ލާމަރުކަޒީ ނިޒާމް ހަރުދަނާ ކުރެވޭނެ ގޮތްތަކާމެދު މަޝްވަރާކުރުމަށް، ކައުންސިލަރުން ބައިވެރިވާ ކައުންސިލަރުންގެ ކޮންފެރެންސެއް ބޭއްވުމަށް އެމްޑީޕީން ހަމަޖައްސައިފިއެވެ.
އެމްޑީޕީން މަޢުލޫމާތު ދިން ގޮތުގައި މިކޮންފަރެންސް ބޭއްވުމަށް ހަމަ ޖައްސާފައިވަނީ އަންނަ އޯގަސްޓް މަހު ތެރޭގައެވެ.
އެ ޕާޓީން ބުނީ އެފޯރަމްގައި ބައިވެރިވެވަޑައިގަތުމަށް އެމްޑީޕީއަށް ނިސްބަތްވާ 300 އަށްވުރެ ގިނަ ކައުންސިލަރުންނަށް ދައުވަތު ދޭނެ ކަމަށެވެ. އޭގެތެރޭގައި ރަށު ކައުންސިލަރުންނާއި އަތޮޅު ކައުންސިލަރުންނާއި ސިޓީ ކައުންސިލަރުން ހިމެނޭނެކަމަށް އެމްޑީޕީން ބުނެއެވެ.
މީގެއިތުރުން އެމްޑީޕީ ޔޫތު ކޮންގްރެސްވެސް އަންނަ އޯގަސްޓް މަހު ބޭއްވުމަށްވަނީ ހަމަ ޖައްސާފައިވާކަމަށް އެޕާޓީން މައުލޫމާތުދެއެވެ. އެމްޑީޕީން ބުނީ އެކޮންގްރެސްގެ ބޭނުމަކީ އެމްޑީޕީގެ ޒުވާނުންގެ ގޮތްޕާއި ޒުވާނުންގެ ހިތްވަރުގެ ސިޔާސަތު ކަނޑައެޅުމުގައި ޒުވާނުންގެ ޙިއްސާ އިތުރުކުރުންކަމަށެވެ.
މިފޯރަމްގައި ރާއްޖޭގެ އެކި ދާއިރާތަކުން ޒުވާނުން ބައިވެރިވެ، ޒުވާނުން ބާރުވެރިކޮށް ސިޔާސީ މައިދާނަށް އިތުރު ޒުވާނުން ނެރުމަށް ކުރެވިދާނެ ކަންކަމާ މެދު މަޝްވަރާ ކުރެވޭނެކަމަށް ވެސް އެމްޑީޕީން މައުލޫމާތުދެއެވެ. ވެރިކަންކުރާ މައިޕާޓީ އެމްޑީޕީއަކީ މިވަގުތު އެންމެގިނަ މެމްބަރުން ތިބި ޕާޓީއެވެ. އަދި ކައުންސިލަރުގެ ތެރެއިން އެންމެގިނަ ކައުންސިލަރުން ނިސްބަތްވެވަޑައިގަންނަވަނީ ވެސް އެމްޑީޕީއަށެވެ.