ޓެކްސް އެޕީލް ޓްރައިބިއުނަލް އުފެދުނުފަހުން މިހާތަނަށް ހުށަހަޅާފައިވަނީ 62 މައްސަލަ ކަމަށް އެޓްރައިބިއުނަލުން ވިދާޅުވެއްޖެއެވެ.
ޓެކްސްއާ ގުޅޭގޮތުން ހުށަހަޅާފައިވާ ބިލުގެ ކޮމިޓީ މަރުހަލާގައި ޓެކްސް އެޕީލް ޓްރައިބިއުނަލުން ހުށަހަޅާ އިސްލާޙްތައް އޮޅުންފިލުވުމަށް މިއަދު ބޭއްވި ބައްދަލުވުމުގައި ވާހަކަފުޅުދައްކަަވަމުން އެ ޓްރެބިއުނަލުގެ ރައީސް ނަސްރުﷲ ޖަމީލް ވިދާޅުވީ، 2018ގެ ކުރިން އެ ޓްރެބިއުނަލަށް ހުށަހަޅާފައިވަނީ އަހަރަކު އެއް މައްސަލަ ނުވަތަ ދެ މައްސަލަކަމަށެވެ. ނަމަވެސް 2018ވަނަ އަހަރާއި މިއަހަރު 23 މައްސަލައެއް ހުށަހަޅައި، ބަލަމުންދާކަމަށް އޭނާ ވިދާޅުވިއެވެ.
މިހާ މަދު ޢަދަދެއްގެ މައްސަލަ ޓްރައިބިއުނަލަށް ހުށަހެޅެނީ ޤާނޫނު އޮތްގޮތުންކަމަށާ، ޤާނޫނު އަލުން އިސްލާޙް ކުރާއިރު މިކަންކަމަށް ކޮންމެހެން ރިޢާޔަތް ކުރަންޖެހޭކަމަށްވެސް ނަސްރުﷲ ވިދާޅުވިއެވެ. ޤާނޫނުގައިވާގޮތުން މިހާރު އެޓްރައިބިއުނަލަށް ހުށަހެޅެނީ ޓެކްސް ޕޭޔަރުންގެ މައްސަލަ އެކަނިކަމަށްވެސް އޭނާ ފާހަގަކުރެއްވިއެވެ.
ޓްރެބިއުނަލްގެ މަސައްކަތް ހިންގުމުގައި ހުރި ކަންބޮޑުވުންތައް ފާހަގަކުރައްވަމުން އޭނާ ވިދާޅުވީ ބަޖެޓްގެ ދަތިކަމަކީ ވަރަށްބޮޑު މައްސަލައެއް ކަމަށާ، މިކަންކަމަށް މެމްބަރުން ޚާއްސަ ސަމާލުކަމެއް ދެއްވާނެކަމަށް އުންމީދު ކުރައްވާކަމަށެވެ.
ޓެކްސް އެޕީލް ޓްރައިބިއުނަލަކީ ޓެކްސްއާ ގުޅޭ މައްސަލަތައް ބެލުމަށް، ޓެކްސް ނެގުމާބެހޭ އިދާރީ ޤާނޫނުގެ ދަށުން އުފައްދާފައިވާ މުއައްސަސާއެކެވެ. ޓްރައިބިއުނަލް އެކުލެވިގެންވަނީ 5 މެމްބަރުންގެ މައްޗަށެވެ.