ވުލްވްސް އަތުން ޔުނައިޓެޑް މޮޅުކޮށްދޭން ލިބުނު ފުރުސަތު މިޑްފިލްޑަރ ޕައުލް ޕޮގްބާ ބޭކާރުކޮށްލައިފިއެވެ. އިނގިރޭސި ޕްރިމިއަރ ލީގުގައި މެންޗެސްޓަރ ޔުނައިޓެޑާއި ވުލްވްސް ވާދަކުރި މެޗު އެކެއް އެކަކުން އެއްވަރުވިއިރު، މެޗުން ޔުނައިޓެޑް މޮޅުކޮށްދޭން ޕައުލް ޕޮގްބާއަށް ރަނުގެ ފުރުސަތެއް ލިބުނުވެ.
ދެވަނަ ހާފުގައި އެޓީމަށް ލިބުނު ޕެނަލްޓީ ޕޮގްބާއަށް ކާމިޔާބުކުރެވޭ ގޮތެއް ނުވިއެވެ. ވުލްވްސްގެ ކީޕަރު ރުއި ޕެޓްރީސިއޯވަނީ ޕެނަލްޓި ދިފާއުކޮށްފައެވެ. މެޗުގައި ފުރަތަމަ ގޯލް ޖަހައި ލީޑް ނެގީ ޔުނައިޓެޑުންނެވެ. މި ލަނޑު ޖަހައިދިނީ އެންތަނީ މާޝިއާލްއެވެ. ވުލްވްސްއިން ނަތީޖާ ހަމަހަމަކުރީ ރުބެން ނެވޭސް ޖަހައިދިން ހިތްގައިމު ގޯލުންނެވެ. ލީގުގައި ވުލްވްސް ކުޅުނު ދެ މެޗުވެސް އެއްވަރުވިއިރު، ޔުނައިޓެޑުންވަނީ ފުރަތަމަ މެޗުގައި ޗެލްސީ އަތުން ބޮޑު މޮޅެއް ހޯދާފައެވެ. ޕްރިމިއަރ ލީގުގައި ވުލްވްސް ދެން ނިކުންނާނީ ބާންލީއާއި ދެކޮޅަށެވެ. ޔުނައިޓެޑް ނިކުންނާނީ ކްރިސްޓަލް ޕެލަސްއާއި ދެކޮޅަށެވެ.