5 ރަށުގައި ޤާއިމްކުރުމަށް ހަމަޖެހިފައިވާ އައުޓްޑޯރ ޖިމްތަކަށް ބޭނުންވާ ސާމާނު ޔޫތު މިނިސްޓްރީއާ ހަވާލުކުރައްވައިފިއެވެ.
މިއީ ރާއްޖެއަކީ ސިއްޙީގޮތުން ދުޅަހެޔޮ އާބާދީއެއް އޮތް ޤައުމަކަށް ހެދުމަށްޓަކައި ކުރަމުންދާ މަސައްކަތުގެ ދަށުން ކުރަމުންދާ ކަމެކެވެ. މިތަކެތި ޙަވާލުކުރުމަށް ބޭއްވި ރަސްމިއްޔާތުގައި އެތަކެއްޗާ ހަވާލުވެވަޑައިގެންނެވީ ޔޫތު މިނިސްޓަރ އަޙްމަދު މަހުލޫފެވެ. މިފަހަރު ޖިމަށްބޭނުންވާ ސާމާނު ޙަވާލުކޮށްފައިވަނީ ތ.ތިމަރަފުށި، ށ.މިލަންދޫ،އއ.ރަސްދޫ، ހއ.ފިއްލަދޫ އަދި ބ.ތުޅާދޫއަށެވެ.
މި އެއްބަސްވުމުގެ ދަށުން މިތަކެތި ކައުންސިލްތަކާ ޙަވާލުކުރުމާއި އިންސްޓޯލްކުރުމާއި ޖިމްއާގުޅޭ އެންމެހާ ކަންކަން ކުރިއަށްގެންދިޔުމަށް ހަމަޖެހިފައިވަނީ ޔޫތު މިނިސްޓްރީއާއި ރަށްތަކުގެ ކައުންސިލްތަކާ ގުޅިގެނެންނެވެ.
ރާއްޖޭގެ އެކި ކަންކޮޅުތަކުގައި އައުޓްޑޯރ ޖިމް ޤާއިމްކުރުމުގެ މައިގަނޑު މަޤްޞަދަކީ ރައްޔިތުންނަށް ދުޅަހެޔޮ ހަށިހެޔޮ ސިއްހަތެއްގައި ދެމިތިބުމަށް ފަސޭހަކަމާއެކު ހެލިފެލިވެ ކަސްރަތުކުރުން އުޅޭވޭނެ މާހައުލެއްގައި އެފަދަ ވަޞީލަތްތައް ޤާއިމުކޮށްދިނުމާއެކު ކުދި ބޮޑު އެންމެނަށް ހެލިފެލިވެ ކަސްރަތު ކުރުމަށް ބާރުއެޅުންކަމަށް ހެލްތް މިނިސްޓްރީން ވިދާޅުވެއެވެ.
މި ރަސްމިއްޔާތުގައި ވާހަކަދައްކަވަމުން ޔޫތު މިނިސްޓަރ އަޙްމަދު މަޙްލޫފު ވިދާޅުވީ މިނިސްޓްރީން މަސައްކަތް ކުރައްވަމުން ގެންދަވާނީ ވީ އެންމެ އަވަހަކަށް ޖިމްތަކުގެ މަސައްކަތް ފެށުމަށްކަމަށާއި އުއްމީދަކީ ވީއެންމެ އަވަހަކަށް އެމަސައްކަތް ނިންމާލުންކަމަށެވެ. އަދި ސަރުކާރުގެ އަމާޒަކީ ރާއްޖޭގެ ހުރިހާ ރަށެއްގައި އައުޓުޑޯރ ޖިމެއް ޑިޒައިނަކަށް ތަރައްޤީކުރުންކަމަށެވެ.
ހެލްތު މިނިސްޓަރ ޢަބްދުﷲ އަމީން ވިދާޅުވީ ރަށްތަކުގައި ޤާއިމްކުރާ ޖިމްތަކުގެ ބޭނުން ހެޔޮގޮތުގައި ބޭނުންކުރަމުން ގެންދާނެކަމަށް އުއްމީދުކުރައްވާކަމަށެވެ. މިޖިމްތަކުގެ ބޭނުން ރަށްތަކުގެ އިސްމަޤާމުތަކުގައި ތިބޭ މީހުން ބޭނުންކުރުމަށާއި ރަށްޔިތުންނަށް ނަމޫނާ ބަޔަކަށް ވުމަށް މިނިސްޓަރވަނީ ކައުންސިލަރުންނަށާއި ރަށްތަކުގެ އިސްވެރިންނަށް ގޮވާލައްވާފައެވެ. މީގެ އިތުރުން މިނިސްޓަރ އަމީންވަނީ ހުރިހާ ކައުންސިލަރުންނަށް ދުޅަހެޔޮ ސިއްޙަތެއްގައި ތިބުމަށް ދުންފަތުގެ އިސްތިއުމާލު ކުރުމުން ދުރުހެލިވުމަށް ގޮވާލައްވާފައެވެ.
ރާއްޖޭގައި އެންމެ ގިނައިން މީހުން ބަލިވާ އަދި މަރުވާ ސަބަބުތައް ގުޅިފައިވަނީ ދިރިއުޅުމުގެ އާދަކާދަތަކާއެވެ. އާބާދީގެ ހަތްދިހަ ތިނެއް އިންސައްތަ މީހުންނަކީ އެކަށީގެންވާ މިންވަރަށް ހެލިފެލިވެ ނޫޅޭ މީހުން ހެލިފެލިވެ އުޅުމާއި ޤަވައިދުން ކަސްރަތުކުރުމަކީ ރަނގަޅު ސިއްހަތެއްގައި ދެމިހުރުމަށް ވަރަށް މުހިއްމުކަމެކެވެ. މިއީ ސިއްޙީ ރަނގަޅު އާދަތަކަށް ރައްޔިތުންނަށް ހޭލުންތެރިކުރުމަށް ސަރުކާރު ވެފައިވާ ވަޢުދުގައި ހިމެނޭ އަދި ފަންސަވީހުން ފަންސަވީހަށް ކެމްޕޭނުގެ މުހިއްމު އެއްބައެވެ.
ސިއްހީ ރަނގަޅު އާދަތަކަށް ހޭލުންތެރިކުރުމުގެ ތެރެއިން ގައިންގަޔަށް ނާރާ ބަލިތަކުގެ މިހާރުގެ ނިސްބަތް %84 2025އާ ހަމަޔަށް އަންނައިރު %25އަށް ދަށްކުރުމަކީ މިކެމްޕޭންގެ އަމާޒެކެވެ. މީގެ ކުރިން 2018ވަނަ އަހަރު 10 ރަށެއްގައި އައުޓް ޑޯ ޖިމް ޤާއިމްކޮށްފައިވާކަމަށް ހެލްތް މިނިސްޓްރީން ވިދާޅުވެއެވެ.