ޖަމާޢަތުގެ ފައިދާއަށް މަޝްރޫޢުތަކެއް ހިންގުމަށް 4 ރަށެއްގެ ކައުންސިލަށް ހޯމް މިނިސްޓްރީން ފައިސާގެ އެހީ ދީފި
ޖަމާޢަތުގެ ފައިދާއަށް ހިންގާ މަޝްރޫޢުތަކަށް ފައިސާގެ އެހީ ދިނުމަށް 4 ރަށެއްގެ ކައުންސިލާއެކު މިނިސްޓްރީ އޮފް ހޯމް އެފެއާޒުން ސޮއިކޮށްފިއެވެ.
މި މަޝްރޫޢުތައް ހިންގުމަށް ފައިސާ ހަވާލުކުރުމުގެ އެއްބަސްވުމުގައި ހޯމް މިނިސްޓްރީން ސޮއިކުރެއްވީ އއ.ހިމަންދޫ ކައުންސިލާއި، ނ.ހޮޅުދޫ ކައުންސިލާއި، ތ.ވިލުފުށި ކައުންސިލާއި، ނ.ކުޑަފަރި ކައުންސިލާއެކުގައެވެ.
ކުޑަފަރީ ކައުންސިލަށް ފައިސާ ހަވާލުކޮށްފައިވަނީ އެރަށު މަގުބައްތި ޖެހުމަށެވެ. މިއެއްބަސްވުމުގެ ދަށުން މިނިސްޓްރީން ދިނުމަށް ހަމަޖެހިފައިވަނީ ތިންލައްކަ ރުފިޔާއެވެ. އަދި މި މަޝްރޫއަށް އެ ރަށު ކައުންސިލުން ޚަރަދުކުރުމަށް ހަމަޖެހިފައިވަނީ ދެލައްކަ ފަންސާސް އެއްހާސް ހަސަތޭކަ ސާޅީސް ދެ ރުފިޔާއެވެ.
ވިލުފުށި ކައުންސިލަށް ފައިސާގެ އެހީތެރިކަން ފޯރުކޮށްދިނުމަށް ހަމަޖެހިފައިވަނީ އެރަށުގައި ކުޑަކުދިންގެ ޕާރކެއް އެޅުމަށެވެ. މިމަޝްރޫއަށް މިނިސްޓްރީން ޚަރަދުކުރުމަށް ހަމަޖެހިފައިވަނީ ދެލައްކަ އަށްޑިހަ ނުވަހާސް އެއްސަތޭކަ ތިރީސް އެއްރުފިޔާ ފަނަރަ ލާރިއެވެ. ވިލުފުށި ކައުންސިލުން ޚަރަދު ކުރުމަށް ހަމަޖެހިފައިވަނީ އެއްލައްކަ ހަތްދިހަ ހާސް ރުފިޔާއެވެ.
މި ދެރަށުގެ އިތުރުން ނ.ހޮޅުދޫ ކައުންސިލަށް ފައިސާ ހަވާލުކުރުމުގެ އެއްބަސްވުމުގައި މިމަހުގެ 8 ވަނަ ދުވަހު ވަނީ ސޮއިކޮށްފައެވެ. އެކައުންސިލަށް ފައިސާދީފައިވަނީ ކޮމިއުނިޓީ ޕާކެއް ހެދުމަށެވެ. އެމަޝްރޫއަށް މިނިސްޓްރީން ދެލައްކަ އަށްޑިހަ ހަތަރުހާސް ހަތަރުސަތޭކަ ފަންސާސް ރުފިޔާ ޚަރަދު ކުރާއިރު ހޮޅުދޫ ކައުންސިލުން ދެލައްކަ ސޯޅަ ހާސް ރުފިޔާ ޚަރަދުކުރުމަށް ވަނީ ހަމަޖެހިފައެވެ.
ޖަމާޢަތުގެ ފައިދާއަށް ޚާއްޞަކޮށްގެން ހިންގާ މަޝްރޫޢުތަކަށް ފައިސާ ހަވާލުކުރުމަށް އެންމެ ފުރަތަމަ ސޮއިކޮށްފައިވަނީ އއ.ހިމަންދޫ ކައުންސިލާއެކުއެވެ. މިމަހުގެ 7 ވަނަ ދުވަހު ހިމަންދޫ ކައުންސިލާއެކު ސޮއިކުރީ އެރަށުގައި ކުޑަކުދިންގެ ޕާރކެއް ހެދުމަށެވެ. އެމަޝްރޫއަށް މިނިސްޓްރީން ދިނުމަށް ހަމަޖެހިފައިވަނީ ތިން ލައްކަ ރުފިޔާއެވެ. އަދި ހިމަންދޫ ކައުންސިލުން ފަސްލައްކަ ދެހާސް ރުފިޔާ ޚަރަދުކުރުމަށް ވަނީ ހަމަޖެހިފައެވެ.
ޖަމާޢަތުގެ ފައިދާއަށް ހިންގާ މަޝްރޫޢުތަކަށް ފައިސާގެ އެހީ ދިނުމަށް ހިންގާ މިމަޝްރޫއުގެ ދަށުން 17 ރަށަކަށް އެހީ ދިނުމަށް ވަނީ ހަމަޖެހިފައެވެ. އެއީ 6 ރަށެއްގެ ޕާރކް ހެދުމަށާއި، 6 ރަށެއްގެ މަގުބައްތި ޖެހުމަށާއި، 4 ރަށެއްގެ ޤަބުރުސްތާން ވަށާފާރު ރޭނުމަށާއި އެއް ރަށެއްގެ ނެރުބައްތި ޖެހުމަށެވެ. މި ރަށްތައް ކަނޑައަޅާފައިވަނީ ޢާއްމުކޮށް ހުޅުވާލައި، ކައުންސިލް ތަކުން ހުށައެޅި ޕްރޮޕޯސަލްތައް ބެލުމަށްފަހު އެންމެ ރަނގަޅު ޕްރޮޕޯސަލް ހުށައެޅި ރަށްތައް ބަލައިގެންކަމަށް ހޯމް މިނިސްޓްރީން މަޢުލޫމާތުދެއްވައެވެ.