދުވަސްވީ މީހުންނާއި ނުކުޅެދުންތެރިކަންހުންނަ މީހުންނާއި އެކަނި ދަރިން ބަލަހައްޓާ ފަރާތްތައް ދިރިއުޅޭ ޢާއިލާތަކަށެވެ. މިޒިޔާރާތުގައި ސޯޝަލް ޕްރޮޓެކްޝަން ނިޒާމުގެ ތެރޭގައި ހިމެނޭ ސްކީމްތަކުން ޢާއިލާތަކަށް މަންފާކުރާ މިންވަރު ދެނެގަތުމާއި މިހާރު ޤާއިމުކުރެވިފައިވާ ނިޒާމުގެ ތެރޭގައިހުރި މައްސަލަތައް ދެނެގަނެ ޙައްލުކުރުން ހިމެނެއެވެ.
މީގެކުރިން ބާޒާރުމަތީ ސަރަޙައްދުގައި ބައެއް މީހުން ޒަރޫރީ އެކިއެކި ބޭނުންތައް ފުއްދުމަށް ކަމަށްބުނެ ސަލާންޖަހާކަން ފާހަގަކުރެވިފައިވާތީ، މިނިސްޓަރ ޝިދާތާވަނީ އެފަރާތްތަކާ ބައްދަލުކޮށް، ގިނަ މައްސަލަތަކަށް ޙައްލު ހޯއްދަވައި ދެއްވައިފާފައެވެ.
އެގޮތުން ސޯޝަލް ޕްރޮޓެކްޝަން ސިސްޓަމްގެ ތެރެއިން ތަފާތު އެކި އެލަވަންސްތައް ލިބުމަށް ޝަރުޠު ހަމަވާ، އެހެން ނަމަވެސް މިހައިތަނަށް އެފަދަ އެލަވަންސެއް ލިބެމުންނުދާ ފަރާތްތަކަށް މި އެލަވަންސްތަކާ ގުޅޭ މަޢުލޫމާތު ވަނީ ފޯރުކޮށްދެއްވާފައެވެ. އަދި އެލަވަންސް ލިބޭނެ މަގުފަހިކޮށްދިނުމާއި ދިވެހި ރައްޔިތެއްކަން އަންގައިދޭ ކާޑު ފަދަ މުހިންމު ލިޔެކިޔުންތައް ނެތް ފަރާތްތަކަށް އެތަކެތި ހޯދައިދިނުމުގައި އެހީތެރިކަން ފޯރުކޮށްދިނުންފަދަ މުހިންމު ކަންތައްތަކެއް ކޮށްދީފައިވާކަމަށް ޖެންޑަރ މިނިސްޓްރީން ވިދާޅުވެއެވެ.