ގއ.ކަނޑުހުޅުދޫ ކޯޓުގެ އިސްމެޖިސްޓްރޭޓް ހަސަން ދީދީ ސަސްޕެންޑް ކުރަން ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ނިންމައިފިއެވެ.
އެކޮމިޝަނުން ވިދާޅުވީ އިސް މެޖިސްޓްރޭޓް ހަސަން، ސަސްޕެންޑް ކުރަން އެކޮމިޝަނުން ނިންމެވީ އޭނާއާ ގުޅޭގޮތުން ބަލަމުންދާ މައްސަލައަކާ ގުޅިގެން އެމައްސަލަ ވަކިގޮތަކަށް ނިމެންދެން ކަމަށެވެ. މީގެ އިތުރުން ހުޅުމާލޭ ކޯޓުގައި ވަގުތީ ގޮތުން މަސައްކަތް ކުރައްވާ މެޖިސްޓްރޭޓް ހުސައިން ރަޝީދު އޭނާކުރިން މަސައްކަތް ކުރެއްވި، ފުވައްމުލަކު ކޯޓަށް ބަދަލުކުރަންވެސް ޖޭއެސްސީން މިއަދު ނިންމެވިއެވެ. އެގޮތައް ނިންމެވީ އޭނާ ހުޅުމާލޭ ކޯޓަށް ބަދަލުކުރި މަގްސަދު ހާސިލްވަމުން ނުދާތީ ކަމަށްވެސް ޖޭއެސްސީން ވަނީ ވިދާޅުވެފައެވެ. އެހެންކަމުން އަންނަ މަހުގެ ހަތްވަނަ ދުވަހުން ފެށިގެން ފުވައްމުލަކު ކޯޓަށް އޭނާ ބަދަލުކުރަން ނިންމަވާފައިވާ ކަމަށްވެސް އެކޮމިޝަނުން ވަނީ ފާހަގަ ކުރައްވާފައެވެ.
ޖޭއެސްސީން ގެންދަނީ އެކޮމިޝަނަށް ހުށަހަޅާފައިވާ ގިނަ ފަނޑިޔާރުންތަކަކާ ގުޅޭ ގޮތުން ގިނަމައްސަލަތަކެއް ބަލަމުންނެވެ. އަދި އޭގެތެރެއިން ބައެއް ފަނޑިޔާރުން މިހާރުވެސްވަނީ ސަސްޕެންޑްކޮށްފައެވެ. އެގޮތުން ސުޕްރީމް ކޯޓުގެ ފަނޑިޔާރު ޢަބްދުﷲ ދީދީއާއި ފެމިލީ ކޯޓުގެ އިސްޤާޒީ ހަސަން ސަޢީދު ހިމެނެއެވެ.