ސަޕްލިމެންޓްރީ ބަޖެޓުގެ އެންމެ ބޮޑު އިންސައްތައެއް ހޭދަކުރަނީ ތަޢުލީމީ ދާއިރާއާއި ސިއްޙީ ދާއިރާއަށް

ރައްޔިތުންގެ މަޖިލީހަށް ހުށައަޅާފައިވާ ސަޕްލިމެންޓްރީ ބަޖެޓުގެ ބޮޑު އިންސައްތައެއް ޚަރަދު ކުރުމަށް ހަމަޖެހިފައިވަނީ ސިއްޙީ ދާއިރާއާއި ތަޢުލީމީ ދާއިރާގެ މަސައްކަތްތަކަށެވެ. އެއީ ގާތްގަނޑަކަށް ހުށައެޅި ބަޖެޓުގެ ސާޅީސް ފަހެއް އިންސައްތައެވެ.

ތަޢުލީމީ ދާއިރައަކީ މިސަރުކާރުން އެންމެ ބޮޑު ހޭދައެއް ކުރުމަށް ނިންމާފައިވާ ދާއިރާއެވެ. އެގޮތުން ސްކޫލްތަކާއި މަތީ ތަޢުލީމާއި، ސްކޫލްތަކަށް ބޭނުންވާ ތަމްރީން ލިބިފައި ތިބި މުދައްރިސުންނާއި، ވަސީލްތައް ހޯދުމަށް މިއަހަރަށް ކަނޑައެޅި ބަޖެޓުގައި 3.4ބިލިއަން ރުފިޔާ ކަނޑައަޅާފައިވެއެވެ. މިއީ އެއް ދާއިރާއަކަށްށް ކުރެވޭ އެންމެ ބޮޑު ހޭދައެވެ.

މިހާރު ރައްޔިތުންގެ މަޖިލީހަށް ހުށަހަޅާފައިވާ ސަޕްލިމެންޓްރީ ބަޖެޓުގައިވެސް އެންމެ ބޮޑު ހޭދައެއް ކުރުމަށް ނިންމާފައިވާ 1 ދާއިރާއަކީ ތަޢުލީމީ ދާއިރާއެވެ. ބަޖެޓުން ޚަރަދު ކުރުމަށް ހަޖެހިފައިވާ ކަންކަމުގެ ތެރޭގައި، ސަރުކާރުން ރާއްޖެއަށް މުޅިން އަލަށް ތަޢާރަފްކުރި ނާސްތާ ޕްރޮގްރާމާއި، ސްޓޫޑެންޓް ލޯނާއި ސްކޮލާރޝިޕްގެ ފުރުސަތުތައް ދިނުމަށް ޚަރަދުކުރުން ހިމެނެއެވެ.

ޕީއެސްއެމްގެ ރާއްޖެމިއަދު ޕްރޮގްރާމްގައި ވާހަކަފުޅުދައްކަވަމުން ފިނޭންސް މިނިސްޓްރީގެ ޗީފް ފައިނެންސް ބަޖެޓް އެގްޒެކެޓިވް އަޙްމަދު ސަރުވާޝް އާދަމް ވިދާޅުވީ ސްކޮލަޝިޕާއި ލޯންގެ މަސައްކަތްތަކަށް މިއަހަރަށް ކަނޑައެޅި ބަޖެޓުގެ ދަތިކަން ދިމާވީ، މިދިޔައަހަރު ލޯނުދީ ފައިސާ ޙަވާލު ނުކޮށް ތިބި ފަރާތްތަކަށް މިއަހަރުގެ ބަޖެޓުން ފައިސާ ދޭން ޖެހުމުންކަމަށެވެ. ސަޕްލިމެންޓްރީ ބަޖެޓުގައި ލޯނާއި ސްކޮލަރޝިޕަށްވަނީ 300މިލިއަން ރުފިޔާ ކަނޑައަޅާފައެވެ. މީގެ އިތުރުން ދެން މަޖެޓުގައި ހިންމަާފައިވަނީ ނާސްތާ ޕްރޮގްރާމް ކުރިއަށްގެންދިއުމަށް ބޭނުންވާ ޚަރަދު ހޯދުމަށެވެ.

"ނާސްތާ ޕްރޮގްރާމް ފުރަތަމަ 10ސްކޫލްގައި އަޖުމަ ބެލުމަށް ފެށި ނަމަވެސް މިހާރު ހުރިހާ ސްކޫލްތަކުގައި ކުރިއަށްގެންދޭ. މިކަން ކުރުމަށް 81މިލިއަން ރުފިޔާ މި ބަޖެޓުގެ ތެރެއިން ދިނުމަށް." ސަރުވާޝް ވިދާޅުވިއެވެ.

ސަޕްލިމެންޓްރީ ބަޖެޓުގެ އެންމެ ބޮޑު އިންސައްތައެއް ހިމަނާފައިވަނީ ސިއްޙީ ދާއިރާގެ އުމްރާނީ ބައެއް މަސައްކަތްތަކާއި، ހުޅުމާލޭ ހޮސްޕިޓަލްގައި އަލަށް ހަދަން ފަށާފައިވާ އިމާރާތުގެ ހުއްޓިފައިހުރި މަސައްކަތްތައް ނިންމައި އެ ހޮސްޕިޓަލަށް ބޭނުންވާ އިތުރު ޚިދުމަތްތައް ޤާއިމުކުރުމަށެވެ. މި މަސައްކަތަށް 150މިލިއަން ރުފިޔާވަނީ ކަނޑައަޅާފައެވެ. އައު ސަރުކާރުން ފަށަން ނިންމާފައިވާ އެންމެ އުންމީދީ މަޝްރުޢަކީ ރާއްޖޭގެ 5 ސަރަޙައްދުގައި ޓަރޝަރީ ފެންވަރުގެ 5 ހޮސްޕިޓަލް އެޅުމެވެ.

" 2-3އަހަރު ތެރޭގައި ޓަރޝަރީ ފެންވަރުގެ 5 ހޮސްޕިޓަލް ރާއްޖޭގެ 5 ސަރަޙަދުގައި ތަރައްޤީކުރުމަށް މަސައްކަތް ކުރަނީ. މީގެ ބައެއް މަސައްކަތ ކުރުމަށް މި ބަޖެޓުގައި 295.5 މިލިއަން ރުފިޔާ މިވަނީ ކަނޑައޅާފައި. މިއީ މުޅިއެކު 800މިލިއަން ރުފިޔާގެ މަޝްރުޢުއެއް." ސަރުވާޝް ވިދާޅުވިއެވެ.

މީގެއިތުރުން ޢާންމުންނާ ގުޅޭ ކަންމުގެ ތެރޭގައި ވައިގެ ދަތުރުފަތުރުގެ އަގު ހެޔޮކުރުމަށް 35މިލިއަން ރުފިޔާ، އަދި ކަރަންޓުގެ އަގުހެޔޮކުރުމަށް 24މިލިއަން ރުފިޔާ ހިމަނާފައިވެއެވެ. އަދި އިންޑިއާއިން ހިލޭ އެހީގެ ގޮތުގައި ދީފައިވާ 100މިލިއަން ރުފިޔާގެ ތެރެއިން، ރަށްތަކަށް މުހިންމު ކުދި މަޝްރުޢުތައް ހިންގުމަށް ސަޕްލިމެންތްރީބަޖެޓުގައި 94.5 މިލިއަން ރުފިޔާ ވަނީ ކަނޑައަޅާފައެވެ.
ސަޕްލިމެންޓްރީ ބަޖެޓުގައި ޖުމްލަ 1.7 ބިލިއަން ރުފިޔާ ހިމަނާފައިވާއިރު، 9 ދާއިރާއެއްގެ ކުރިއެރުމަށް ފައިސާ ޚަރަދުކުރުމަށްވަނީ ހަމަޖެހިފައެވެ.