މިއަހަރުގެ އަޞުޙާ ޢީދާ ގުޅިގެންވެސް އުޞްހިޔާ ކަތިލުމުގެ ޙަރަކާތްތައް މާލެއާއި އަތޮޅުތަކުގެ ބައެއް ރަށްރަށުގައި ކުރިއަށް ގެންގޮސްފިއެވެ.
މިއަހަރު މިޙަރަކާތް ސިނާޢީ ސަރަހައްދުގައި ކުރިއަށް ގެންގޮސްފައިވަނި އަމިއްލަ ޖަމްޢިއްޔައެއްކަމަށް ޖަމްޢިއްޔަތުލްއިސްލާމްގެ ފަރާތުންނެވެ. އެޖަމާޢަތުންވަނީ 700އަށްވުރެ ވުރެ ގިނަ ބަކަރި ކަތިލާފައެވެ.
މިއަދު ހެނދުނު އީދުނަމާދަށް ފަހު މާލޭ އިންޑަސްޓްރިއަލް ވިލެޖު ސަރަހައްދުގައި ކުރިއަށްގެންދިޔަ މިހަރަކާތް ބަލާލުމަށް އެސަރަހައްދަށް ގިނަ ޢަދަދެއްގެ މީހުން އެއްވިއެވެ. ޖަމްޢިއްޔަތުލްއިސްލާމުގެ ފަރާތުންބުނީ އުޟްޙިޔާގެ ގޮތުގައި ކަތިލި ބަކަރިތަކުގެ ތެރެއިން ގިނައީ ރާއްޖޭގެ ރަށްތަކުގައި ހިންގަމުންދާ ފާމްތަކުން ގެނައި ބަކަރިކަމަށެވެ. އަދި މަދުންނަމަވެސް ރާއްޖެއިން ބޭރުން ގެނެސްފައިވާ ބަކި ހިމެނެއެވެ. ކަތިލި ތަކެތީގެ މަސް ވަނީ ފަޤީރުންނަށާއި، އެސަރަޙައްދަށް އެއްވި މީހުންނަށް ބަހާފައެވެ.
އަޟުހާ ޢީދު ދުވަހު އުޟުހިޔާ ކަތިލުމަކީ ކީރިތި ރަސޫލާ މޫހައްމަދު ސައްލަﷲ ޢަލައިހި ވަސައްލަމްގެ ސުންނަތުން ޘާބިތުވެގެންވާ ވަރަށްމަތިވެރި އަޅުކަމެކެވެ. އުޟުޙިޔާގެ ގޮތުގައި ކަތިލަންޖެހެނީ ނަޢަމްސޫފީގެ ތެރޭގައި ހިމެނޭ ޖަނަވާރެކެވެ.
ރާއްޖޭގައި ޢާއްމުކޮށް ނަޢަމްސޫފީގެ ބާވަތްތައް ލިބެން ނުހުންނާތީ ޢުޟުޙިޔާގެ ގޮތުގައި ނަޢަމްސޫފި ކަތިލުން އެހައި ޢާއްމެއްނޫނެނެވެ. އެހެންނަމަވެސް ޒަމާނުއްސުރެ ރާއްޖެއިން ލިބެންހުންނަ ކުކުޅުހާ ފަދަ ތަކެތި އަޟުޙާ ޢީދުގައި އައި ކަތިލަމުންނެވެ.
އެހެންނަމަވެސް އުޟުޙިޔާ ކަތިލުމުގެ ސުންނަތް ދިރުވުމަށްޓަކައި ރާއްޖޭގެ ދީނީ ޖަމްޢިއްޔާތަކާއި ޢާއްމުފަރުދުންވެސް ފަހަކަށް އައިސް ގިނަ މަސައްކަތްތަކެއް ކުރެއެވެ. އެގޮތުން މާލެއެކޭ އެއްފަދައިން ރާއްޖޭގެ އެހެން ރަށްރަށުގައިވެސް މިހަރަކާތް ކުރިއަށްގެންދެއެވެ.
އުޟްހިޔާކަތިލުމުގެ ފޯރި މިފަހަރުގެ ޢީދުގައި ވަކިންގަދައެވެ. މާކެޓްގައި ބޮޑު އަގުގައި ހުންނަ ބަކަރި ގަނެގެންވެސް އުޟްހިޔާ ކަތިލުމަކީ ވަރަށް ގިނަ ޢާއިލާތަކެއްގެ އުފަލަކަށް އޮތީ ވެފައެވެ.