މޮރިޝަސްގައި މިހާރު ކުރިޔަށްދާ ދިހަ ވަނަ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ގެ ބެޑްމިންޓަން ޓީމް އިވެންޓުން ރާއްޖޭގެ ޤައުމީ އަންހެން ޓީމު ލޯ މެޑަލް ހޯދައިފި އެވެ.
ރައުންޑް ރޮބިން ލީގު އުސޫލުން ކުޅުނު މިއިވެންޓްގެ މެޗުތައް ރާއްޖެ އާއި މޮރިޝަސް އަދި ރީޔުނިއަން މިތިން ޓީމުވެސް ވަނީ ޕޮއިންޓު އުސޫލުން އެއްވަރުވެފައެވެ.
އެހެންކަމުން މުބާރާތުގެ ނަތީޖާ ކަނޑައަޅަންޖެހުނީ މެޗު ސެޓު ގުނައިގެންނެވެ. ސެޓު ގުނައިގެން ރާއްޖެއަށް ލޯ މެޑަލް ލިބުނުއިރު މިމުބާރާތުގެ ރަން މެޑަލް ލިބުނީ ރީޔޫނިއަންއަށެވެ. އަދި ރިހި މެޑަލް ހޯދީ މޮރިޝަސްއެވެ.
އިވެންޓުގައި އަންހެން ޓީމު އިއްޔެ ވަނީ ވަނީ މަޑަގަސްކަރަ އަތުން 5-0 އިން މޮޅުވެފައެވެ. އަދި މޮރީޝަސްއާ ބައްދަލުކުރި މެޗު ރާއްޖޭގެ ޓީމުން ވަނީ 3-2 އިން ކާމިޔާބުކޮށްފައެވެ. މަޑަގަސްކަރައާ ދެކޮޅަށް ކުޅުނު ސިންގަލްސް ފުރަތަމަ މެޗުން ރާއްޖޭގެ ނަބާހާ ވަނީ 21-10 އަދި 21-14 އިން މޮޅުވެފައެވެ. އަދި ދެވަނަ މެޗުގައި ރާއްޖޭގެ ނީލާ ވަނީ 21-14 އަދި 21-9 އިން މޮޅުވެފައެވެ. ސިންގަލްސް ތިންވަނަ މެޗުން ރާއްޖޭގެ ނަބީހާ މޮޅުވީ 21-10 އަދި 21-7 އިންނެވެ.
ބެޑްމިންޓަންގެ ޓީމު އިވެންޓުން އަންހެން ޓީމު ލޯ މެޑަލް ހޯދިއިރު، އިއްޔެ ފިރިހެން ޓީމުވެސް ވަނީ ލޯ މެޑަލް ހޯދާފަ އެވެ.