ދިވެހި ޙައްޖާޖީއަކަށް ސްޓްރޯކެއްޖެހިގެން "މިނާ އަލްވާދީ "ހޮސްޕިޓަލްގައި ފަރުވާދޭން ފަށައިފިއެވެ.
އެ ހޮސްޕިޓަލްގައި ފަރުވާދެމުންދަނީ ފ.ދަރަބޫދޫ މުޝްތަރީގެ އުމުރުން 38 އަހަރުގެ ސީމާ މޫސާއަށެވެ. ދިވެހި ހައްޖު މިޝަނުން ވިދާޅުވީ ޙައްޖު ކޯޕަރޭޝަންގެ ހަވާލުގައި ޙައްޖަށް ދިޔަ މި އަންހެންމީހާއަށް ސްޓްރޯކެއް ޖެހިފައިވަނީ މިނާގެ ޓެންޓެއްގައި ހުއްޓާ ކަމަށެވެ. އަދި މިހާރު މިނާގެ "މިނާ އަލްވަދީ" ހޮސްޕިޓަލްގައި އޭނާއަށް ފަރުވާދެމުންދާކަމަށެވެ. އަދި އޭނާ މިހާރު އޮތީ ކޯމާއެއްގައި ލައިފް ސަޕޯޓުގައިކަމަށްވެސް ހައްޖު މިޝަނުން މަޢުލޫމާތު ދެއްވައެވެ.
މިއަހަރު ހައްޖަށް ދިޔަ މީހުންގެ ޙާލު އާއްމު ގޮތެއްގައި ރަނގަޅެވެ. ޙައްޖަށް ދިޔަ މީހުންގެ ތެރެއިން އިއްޔެގެ ވަގުތެއްގައި ޙައްޖު ކޯޕަރޭޝަންގެ ތިން މީހަކު ގެއްލުނުނަމަވެސް އިރުއޮއްސުމުގެ ކުރިން އެމީހުން ވަނީ ފެނިފައެވެ. އަދި އިރު އޮއްސުމުގެ ކުރިން އެ ތިން ޙައްޖުވެރިންވެސް ވަނީ ބޮޑު ޖަމްރާއަށް ހިލައުކާފައެވެ.
މިއަހަރު ރާއްޖެއިން 6 ޖަމާއަތެއްގެ ހަވާލުގައި 2000 މީހުން ވަނީ ހައްޖަށް ގޮސްފައެވެ.