ހ.ޓެންސްޓަރ ގޭގައި ހިނގި އަލިފާނުގެ ޙާދިސާއާ ގުޅިގެން އެގެއިން ކަރަންޓު ކެނޑިފައިވާތީ 16 މީހަކަށް ބޭނުންވާ ވަގުތީ އެހީ ފޮރުކޮށްދޭނީ 3 ދުވަހަށްކަމަށް ނެޝަނަލް ޑިޒާސްޓަރ މެނޭޖުމަންޓު އޮތޯރިޓީ (އެންޑީއެމްއޭ)އިން ބުނެފިއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެންޑީއެމްއޭއިން ވިދާޅުވީ ހ.ޓެންސްޓަރ ގޭގައި ހިނގި އަލިފާނުގެ ޙާދިސާއާ ގުޅިގެން އެގެއިން ކަރަންޓުކެނޑުމުގެ ސަބަބުން އެކަން ހައްލުކުރުމަށް 3 ދުވަސް ނަގާނެކަމަށް ލަފާކޮށް އެފަރާތްތަކަށް އެހީތެރިކަން ފޯރުކޮށްދޭނެކަމަށެވެ. މިގޮތުން މި ތިންދުވަހަށް ވާވަރަށް ކެއުމާ ބޯހިޔާވަހިކަން ހޯދުމަށްޓަކައި ފައިސާގެ އެހީ ދީފައިވާކަމަށް އެ އޮތޯރިޓީން ވިދާޅުވެއެވެ. އަދި ފަސްރޫމްގެ އެކޮމަޑޭޝަންއާއި ކެއުމަށްޓަކައި ސަތާރަހާސް އެއްސަތޭކަ ރުފިޔާ ޚަރަދުވާކަމަށްވެސް އެންޑީއެމްއޭއިން ވިދާޅުވެއެވެ.
އިއްޔެ ހިނގި އަލިފާނުގެ ހާދިސާގައި ގެއްލުން ލިބުނު ތަންތަނަށް އެންޑީއެމްއޭއިން ވަނީ ގޮސް ބަލާފައެވެ. މިޙާދިސާ ހިނގަންމެދުވެރިވީ ހ.ޓެންސްޓަރ ގެއާ ޖެހިގެން ހުރިގޭގައި ވެލްޑިން ކުރުމުގެ މަސައްކަތުގެ ތެރެއިންކަމަށް ފުލުހުންވަނީ ހާމަކުރައްވާފައެވެ.
މާލޭ ސޯސަންމަގުގައި ހުރި ހ.ޓެންސްޓަރގޭގެ ތިންވަނަ ފަންގިފިލާގައި އަލިފާނުގެ ޙާދިސާއެއް ހިނގައިގެން އެމް.އެން.ޑީ.އެފަށް ރިޕޯޓުކޮށްފައިވަނީ އިއްޔެ ހެނދުނު 11:11 ހާއިރުއެވެ. އަދި 11:35 ހާއިރު އަލިފާންގަނޑު އެއްކޮށް ނިއްވާލާފައިވާއިރު، މި ޙާދިސާގައި އެއްވެސް މީހަކަށް ގެއްލުމެއްނުވާކަމަށް ފުލުހުން ވިދާޅުވެއެވެ.
ފުލުހުން ވިދާޅުވީ، މިހާތަނަށް ބެލިބެލުމުން މި ޙާދިސާ ހިނގަން މެދުވެރިވީ، ޓެންސްޓަރގެއާއި ޖެހިގެން ހުރި އިމާރާތުގައި ވެލްޑިންގ ކުރުމުގެ މަސައްކަތް ކުރަނިކޮށް، އަލިފާންކޮޅެއް ބުރައިގެން އައިސް ގޮދަނޑިއެއްގައި ރޯވެގެންކަމަށް ބެލެވޭކަމަށެވެ. އަދި މި ޙާދިސާގައި އެ ގޭގައި ހިފާގެންގުޅޭ ބައެއް ސާމާނަށް އެކިވަރުގެ ގެއްލުން ވެފައިވާކަމަށްވެސް ފުލުހުން ވިދާޅުވެއެވެ.