އެލެކްސިސް ސަންޗޭޒްގެ މުސާރައަކީ ދޭން ބަލާއިރު މާބޮޑު އެއްޗެއްކަމަށް އިންޓަމިލާނުން ބުނެފިއެވެ.
އިޓަލީގެ މަޝްހޫރު ކުލަބް އިންޓަމިލާނުން މިހެންބުނެފައިވާއިރު މެންޗެސްޓާ ޔުނައިޓެޑްގެ ފޯވަޑް އެލެކްސިސް ސަންޗޭޒް ގަތުމަށް އެކުލަބުން ކުރަމުންދާ މަސައްކަތުގައި މިހާތަނަށް އޮތީ އޭނާގެ މުސާރައާމެދު އެއްބަސްނުވެވިއެވެ.
އާސެނަލްއިން ޔުނައިޓެޑަށް ސަންޗޭޒް ބަދަލުވީ ހަފުތާއަކު 350000 ޕައުންޑަށެވެ. ނަމަވެސް އިންޓަމިލާނުން ބުނަނީ މިޢަދަދުދޭން އެކުލަބަށް ދަތިކަމަށެވެ. ސަބަބަކީ ކުލަބުގެ މާލީ ކަންކަން ހުރިގޮތުންނާއި މިހާރު ތިބި ކުޅުންތެރިންނަށް ނުދޭވަރުގެ ބޮޑު މުސާރައަކަށް މިކަން ވުމުންކަމަށެވެ.
ޗެލްސީގެ ކުރީގެ ކޯޗު އެންޓޯނިއޯ ކޮންޓޭގެ އިރުޝާދުގެ ދަށުން މިސީޒަނަށް ތައްޔާރުވަމުން އަންނަ އިންޓަމިލާނުން ވަނީ އާސީޒަނަށް ޓީމު ވަރުގަދަކޮށްފައެވެ. ޚާއްސަކޮށް ފޯވަޑް ލައިން ވަރުގަދަ ކުރުމަށް އެޓީމުން އަދިވެސް ދަނީ މަސައްކަތް ކުރަމުންނެވެ. ސަބަބަކީ ޓީމުގެ އިސްފޯވަޑް އާޖެންޓީނާގެ މައުރޯ އިކާޑީގެ އަޚުލާގީ މައްސަލަތަކާހުރެ އެކުލަބުން އޭނާ ލައްވައި ކުޅުވަން ބޭނުންނުވުމެވެ. އިންޓަމިލާނުން މިހާރު ގެންގޮސްފައިވަނީ މެންޗެސްޓާ ޔުނައިޓެޑުގެ ބެލްޖިއަމް ފޯވަޑް ރޮމެލޫ ލުކާކޫއެވެ.