ހދ.އަތޮޅުގެ ރަށްތަކުގެ ބޯހިޔާވަހިކަމުގެ ޙާލަތު ބައްލަވާލެއްވުމަށް މިނިސްޓަރ އެ އަތޮޅަށް ވަޑައިގެންފި
ހ.ދ އަތޮޅުގެ ބޯހިޔާވަހިކަމުގެ ހާލަތު ބައްލަވާލެއްވުމަށް ހައުސިންގ މިނިސްޓަރ އައިމަނަތު އާތިފާ އެ އަތޮޅަށް ރަސްމީ ދަތުރުފުޅެއް ފަށްޓަވައިފިއެވެ.
ހައުސިންގ މިނިސްޓަރ ތިންދުވަހަށް ހދ.އަތޮޅުގެ ރަށްތަކަށް ކުރައްވާ މި ޒިޔާރަތުގައި، ރަށްތަކުގައި ދިރިއުޅޭ މީހުންނަށް ދިމާވެފައިވާ ބޯހިޔާވަހިކަމުގެ ހާލަތު ބެލުމަށް ވަނީ ހަމަޖެހިފައެވެ. އެގޮތުން މި ދަތުރުފުޅުގައި މިނިސްޓަރ ވަނީ ހދ. ހަނިމާދޫގައި އިމާރާތްކުރާ ގެތަކުގެ ޙާލަތު ބައްލަވާލައްވާ އެރަށުގެ ކައުންސިލާ ބައްދަލުކުރައްވާ ކަންބޮޑުވުންތައް އޮޅުންފިލުއްވައި، ގެދޮރުވެރި ކުރުމާ ގުޅޭގޮތުން މަޝްވަރާކުރައްވާފައެވެ.
މީގެ އިތުރުން އެ އަތޮޅު ނޮޅިވަރަންފަރުގައި އިމާރާތްކުރުން ހުއްޓިފައިވާ 160 ގޭގެ ތެރެއިން 60 ގޭގެ މަސައްކަތް ކުރިއަށްދާގޮތް މިނިސްޓަރު އާތިފާ ވަނީ ބައްލަވާލައްވާފައެވެ. އަދި އެރަށަށް ހިޖުރަކުރި 52 އާޢިލާ އާ ބައްދަލުކުރައްވައި އެ ފަރާތްތަކުގެ ކަންބޮޑުވުންތައްވެސް ވަނީ އަޑުއައްސަވާފައެވެ.
2011 ވަނަ އަހަރު ވަނީ ހދ.ފަރިދުއާއި މައިވާދޫގެ އިތުރުން އެއަތޮޅު ކުނބުރުދޫން ނޮޅިވަރަންފަރަށް މީހުން ބަދަލުކޮށްފައެވެ. އޭގެ އެއް އަހަރުފަހުން 2012 ވަނަ އަހަރު ނޮޅިވަރަންފަރުގައި ފެށި ބޯހިޔާވަހިކަމުގެ މަޝްރޫޢުގެ ދަށުން ބައެއް ޢާއިލާތަކަށް ބޯހިޔާވަހިކަން ލިބިފައިވީނަމަވެސް އަދިވެސް 52 އާއިލާއަކަށް ވަނީ ދިރިއުޅޭނެ ހިޔާވަހިކަމެއް ނުލިބިއެވެ.