ޙައްޖާޖީން އެނބުރި އަންނައިރު ބަލި ފެތުރިދާނެތީ ސަމާލުވުމަށް އެޗްޕީއޭއިން އިލްތިމާސްކުރައްވައިފި
ޙައްޖުގެ މަތިވެރި އަޅުކަމަށްފަހު ޙައްޖާޖީން އެނބުރި މާލެއަންނައިރު ބަލިތައް ފެތުރިދާނެތީ އެކަމަށް ސަމާލުވުމަށް ހެލްތް ޕްރޮޓެކްޝަން އެޖެންސީން އިލްތިމާސްކުރައްވައިފިއެވެ.
ޙައްޖުގެ އަޅުކަމަށްފަހު ޙައްޖާޖީން އެނބުރި އަންނައިރު ބަލިވެ އުޅޭނަމަ، ބަލި ޙާލަތު އިތުރަށް ގޯސްވެދާނެ ކަމަށްޓަކައި ޙައްޖާޖީންނާއި އެމީހުންގެ ޢާއިލާތަކުން ސަމާލުވުމަށް އެޗްޕީއޭއީންވަނީ އިލްތިމާސްކުރައްވާފައެވެ.
ކޮންމެ އަހަރެއްގެ ހައްޖު މޫސުން ނިމި ޙައްޖާޖީން މާލެ އަންނަ ދުވަސްވަރަކީ އެކިކަހަލަ ބަލި މަޑުކަމާ ކުރިމަތިވާ ދުވަސްވަރެކެވެ. މިގޮތުން ޙައްޖުވެރިން އެނބުރި އަންނަތާ 14 ދުވަސް ތެރޭގައި ހުންއައިސް، ކެއްސައި ނޭވާލާން އުނދަގޫވާނަމަ ލަސްނުކޮށް ޑޮކްޓަރެއްގެ މަޝްވަރާ ހޯދުމަށް އެޗްޕީއޭއިން ވަނީ އިލްތިމާސްކުރައްވާފައެވެ. ޑޮކްޓަރަކަށް ދައްކާއިރު ޙައްޖުން އެނުބރު އައި މީހެއް ކަމުގެ މަޢުލޫމާތުދިނުމާއި އިތުރު ބަލިމަޑުކަމެއްގެ ޢަލާމާތެއް ފެންނަނަމަ ޑޮކްޓަރަށް ދެއްކުމަށްވެސް އެޗްޕީއޭއިން ވަނީ އިލްތިމާސްކުރައްވާފައެވެ.
ހުން އަދި އަރިދަފުސް ރޯގާ ޖެހިއްޖެނަމަ ކެއްސައި ކިނބިހިއަޅާއިރު އަނގަމައްޗާއި ނޭފަތް ކުޑަރުމާލެއް ނުވަތަ ޓިޝޫއެއްފަދަ އެއްޗަކުން ނިވާކުރުމަށް އެޗްޕީއޭއިން އިލްތިމާސް ކުރައްވައެވެ.
އަދި ބޭނުންކުރާ މާސްކާއި ޓީޝޫފަދަތަކެތި ހާމަ ތަންތަނަށް އެއްލާލުމަކީ ރޯގާއާއި ބަލި ފެތުރުމަށް މަގުފަހިވެދާނެ ކަމެއްކަމުން އެކަމަށް ސަމާލުވެ އެފަދަ ތަކެތި ރައްކާތެރިކަމާއެކު ނައްތާލުން މުހިންމުކަމަށް އެޗްޕީއޭއިން ފާހަގަކުރައްވައެވެ.
މިފަދަ ބަލިތައް ޖެހިއްޖެނަމަ ސައިބޯނި ލައިގެން އަތްދޮވުމާއި މީހުން އެއްވެ އުޅޭ ތަންތަނަށް ނުދިޔުމާއި ކުޑަކުދިންގެ ކައިރިއަށް ނުދިޔުމަށްވެސް ވަނީ އިލްތިމާސްކުރައްވާފައެވެ.
ހުމާއި އަރިދަފުސް ރޯގާ ޖެހިއްޖެނަމަ، ގިނައިން ދިޔާތަކެތި ބޭނުންކުރުމަށާ، އަރާމުކުރުމުގެ އިތުރަށް ޕެރެސެޓަމޯލް ފިޔަވައި އެހެން ބޭހެއް ޑޮކްޓަރެއްގެ ލަފަޔާނުލައި ބޭނުން ނުކުރުމަށްވެސް އެޗްޕީއޭއިން ވަނީ އިލްތިމާސްކުރައްވާފައެވެ.