އެންސްޕާއަކީ އެއްވެސް ތަފާތުކުރުމެއްނެތި ޚިދުމަތްދެވޭ ނިޒާމަކަށް ވެގެންދާންޖެހޭ ކަމުގައި ރައްޔިތުންގެ މަޖިލީހުގެ މެމްބަރުން ވިދާޅުވެއްޖެއެވެ.
ނޭޝަނަލް ޝޯޝަލް ޕްރޮޓެކްޝަން އެޖެންސީ (އެންސްޕާ)، ޖެންޑާ މިނިސްޓްރީގެ ދަށަށް ބަދަލު ކުރުމަށް އިޖްތިމާޢީ ސިއްޙީ އިންޝުއަރެންސްގެ ޤައުމީ ނިޒާމުގެ ޤާނޫނަށް ހުށަހެޅި އިސްލާހަށް ބަހުސް ކުރެއްވި ހުރިހާ މެމްބަރުންވެސްވަނީ މިއިސްލާހަށް ތާޢީދުކުރައްވާފައެވެ. މި އިސްލާޙަށް ވާހަކަދައްކަވަމުން ހުޅުލާމެ ދާއިރާގެ މެމްބަރު އަލީ ނިޔާޒް ވިދާޅުވީ، ސިއްޙީ އިންޝުއަރެންސަށް ސަރުކާރުން ކަޑައަޅާފައިވާ ނިޒާމަކީ ރާއްޖޭގެ ހުރިހާ ރައްޔިތުންނަށް ބޭސްކުރެވޭ ގޮތަށް އިންތިޒާމުކުރެވިފައިވާ ނިޒާމެއްކަމަށެވެ. މިނިޒާމުގެ ތެރެއިން ވިޔަފާރިކޮށް، ކޮންސްޓްރެކްޝަން މަސައްކަތްތަކަށް ޚަރަދުކުރުމަކީ ބަލައިގަނެވޭނެ ކަމެއް ނޫންކަމަށެވެ. މިއަދު މިނިޒާމުގެ މަސްއޫލުވެރި ފަރާތެއް ޤާނޫނެއްގެ ތެރެއިން ކަޑައެޅުމުގެ އެންމެބޮޑު މަޤުސަދަކީވެސް ޚިދުމަތު ފަންވަރުރަގަޅުކޮށް، މިކަމުގެ ޙައްޤުވެރިންނަށް މި ޚިދުމަތް ދިނުމަށްކަމަށެވެ.
މިއިސްލާހާމެދު ވާހަކަދައްކަވަމުން ކެންދޫ ދާއިރާގެ މެމްބަރު ޢަލީ ހުސައިން ވިދާޅުވީ ރާއްޖޭގައި ތިބި ނުކުޅެދުންތެރިކަން ހުންނަ ފަރާތްތަކަކީ އެންސްޕާގެ ތެރެއިން އިތުރު ސަމާލުކަމެއް ދީގެން ޚިދުމަތް ދެވެންޖެހޭ ފަރާތްތަކެއްކަމަށެވެ. ރާއްޖޭގައި ތިބި ނުކުޅުދުންތެރިކަން ހުންނަ ފަރާތްތައް ކެޓަގަރައިޒްކޮށް ރަގަޅު ނިޒާމެއްގެ ތެރެއިން ޚިދުމަތްދެވޭނެ އިންތިޒާމު މިބަދަލާއިއެކު ފެނިގެންދާނެކަމަށް އުންމީދު ކުރައްވާކަމުގައި ޢަލީ ހުސައިން ވިދާޅުވިއެވެ. ސިއްޙީ އިންޝުއަރެންސް ނިޒާމަކީ މުޖުތަމައުގައި ތިބޭ މިފަދަ ފަރާތްތަކަށް ޚިދުމަތް ދިނުމަށް އޮތް ނިޒާމަކަށްވާއިރު މިފަދަ ކަންކަން ނިޒާމުގެ ތެރެއިން ކުރުމަކީ އެފަރާތްތަކަށް ލިބިގެންދާނެ ލުޔެއް ކަމުގައިވެސް އޭނާ ވިދާޅުވިއެވެ.
މިއިސްލާޙަށް ވާހަކަ ދެއްކެވި މެމްބަރުންގެ ތެރެއިން ހިންނަވަރު ދާއިރާގެ މެމްބަރު ޖީހާން މަޙުމޫދު ވިދާޅުވީ ޤާނޫނުގައި ބުނާގޮތުން އެންސްޕާފަދަ ސޯޝަލް ހެލްތް ސާވިސްއެއްދޭ ތަނެއްގެ ޒިންމާ އޮތީ ޖެންޑާމިނިސްޓްރީގެ ދަށުގައިކަމަށެވެ. އެހެންކަމުން މިއިސްލާޙަކީ މިނިޒާމު ހަރުދަނާކަމާއެކު ގެންދިއުމަށް ގެންނަންޖެހޭ އިސްލާހެއްގެ ގޮތުގައި ދެކިވަޑައިގަންނަވާކަމުގައި ޖީހާން ވިދާޅުވިއެވެ. އަދި ފާއިތުވެދިޔަ ތަނުގައި އެންސްޕާއިން ޚިދުމަތް ދިނުގައި ސިޔާސީ ވަކިމަންފާތަކަކަށް އަމާޒުކޮށް ޚިދުމަތް ދެވިފައި އެބަހުރިކަމަށާ، މިއީ މިޚިދުމަތުގެ މަޤުސަދު ގެއްލިގެންދާ ކަމެއްކަމުގައި އޭނާ ފާހަގަކުރެއްވިއެވެ.
މި އިސްލާހާމެދު ވާހަކަދެއްކެވި މެމްބަރުންގެ މައިގަނޑު ކަންބޮޑުވުމަކީ މިހާރު އެންސްޕާގެ ތެރެއިން ދެވޭ ޚިދުމަތްތައް ލަސްވުމާއި، ބައެއް ރަށްރަށުގައި ހުރި ސީއެމްބިއުލާންސްފަދަ އުޅަދުތައް އެކަށީގެންވާ ގޮތެއްގައި ބޭނުން ނުކުރެވޭކަމުގެ ކަންބޮޑުވުމެވެ. އަދި ބައެއް މެމްބަރުންވަނީ ކުރީގެ ސަރުކާރުން ރާއްޖެއިން ބޭރުގެ ބައެއް ޤައުމުތަކުގައި މިޚިދުމަތް ފޯރުކޮށްދީފައިވަނީ އެއްވެސް ކޮލިޓީއަކަށް ބެލުމެއްނެތި ވަކި މަންފާތަކެއް ޙާސިލްކުރުމަށް ކަމަށް ވިދާޅުވެފައެވެ.
ނޭޝަނަލް ޝޯޝަލް ޕްރޮޓެކްޝަން އެޖެންސީ (އެންސްޕާ)އިން ފާއިތުވެދިޔަ އަހަރު 2.1 ބިލިޔަން ރުފިޔާ މި ނިޒާމަށް ވަނީ ޚަރަދުކޮށްފައެވެ. މި ޚަރަދުތައް ކޮށްފައިވާކަމަށް އެންސްޕާގެ ތަފާސްހިސާބުތަކުން ދައްކާގޮތުން ތިން ލައްކަ ތިރީސް ނުވަ ހާހަށްވުރެ ގިނަ މީހުންނަށް މިޚިދުމަތް ފޯރުކޮށްދީފައިވާއިރު އޭގެތެރެއިން ދެ ލައްކަ އަށްޑިހަ ދެ ހާހަށްވުރެ ގިނަމީހުންނަކީ އަތޮޅުތަކަށް ނިސްބަތްވާމީހުންނެވެ. އަދި މާލެއަށް ނިސްބަތްވާ ފަންސާސް ހަތް ހާހަށްވުރެ ގިނަމީހުންނަށް އެންސްޕާއިން މިދިޔަ އަހަރު ޙިދުމަތް ފޯރުކޮށްދީފައިވާކަމަށް އެންސްޕާގެ ތަފާސް ހިސާބުތަކުން ދައްކައެވެ.