އެމެޒޯން ޖަންގަލި ޙިމާޔަތްކުރުމަށް މިހާރަށްވުރެ ބޮޑަށް މަސައްކަތްކުރުމަށް ރައީސް ގޮވާލައްވައިފި
ބްރެޒިލްގެ އެމޭޒޯން ޖަންގަލި ޙިމާޔަތްކުރުމަށް މިހާރަށްވުރެ ބޮޑަށް މަސައްކަތްކުރުމަށް ރަޢީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މުޅި ދުނިޔެއަށް ގޮވާލައްވައިފިއެވެ.
ރާއްޖެއަކީ ނާޒުކު ތިމާވެއްޓެއް ލިބިފައިވާ ޤައުމެއްކަމަށްވިދާޅުވެ ރައީސް ޞާލިހް ވަނީ މުޅި ދުނިޔެއަށް އެމެޒޯން ޙިމާޔަތްކުރުމަށް ގޮވާލައްވާފައެވެ. ރައީސް ވަނީ އެމެޒޯން ޖަންގަލީގައި ރޯވެ ލިބެމުންދާ ގެއްލުންތަކާމެދު ވަރަށް ބޮޑަށް ކަންބޮޑުވެވަޑައިގަންނަވާކަމަށް ވިދާޅުވެފައެވެ.
ރައީސް ވިދާޅުވީ އެމެޒޯންއަކީ ދުނިޔެއަށް ބޭނުންވާ އޮކްސިޖަންގެ 20 އިންސައްތަ ގުދުރަތީ ގޮތުން އުފައްދައިދޭ މައިގަނޑު ނިޒާމުކަން ފާހަގަކުރައްވާ އެއީ މުޅި ދުނިޔޭގެ ފުއްޕާމޭގެ ގޮތުގައި ސިފަކުރައްވާފައެވެ. ބްރެޒިލްގެ އެމެޒޯން ޖަންގަލީގައި އަނދަމުންދާ އަލިފާންގަނޑުތައް ނިއްވުމުގެ މަސައްކަތް އެ ޤައުމުގެ ސިފައިން ވަނީ ކުރަން ފަށާފައެވެ.
ކޮންމެ އަހަރެއްގެވެސް ހޫނު މޫސުމުގައި އެމޭޒޯން ޖަންގަލީގެ އެކި ހިސާބުތަކުގައި ތަބީއީގޮތުންނާއި ދަނޑުވެރިން ދަނޑުވެރިކަން ކުރަން ބިން ސާފުކުރުމުގެ ބޭނުމުގައި އެ ޖަންގަލީގެ އަރިމަތީ ހިސާބުތަކުގައި އަލިފާން ރޯކުރުމުގެ ތެރޭގައި އަލިފާނުގެ ބޮޑެތި ޙާދިސާތައް ހިނގަމުންދެއެވެ.
މިގޮތަށް ރޯވާ އަލިފާންގަނޑުތައް ފަސޭހައިން ނިއްވާލެވުނު ނަމަވެސް މި ފަހަރުވަނީ މި އަލިފާންގަނޑުތައް ބޮޑު ސަރަހައްދަކަށް ފެތުރި ކާރިސާއަކަށް ބަދަލުވުމުގެ ބިރުހީވެފައެވެ.
ބްރެޒިލްގެ ނެޝަނަލް އިންސްޓިޓިއުޓް އޮފް ސްޕޭސް ރީސާޗް (އައި.އެން.ޕީ.އީ) ބުނާގޮތުން އޮގަސްޓް ފަނަރައިގެ ފަހުން އެކަނިވެސް އެމަޒޮން ޖަންގަލީގައި ނުވަހާސް ފައްސަތޭކަ އަލިފާންގަނޑުވަނީ ރޯވެފައެވެ. ތިމާވެށީ ދިރާސާތައްކުރާ ދުނިޔޭގެ އިލްމީ މަރުކަޒުތައް ބުނާގޮތުން އެމޭޒޯން ޖަންގަލީގައި ރޯވެ އަނދަމުންދާ އަލިފާންގަނޑުތަކުން އަރާ ދުން، ދެކުނު އެމެރިކާ މަތިން އެތައް ހާސް ކިލޯމީޓަރަކަށް ފެތުރި، މުޅި ސަރަހައްދުގެ ޖައްވު ދަނީ ތަޣައްޔަރުވަމުންނެވެ.
މި ދުންގަނޑުގެ ސަބަބުން ކުރިމަތިވެދާނެ ސިއްޙީ ހާލަތަކަށް ރިއާޔަތްކޮށް ބްރެޒިލްގެ ބައެއް ސަރަހައްދުތަކުގައި މިހާރުވަނީ ކުއްލި ހާލަތުވެސް އިއުލާނުކޮށްފައެވެ.