ޓީމު ދޫކޮށްލަން ބޭނުންވެފައި ހުރި ބްރެޒިލްގެ ފޯވަޑް ނޭމާ ސަންޓޯސް ލޯނު އުސޫލުން ބާސެލޯނާއަށް ދޫކޮށްލަން ޕީއެސްޖީން ތައްޔާރުވެއްޖެއެވެ.
މީގެ ދެ އަހަރު ކުރިން ދުނިޔޭގެ ރެކޯޑް ފީއެއް ކަމަށްވާ 222 މިލިއަން ޕައުންޑަށް ބާސެލޯނާ ދޫކޮށްލި ފޯވަޑަށް އަލުން އެ ކުލަބަށް ގެންދެވެން އޮތް ހަމައެކަނި ގޮތަކީ ލޯނު އުސޫލުން އޭނާ ދޫކޮށްލުމުންނެވެ. އެއީ ޕީއެސްޖީން ކިޔާ އަގުކަމަށްވާ 190 މިލިއަން ޔޫރޯ ބާސެލޯނާއަށް ދެވެން ނެތުމުންނެވެ. ސަބަބަކީ އެފަދަ ބޮޑު ޢަދަދެއް ހޭދަކޮށްފިނަމަ ބާސެލޯނާއަށް ފައިނޭންޝަލް ފެއާޕްލޭއާ ހިލާފުވިކަމުގެ އަދަބެއް އައުން ގާތްކަމަށް ލަފާކުރެވޭތީއެވެ.
ފަރަންސޭސިވިލާތުގެ ރިޕޯޓްތައް ބުނާގޮތުގައި ބާސެލޯނާއަށް ނޭމާ ދޫކޮށްލުމަށްވުރެ ބޮޑަށް އެ ކުލަބުން ބޭނުންވަނީ ރެއާލް މެޑްރިޑް ނުވަތަ އިޓަލީގެ ޔުވެންޓަސަށް އޭނާ ދޫކޮށްލަންށެވެ. ސަބަބަކީ އެ ދެ ކުލަބުން ދޭން ބުނާ ފައިސާގެ ޢަދަދު ބާސެލޯނާ އަށްވުރެ އިތުރުވުމެވެ.
ނަމަވެސް ޕީއެސްޖީއާއި ނޭމާ ހަދާފައިވާ ކޮންޓްރެކްޓްގައި ބާކީ ތިން އަހަރު އޮތުމުން ކުލަބު ބަދަލު ކުރެވެނީ އޭނާގެ ރުހުމުގައެވެ.