ފާއިތުވެދިޔަ ހަފްތާގައިވެސް ފަންސާސް އެކްސިޑެންޓް ހިގައިފާއިވަކަމަށް ފުލުހުން ހާމަކުރައްވައިފިއެވެ.
ކޮންމެ ހަފުތާއަކު ފުލުހުން އާންމުކުރަމުންދާ ތަފާސްހިސާބުތަކުގެ ތެރެއިން މިހަފްތާގެ ތަފާސްހިސާބުތަކަށްބަލާއިރު 50 އެކްސިޑެންޓް ހިނގައި 15 މީހަކަށް މި އެކްސިޑެންޓް ތަކުގައި އެކިވަރުގެ އަނިޔާތައް ލިބިފައިވާކަން ހާމަވެއެވެ. މަގުމަތީގެ ރައްކާތެރިކަން ޤާއިމްކުރުމަށް ފުލުހުން ހިންގަމުންދާ ހަރަކާތްތަކުގައި ނިމިދިޔަ ހަފްތާގައި އެއްގޮތަކަށްވެސް ލައިސަންސް ނުނަގައި ދުއްވި 109 މީހަކާއި ލައިސަންސަ އަތުގައި ނެތި ދުއްވި 66 ފަރާތެއް ހިފަހައްޓާފައިފައިވެއެވެ.
ޤަވާއިދާއި ޚިލާފަށް ޕާކްކުރުމުގެ ސަބަބުން 256 އުޅަދެއްގައި ސްޓިކާ ޖަހާފައިވާއިރު 43 އުޅަދެއް ޓޯކޮށްފައިވާކަމަށް ފުލުހުން ހާމަކުރައްވައެވެ. މަގުމަތީގެ އަމާންކަން ރައްކާތެރިކުރުމަށް ފުލުހުން ޚާއްސަ ހަރަކާތްތަކެއް ކޮންމެ ހަފްތާއަކުވެސް ހިންގާއިރު މުޖުތަމައުގެ އާންމު މިންގަނޑުތަކާއި ޚިލާފަށް އަމަލުކުރަމުންދާ ފަރާތްތައް ހުއްޓުވުމަށްވެސް ފުލުހުން ދަނީ ޚާއްސަ ހަރަކާތްތަކެއް ހިންގަމުންނެވެ. މި ގޮތުން ގަވާއިދާ ޚިލާފަށް ވިޔަފާރި ކުރާ ފަރާތްތަކާއި، ކެފޭ ރެސްޓޯރެންޓު ތަކުގައި ގަވާއިދާއި ޚިލާފަށް ހިންގާ އަމަލުތައް ހުއްޓުވުމަށްވެސް ނިމިދިޔަ ހަފްތާގައި ފުލުހުން އެކި ހަރަކާތްތައް ހިންގާފައިވާކަން ފާހަގަކޮށްލެވެއެވެ.