މި އަހަރުގެ ފުރަތަމަ ހަ މަސްދުވަސްތެރޭ އެސްޓީއޯއަށް 4.7 ބިލިއަން ރުފިޔާގެ ޖުމްލަ އާމްދަނީއެއް ލިބިއްޖެއެވެ. މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 286 މިލިއަން ރުފިޔާގެ ކުރިއެރުމެކެވެ.
ސަރުކާރާއި ރައްޔިތުން ހިއްސާވާ ކުންފުނި އެސްޓީއޯއިން އާއްމުކޮށްފައިވާ އެކުންފުނީގެ މިއަހަރުގެ ދެވަނަ ކުއާޓަރގެ މާލީ ހިސާބުތައް ދައްކާގޮތުން ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ އެސްޓީއޯއިން ވިއްކި ތެލާއި އެހެނިހެން ވިޔަފާރިތަކުން ލިބުނު އާމްދަނީ އިތުރުވުމެވެ. އެގޮތުން، ވިއްކި ތެލުގެ އަދަދު ވަނީ 2018 ވަނަ އަހަރުގެ މި މުއްދަތާއި އަޅާ ބަލާއިރު 7.5 އިންސައްތަ އިތުރުވެފައެވެ.
އެސްޓީއޯގެ މާލީހިސާބުތަކަށް ބަލާއިރު، މިއަހަރުގެ ދެވަނަ ކުއާޓަރގެ އާމްދަނީ އަކީ 2.4 ބިލިއަން ރުފިޔާއެވެ. މިއީ، އޭގެ ކުރީ ކުއާޓަރއާއި އަޅާބަލާއިރު 38 މިލިއަން ރުފިޔާގެ ކުރިއެރުމެކެވެ.
އެހެންނަމަވެސް، 2019 ވަނަ އަހަރުގެ ދެވަނަ ކުއާޓަރ ވެގެންދިޔައީ ދުނިޔޭގެ ބާޒާރުގައި ތެލުގެ އަގުތަކަށް ވަރަށް ހަލުވި ކަމާއިއެކު ބަދަލުތަކެއް އައި ކުއާޓަރަކަށެވެ. އެހެންކަމާއިއެކު، ތެލުގެ އަގުތައް އެއްވަރެއްގައި ހިފެހެއްޓުމަށާއި ތެލުގެ އަގު ބޮޑުވުމުގެ ސަބަބުން ރާއްޖޭގެ އިޤްތިޞާދަށް ކުރާ އަސަރު ކުޑަކުރުމަށް ގިނަ މަސައްކަތްތަކެއް ކޮށްފައިވާނޭކަމަށް އެސްޓީއޯއިން ބުނެއެވެ. މިގޮތުން ތެލުގެ އަގުތަކަށް ބޮޑެތި ބަދަލު ތަކެއް ނުގެނެސް، މި އަހަރުގެ ދެވަނަ ކުއާޓަރގައި 330 މިލިއަން ރުފިޔާގެ ޖުމްލަ ފައިދާއެއް ލިބިފައިވާކަމަށް އެސްޓީއޯއިން ފާހަގަކުރެއެވެ.
މިއަހަރުގެ ދެވަނަ ކުއާޓަރަކީ ރޯދަމަހުގެ އިނާޔަތްތަކާއި އަހަރީ ބޯނަސް ދޭ ކުއާޓަރަށް ވެފައި، މި މުއްދަތުގައި ހިންގުމުގެ ޚަރަދު ވަނީ އޭގެ ކުރީ ކުއާޓަރއާއި އަޅާބަލާއިރު އިތުރުވެފައެވެ.
ދުނިޔޭގެ ބާޒާރުގައި ތެލުގެ އަގު އުފުލިގެން ދިޔަ އަދަދަށް އެސްޓީއޯއިން ވިއްކަމުންދިޔަ ތެލުގެ އަގު އެނިސްބަތުން ބޮޑުކޮށްފައި ނުވުމާއި އަދި އިދާރީ ޚަރަދު އިތުރުވުމުގެ ސަބަބުން، އެސްޓީއޯއަށް މި އަހަރުގެ ދެވަނަ ކުއާޓަރުގެ ސާފު ފައިދާގެ ގޮތުގައި (ޓެކްސްއަށް ކެނޑުމުގެކުރިން) ލިބިފައިވަނީ 97 މިލިއަން ރުފިޔާއެވެ.
ފާއިތުވި ކުއާޓަރުގެ ތެރޭގައި އެސްޓީއޯއިން ވަނީ ތެލުގެ އަގު ދެ ފަހަރެއްގެމަތިން ހެޔޮކޮށްފައެވެ. މިއާއެކުވެސް، އަހަރުގެ މިހާތަނަށް ކުންފުންޏަށްވަނީ މާލީގޮތުން ރަނގަޅު ފައިދާއެއް ލިބިފައެވެ. މިއަހަރުގެ ފުރަތަމަ ހަމަސްދުވަހުގެ ހިންގުމުގެ ފައިދާއަކީ 222 މިލިއަން ރުފިޔާއެވެ. މި އަދަދަކީ، 2018 ވަނަ އަހަރުގެ ފުރަތަމަ ހަމަސްދުވަހާއި އަޅާބަލާއިރު 110 މިލިއަން ރުފިޔާގެ ކުރިއެރުމެކެވެ. މިއާއެކު، ފާއިތުވި 6 މަސްދުވަހުގެ ތެރޭގައި އެސްޓީއޯއަށް ވަނީ 2018 ވަނަ އަހަރުގެ ސާފު ފައިދާގެ 88 އިންސައްތަ ހާސިލްކުރެވިފައެވެ.