އިނގިރޭސިވިލާތުގެ ވިސާ އެޕްލިކޭޝަނަށް އެދުމުގެ ފުރުސަތު މާދަމާގެ ނިޔަލަށް ހުޅުވާލާއިފިއެވެ.
ފޮރިން މިނިސްޓްރީން ވިދާޅުވީ ވަގުތީ ވިސާ އެޕްލިކޭޝަން ސެންޓަރުން ކުރިން އެޕޮއިންޓްމަންޓް ހައްދާފައިވާ ފަރާތްތަކުގެ ބަޔޯމެޓްރިކް އެންރޯލްމަންޓާއި ޑޮކިއުމަންޓް ބަލައިގަތުން މިއަދު ހެނދުން ފެށިގެން ކުރިއަށްދާކަމަށެވެ.
އިނގިރޭސިވިލާތުގެ ސަރުކާރުން ވަގުތީ ވިސާ އެޕްލިކޭޝަން ސެންޓަރެއް ހުޅުވައި ދެއްވީ އިނގިރޭސިވިލާތުގެ ވިސާ ހޯދުމަށް، ހާއްސަކޮށް ސްޓޫޑެންޓް ވިސާ ހޯދުމަށް ދިމާވާ ދަތިތަކަށް ހައްލެއް ހޯދައި ދިނުމަށް ދިވެހި ސަރުކާރުގެ އެދުމުގެ މަތިންނެވެ.
ވިސާ އެޕްލިކޭޝަން ސެންޓަރު ކުރިއަށް ދާނީ އޮގަސްޓް ފަހަކުން ހަޔަކަށް ކޮންމެ ދުވަހެއްގެ ހެނދުނު 9:00 އިން ހަވީރު 5:00 އަށް ކަމަށް ވެސް ފޮރިން މިނިސްޓްރީން މައުލޫމާތުދެއެވެ. ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވެރިކަމާއި ހަވާލުވެ ވަޑައިގެންނެވުމަށްފަހު ބޭރުގެ ޤައުމުތަކުގައި ކިޔަވަމުންދާ ކުދިންނަށާއި، ދިރިއުޅެމުންދާ ފަރާތްތަކަށް ދިމާވާ ވިސާގެ މައްސަލަ ހައްލުކޮށްދެއްވުމަށް ގިނަ މަަސައްކަތްތަކެއް ދަނީ ކުރަމުންނެވެ.