2021ވަނަ އަހަރުގެ ކިޔެވުން ފަށާއިރު ތަޢުލީމީ އައު މަންޙަޖަށް ބަދަލުތަކެއް ގެނާނެކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ. އެންއައިއީން މިހާރުވަނީ އައި މަންހަޖު މުރާޖަޢާ ކުރުމުގެ މަސައްކަތްތައް ފަށްޓަވާފައެވެ.
ޕީއެސްއެން ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ.ޢަބްދުﷲ ރަޝީދު ވިދާޅުވީ އެންއައިއީން މިހާރު އެންމެ އިސްކަމެއް ދީގެން ކުރަމުންދާ އެއް މަސައްކަތަކީ އައު މަންހަޖު އަލުން މުރާޖަޢާ ކުރުމުގެ މަސައްކަތްކަމަށެވެ. އެގޮތުން މިހާރު ކެމްބްރިޖު ޔުނިވަރސިޓީގެ ޓީމަކާއި އެންއައިއީގެ މުއައްޒަފުން ގުޅިގެން މަސައްކަތްތަކެއް ފަށާފައިވާކަމަށް އޭނާ ވިދަޅުވިއެވެ.
ޢަބްދުއްﷲ ރަޝީދު ވިދާޅުވީ މިހާރު ކުރިއަށްދަނީ މަންހަޖު މުރާޖަޢާ ކުރާނެގޮތާމެދު އެންއައިއީގެ މުއައްޒަފުންނަށް ތަމްރީން ދިނުމުގެ މަސައްކަތްކަމަށެވެ.
"ރިވިއު ކުރާނި ގޮތްތައް ކެމްބްރިޖުން ދަސްކޮށްދެނީ. މިކަންކަމަށް ބަލައި ދިވެހި ބަހުން ހުރި މާއްދާތައް ރިވިއު ކުރާނީ އެންއައިއީން. އިންގިރޭސި ބަހުން ހުރި މާއްދާއްތައް ރިވިއު ކުރާނީ ކެމްބްރިޖާއި ގުޅިގެން." އަބްދުﷲ ރަޝީދް ވިދާޅުވިއެވެ.
ޢަބްދުﷲ ރަޝީދު ވިދާޅުވެފައިވަނީ މަންހަޖު މުރާޖަޢާ ކުރުމަށް ނިންމާފައިވަނީ މަންހަޖް ތަންފީޒުކުރުމުގައި ދަރިވަރުންނާއި މުދައްރިސުންނަށްހުރި އުންދަގޫތަކާއި ގޮންޖެހުންތައް ދެނެގަތުމަށްކަމަށެވެ. އަދި މުރާޖަޢާ ކުރުމަށްފަހު 2021ވަނަ އަހަރުގެ މަންހަޖުން ބަދަލުތަކެއް ފެނިގެންދާނެކަމަށްވެސް ޢަބްދުﷲ ރަޝީދު ވިދާޅުވިއެވެ.
"2020ވަނަ އަހަރު ރިވިއު ކުރުމުގެ މަސައްކަތް ނިންމައި، 2021ވަނަ އަހަރުގެ ސާނަވީ އަހަރު ފަށާއިރު މަންހަޖަށް ބަދަލުތައް އަންނާނެ. ވިސްނުން ހުރީ މިއީ ކުލާހުގައި ކުރިއަށް ގެންދަން ފަސޭހަ، ކިޔަވައިދޭން ފަސޭހަ، އުނގެނުމަށް ފަސޭހަ މަންޙަޖަކަށް ހެދުން." ޢަބްދުއްﷲ ރަޝީދު ވިދާޅުވިއެވެ.
އޭނާ ވިދާޅުވީ ބޭނުންވާ ހުރިހައި ބަދަލުތައް އެއްފަހަރާ ނުގެނެވުނު ނަމަވެސް، އެވަގުތަށް ގެނެވެންހުރި ބަދަލުތައް ގެންނަމުންދާނެކަމަށެވެ. އަދި ފޮތްތަކަށްވެސް ބަދަލު ގެންނަވާނެކަމަށް ޢަބްދުﷲ ރަޝީދު ވިދާޅުވިއެވެ.
މަންޙަޖު ތަންފީޒް ކުރުމުގައި ހުރި އެންމެ ބޮޑު ގޮންޖެހުމަކީ ޓީޗަރުންނަށް ބޭނުންވާ، އެކަށީގެންވާ ތަމްރީން ދެވިފައި ނެތުންކަމަށާ، ނަމަވެސް ތަމްރީނުދީގެން މަންޙަޖު ތަންފީޒު ކުރަމުންއަންނަ ސްކޫލުތަކުން ހެޔޮ ބަދަލުތައް ފެންނަކަމަށް އޭނާ ވިދާޅުވިއެވެ. އެގޮތުން ދަރިވަރުގެ ހުނަރާއި، ނަފްސަށް އޮންނަ އިތުބާރާއި، ދަރިވަރު މުޢާމަލާތްކުރާ ގޮތްތަކުންވެސް ހެޔޮ ބަދަލުތައް ފެންނަމުންދާކަމަށެވެ. އައު މަންހަޖަށް ކިޔަވައިދެމުންދަނީ ކީ ސްޓޭޖްތަކަކަށް ގްރޭޑްތައް ބަހާލައިގެންނެވެ.