ޢީދު ބަންދުގައި މާލޭގައި ހިނގި އެކްސިޑެންޓްތައް މަދުކަމަށް ފުލުހުންގެ ތަފާސްހިސާބުން ދައްކައިފިއެވެ.
ފުލުހުން އާންމުކޮށްފައިވާ ތަފާސްހިސާބުތަކަށް ބަލާއިރު މިދިޔަ ހަފްތާގައި މާލެ ސަރަހައްދުގައި ހިނގާފައިވަނީ 31 އެކްސިޑެންޓެވެ. މި އެކްސިޑެންޓްތަކުގައި 8 މީހަކަށް އެކި ވަރުގެ އަނިޔާތައް ލިބިފައެވެ. ތަފާސްހިސާބުތަކަށް ބަލާއިރު އޭގެ ކުރީ ހަފްތާގައި މާލެ ސަރަހައްދުގައި 50އަށްވުރެ ގިނަ އެކްސިޑެންޓް ވަނީ ހިނގާފައެވެ.
މަގުމަތީގެ ރައްކާތެރިކަން ޤާއިމްކުރުމަށް ފުލުހުން ހިންގަމުންދާ ހަރަކާތްތަކުގައި މިދިޔަ ހަފްތާގައި ޤަވާއިދާ ޚިލާފަށް ޕާކުކޮށްގެން 44 އުޅަނދެއްގައި ސްޓިކަރ ޖަހާފައިވާއިރު 123 އުޅަނދު ވަނީ ބަލާ ފާސްކޮށްފައެވެ. އަދި އެއް އުޅނަދު ވަނީ ޓޯކޮށްފައެވެ.
މީގެ އިތުރުން ލައިސަންސްނެތި ވެހިކަލް ދުއްވި 49 މައްސަލައަކާއި ޓްރެފިކް ނިޝާންތަކަށް ބޯ ނުލެނބުމުގެ 8 މައްސަލައެއްވެސް ހިމެނެއެވެ.
މަގުމަތީގެ އަމާންކަން ރައްކާތެރިކުރުމަށް ފުލުހުން ޚާއްސަ ހަރަކާތްތަކެއް ކޮންމެ ހަފްތާއަކުވެސް ހިންގާއިރު މުޖުތަމައުގެ ޢާންމު މިންގަނޑުތަކާ ޚިލާފަށް ޢަމަލުކުރަމުންދާ ފަރާތްތައް ހުއްޓުވުމަށްވެސް ފުލުހުންދަނީ ޚާއްސަ ހަރަކާތްތަކެއް ހިންގަމުންނެވެ. ފުލުހުންގެ ތަފާސްހިސާބުތައް ދައްކާގޮތުން މިދިޔަ ހަފްތާގައި ޤަވައިދާ ޚިލާފަށް ޓެކްސީކުރި 8 ޓެކްސީއެއްގެ މައްސަލަވެސް ހުށަހެޅިފައިވެއެވެ. މީގެ އިތުރުން ހެލްމެޓް ނާޅާ ދުވި 6 މައްސަލައާއި އޮވަރޓޭކް ކުރުމުގެ މައްސަލަތައްވެސް ހުށަހެޅިފައިވެއެވެ.