އިފުރު އެއަރޕޯޓަށް މިހާރު ދުވާލަކު އެއް ފްލައިޓު ޖެއްސި ނަމަވެސް ކުރިއަށް އޮތް ތިން އަހަރުގެ ތެރޭގައި އެ އެއާޕޯޓަށް ދުވާލަކު އަށް ފްލައިޓު ޖައްސާނެ ކަމަށް އައިލެންޑް އޭވިއޭޝަނުން ބުނެފިއެވެ.ޓީވީއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އައިލެންޑް އޭވިއޭޝާންގެ މެނޭޖިންގ ޑިރެކްޓަރ އަބްދުލް ހާރިސް ވިދާޅުވީ އިފުރު އެއަރޕޯޓްގެ ޝެޑިއުލް ރާވާނީ ރ. އަތޮޅުގެ ޓޫރިޒަމް ޑިވެލޮޕްމަންޓަށް ބަލައިގެން ކަމަށާއި ޓޫރިޒަމްއަށް އަމާޒުކުރުމުން މަތިންދާ ބޯޓްގެ ޓިކެޓްގެ އަގު ވަރަށް ބޮޑަށް ހެޔޮކުރެވިގެންދާކަމަށެވެ. އަދި ޓޫރިޒަމް ދާއިރާ ތަރއްގީކުރުމަށް އޭވީއޭޝަން ދާއިރާވެސް ތަރައްގީކުރުމަށް ހަމަޖެހިފައިވާކަމަށާއި ޓޫރިޒަމް ގެނެސްދޭ އެއްޗަކީ އޭވިއޭޝަންކަމަށެވެ.ހާރިސް ވިދާޅުވީ ރ. އަތޮޅޫގައި މިހާރު ތަރައްގީކުރާ ދެ ރިސޯޓެއްގެ މަސައްކަތް އަންނަ އަހަރަށް ނިމޭނޭކަމަށާއި ރިސޯޓްތައް ހުޅުވޭވަރަކަށް ޝެޑިއުލް ފްލައިޓްތައްވެސް އިތުރުކުރަމުންދާނެކަމަށެވެ.ރ. އަތޮޅު އަތޮޅު ކައުންސިލްގެ ނައިބު ރައީސް އިބްރާހިމް އަބްދުލް ކަރީމް ވިދަޅުވީ ރ. އަތޮޅަކީ މަސައްކަތްތެރި ފަންނުވެރިން ދިރިއުޅޭ އަތޮޅެއްކަމަށާއި ފަންނުވެރިންގެ މަސައްކަތްތައް އިތުރަށް ހަރުދަނާކުރުމަށް އިފުރު އެއަރޕޯޓް ހުޅުވިގެން ދިއުމުން މަގުފަހިވެގެންގޮޮސްފައިވާކަމަށެވެ. އަދި އިންވެސްޓަރުންނަށް އަތޮޅޫގައި ތިބި މަސައްކަތްތެރިންނާއި ހަމައަށް އައުމަށް ފުރުސަތު ހުޅުވިގެންގޮސްފައިވާކަމަށް އޭނާ ވިދާޅުވިއެވެ.އުނގޫފާރު ދާއިރާގެ މެމްބަރު ޖައުފަރު ދާވޫދު ވިދާޅުވީ ރ. އަތޮޅަކީ ކިއްސަރު ވާޑަމަށް މަޝްހޫރު ރަށެއްގެ އިތުރަށް ދަނޑުވެރި އަތޮޅެއްކަމަށެވެ. އެހެންކަމުން އިފުރު އެއަރޕޯޓްގެ ޚިދުމަތް ދޭން ފެށުމުން މާލެއަށް ދަނޑުވެރިންގެ އުފެއްދުންތައް މާލެއަށް ފޮނުވުމުގެ މަގު ތަނަވަސްވެގެންގޮސްފައިވާކަމަށެވެ.ރ. އިފުރުގައި ތަރައްގީކުރި އެއާޕޯޓު ރައީސް އަބްދުﷲ ޔާމީން އިއްޔެވަނީ ހުޅުވައިދެއްވާފައެވެ.