މާދަމާ މޫސުން ގޯސްވެއްޖެނަމަ މާލޭގައި ބޮޑު ޖަމާޢަތުގައި ޢީދު ނަމާދު ކުރާނީ އިސްލާމީ މަރުކަޒުގައިކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
މާލޭގައި މިހާރު ހުރި އެންމެ ބޮޑު މިސްކިތް އިސްލާމީ މަރުކަޒުގައި ބޮޑު ޖަމާޢަތުގައި ޢީދު ނަމާދުކުރުމަށް ނިންމިނަމަވެސް އެހެން މިސްކިތްތަކުގައިވެސް ޢީދު ނަމާދު ކުރާނެކަމަށް އިސްލާމިކް މިނިސްޓްރީން ވިދާޅުވެއެވެ. އަދި ބޮޑު ޖަމާޢަތުގައި ނަމާދުކުރަން ނިންމާފައިވާ ރަށްތަކުގައިވެސް މޫސުން ގޯސްވެއްޖެނަމަ އެ ރަށެއްގައި ހުންނަ އެންމެ ބޮޑު މިސްކިތުގައި ބޮޑު ޖަމާޢަތުގައި ޢީދު ނަމާދު ކުރާނެ ކަމަށެވެ.
އީދު ނަމާދު ކުރަން ފަށާނީ މާދަމާ ހެނދުނު 7:30 ގައެވެ.
މިދުވަސްވަރު ރާޢްޖޭގެ އެކި ކަންކޮޅުތަކަށް މޫސުން ގޯސްވާނެކަމަށް މޫސުމާބެހޭ ޤައުމީ އިދާރާއިން ވަނީ ލަފާކޮށްފައެވެ.
މާލޭގައި މިއަހަރުވެސް ބޮޑު ޖަމާޢަތުގައި އަޟްޙާ ޢީދު ނަމާދުކުރުމަށް ހަމަޖައްސާފައިވަނީ މާފަންނު ސްޓޭޑިއަމްގައެވެ.
މާލޭ ސްޓޭޑިއަމްގައި ތިން ޓާފް ދަނޑު އޮންނައިރު އެތަނުން ދެ ދަނޑުގައި ނަމާދުކުރާގޮތަށް ހަމަޖައްސާފައިވަނީ، ފިރިހެނުންނަށެވެ. އަދި އެންމެ ފަހުން ހެދި ޓާފް ދަނޑު އަންހެނުންނަށް ވަނީ ޚާއްސަކޮށްފައެވެ. މީގެ އިތުރުން، ހުޅުމާލޭގެ ބޮޑު ޖަމާއަތް ބާއްވަން ހަމަޖެހިފައިވަނީ ހުޅުމާލޭ ސެންޓްރަލް ފާރކް ސަރަޙައްދުގައެވެ. އަދި ވިލިނގިލީގައި ބޮޑު ޖަމާޢަތުގައި ނަމާދުކުރާނީ އެރަށު ބޯޅަދަނޑުގައެވެ.
މާލޭގެ އިތުރުން އަތޮޅު ތެރޭގެ 10 ރަށެއްގައި މިއަހަރުގެ އަޟްހާ އީދު ނަމާދު ބޮޑު ޖަމާއަތުގައި ކުރުމަށް ހަމަޖެހިފައިވެއެވެ.