މިނިވަން ދުވަހުގެ މުނާސަބާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ޤައުމާ މުޚާތަބު ކުރައްވާނެކަމަށް ރައީސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ. ރައީސް އޮފީހުން ވިދާޅުވެފައިވަނީ ރައީސުލްޖުމްހޫރިއްޔާ ޤައުމާއި މުޚާޠަބު ކުރައްވާނީ މިނިވަން ދުވަހުގެ ހެނދުނު 10:00ގައި ކަމަށެވެ. ރައީސް ޤައުމާއި މުޚާޠަބު ކުރައްވާނީ ޚަބަރު ފަތުރާ ވަސީލަތްތައް މެދުވެރިކޮށެވެ.
މީގެ އިތުރުން މިނިވަންދުވަހުގެ މުނާސަބަތުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، އެމަނިކުފާނުގެ އަނބިކަނބަލުން ފަޒްނާ އަޙްމަދު ބާއްވަވާ ރަސްމީ ބައްދަލުކުރެއްވުން، ޖުލައި 25ވާ ބުރާސްފަތި ދުވަހުގެރޭ ބާއްވަވާ ގޮތަށްވެސް ވަނީ ހަމަޖައްސަވާފައެވެ. މި ބައްދަލުކުރެއްވުން އޮންނާނީ ދަރުބާރުގޭގައެވެ. ރައީސުލްޖުމްހޫރިއްޔާގެ ދެކަނބަލުން މި ބާއްވަވާ ރަސްމީ ބައްދަލުކުރެއްވުމަށް ދައުލަތުގެ ތަފާތު ދާއިރާތަކުން ވަރަށްގިނަ އަދަދެއްގެ ބޭފުޅުންނަށް ދަޢުވަތު އަރުވާގޮތަށް ވަނީ ހަމަޖައްސަވާފައެވެ. ރަސްމީ ބައްދަލުކުރެއްވުމަށް ދަޢުވަތު އަރުވާ ބޭފުޅުންނަށް ރައީސުލްޖުމްހޫރިއްޔާގެ އޮފީހުން ދަޢުވަތު ކާޑު ފޮނުއްވަން މިހާރުވަނީ ފަށްޓަވާފައެވެ.
މިއަހަރުގެ މިނިވަން ދުވަހާއި ގުޅިގެން ހޯމްމިނިސްޓްރީންވަނީ މާލޭގައި ގިނަ ކުޅިވަރު ޙަރަކާތްތަކެއް ކުރިއަށްގެންދިއުމަށް ހަމަޖައްސާފައެވެ. އެގޮތުން ގަލޮޅު ދަނޑުގައި ހެވިކަމުގެ ކުޅިވަރުތައް ބޭއްވުމާއި، އަދި މަލޭގެ މަގުތަކުގައި ފުޅަނދުވުރާއި ޕެރޭޑުވެސް ބޭއްވުމަށް ވަނީ ހަމަޖެހިފައވެ. މި ހަރަކާތްތައް އޮންނާނީ މިމަހުގެ 27 އަދި 28ވަނަ ދުވަހުއެވެ. މި ހަރަކާތްތަކުގައި ސްކޫލްތަކާއި، އެކިއެކި މުއައްސަސާތަކުން ބައިވެރިވާނެއެވެ.
މިނިވަން ދުވަހާއި ގުޅިގެން ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙްވަނީ މިމަހުގެ 28ވަނަ ދުވަހަކީ ސަރުކާރު ބަންދު ދުވަހެއްގެ ގޮތުގައިވެސް ހަމަޖައްސަވާފައެވެ.