ޕަޑީގެ ބައިނަލްއަޤްވާމީ އަންހެން ޑައިވަރުންގެ ދުވަސް ފާހަގަކުރުމަށް ދިވެހި އަންހެން ޑައިވަރުންގެ ކޮމިއުނިޓީ "މޫދު ގޮއްޔެ"އިން ޚާއްސަ ޑައިވް ހަރަކާތެއް ބާއްވައިފިއެވެ. މި ހަރަކާތުގައި ސާޅީސް ދިވެހި އަންހެން ޑައިވަރުންވަނީ ބައިވެރިވެފައެވެ.
"މޫދު ގޮއްޔެ" ކޮމިއުނިޓީއިން ބޭއްވި ޑައިވް ހަރަކާތަކީ "ޕަޑީ ވުމަންސް ޑައިވް ޑޭ" ފާހަގަކުރުމަށް ބޭއްވި ޙަރަކާތެކެވެ. މި ހަރަކާތް ބޭއްވުމުގެ މަޤްސަދަކީ ރާއްޖޭގައި ކުރިއަރަމުންއަންނަ ޑައިވިންގެ ދާއިރާގައި މަސައްކަތް ކުރާ އަންހެން ޑައިވަރުން އެއްތަނަކުން ބައްދަލުވެ، ގުޅުން ބަދަހިކުރުމާއި، އަންހެނުން ބާރުވެރިކުރުވުމެވެ.
އަންހެން ޑައިވަރުންވަނީ މާލެއަތޮޅު މާފުށި ކައިރިން ދެ ސަރަޙައްދަކަށް ޑައިވްކޮށްފައެވެ. އެމީހުން ދިޔައީ މާފުށީ ކައިރިން މިޔަރު ފަރާއި ކުޑަގިރި ރެކް، ސަރަޙައްދަށެވެ. މިޙަރަކާތް އިންތިޒާމްކޮށް، މިއާގުޅޭ ހުރިހައިކަމެއް ކުރިއަށްގެންގޮސްފައިވަނީ ދިވެހި އަންހެނުންނެވެ. ބައިނަލްއަޤްވީ ޑައިވް ޖަމިއްޔާއެއްކަމަށްވާ ޕަޑީގެ ފަރާތުން ރާއްޖޭގައި މަސައްކަތްކުރާ 3 އިންސްޓަކްޓަރުގެ ތެރެއިން 2 އިންސްޓްރަކްޓަރުންނަކީވެސް ދިވެހި އަންހެން ޑައިވަރުންނެވެ.
މި ހަރަކާތުގައި މާލެއާއި މާލެކައިރި ޑައިވްސެންޓަރުތަކާއި އަމިއްލަގޮތުން ބައިވެރިވި ޑައިވަރުންނާއިއެކު ޖުމުލަ 40 ދިވެހި އަންހެން ޑައިވަރުންވަނީ ބައިވެރިވެފައެވެ.
މިހަރަކާތާއި ގުޅޭ މަޢުލޫމާތު ދެއްވަމުން ޕަޑީ އިންސްޓްރަކްޓަރ ޑރ.ޝަމްޢާ އަބްދުއްﷲ ޙަމީދް (އަންނަ) ވިދާޅުވެފައިވަނީ މި ޙަރަކަތަކީ ވަކި ލެވަލްއެއްގެ ޑައިވަރުންނަށް ހިންގި ހަރަކާތެއް ނޫންކަމަށްވެ. އަދި މި ހަރަކާތުގައި ޑައިވަރުންނާއި، ސްނޯކްލް ކުރާ މީހުންނަށް، މޫދު ކުޅިވަރުގެ ދާއިރާގައި މަސައްކަތްކުރާ އަންހެނުންވެސް ބައިވެރިވިކަމަށް އަންނަ ވިދާޅުވިއެވެ. އިނިސްޓްރަކްޓަރ ލެވެލްއިން ފެށިގެން އަލަށް ޑައިވިންގގެ ދާއިރަށްއަށް ވަންނަމުން އަންނަ މީހުންވެސް މީގެތެރޭގައި ހިމެނެއެވެ.
"މިދާއިރާއަށް ގިނަ ކުދިން ނުކުންނަންޖެހޭ. އަލަށް ނިކުންނަ ކުދިންނަށް ޕަޑީން އެބަ ތަމްރީންތައް ދެން. އަދި ވަޒީފާގެ މާޙައުލަށް ނުކުތުމުގައިވެސް ބޮޑެތި އެހީތެރިކަންދެން." އަންނަ ވިދާޅުވިއެވެ.
އަންނަ ވިދާޅުވެފައިވަނީ މިދާއިރާއަށް ޝަޢުގުވެރިވާ އަންހެނުން ކުދިން ތިބިނަމަވެސް ޢާއިލާއާއި މުޖުތަމަޢުގެ ޚިޔާލު މިކަމުގައި ތަފާތުވާތީ ބައެއްކުދިން މިދާއިރާއަށް ނިކުންނަން ފަސެޖެހޭކަމަށެވެ. ނަމަވެސް މިހާރު މިދާއިރާއަށް ޝަޢުގުވެރިވާ، އަދި މަސައްކަތުގެ މައިދާނަށް ނުކުންނަ ކުދިންގެ ޢަދަދުވެސް އިތުރުވަމުންދާކަން އޭނާ ފާހަގަކުރެއްވިއެވެ.
"މީ އަންހެން ކުދިންނަށް ވަރަށް ރަނގަޅަށް ކުރިއެރޭނެ ދާއިރާއެއް. މިއަދުގެ ޑައިވްސް ވަރަށް މަޖާ. ފަރުތަކުގެ ރީތިކަން ބަލާލުމާއި، މުޅި ކޮމިއުނިޓީގެ ގުޅުންވެސްބަދަހިވެގެން ހިނގައްޖެ." ޑައިވް ޙަރަކާތުގެ ބައެއް ބައިވެރިން ފާހަގަކުރިއެވެ.
މި ހަރަކާތް ކުރިއަށް ގެންދިއުމުގެ މަޤްސަދުތަކުގެ ތެރޭގައި، ރާއްޖޭގެ ނާޒުކު ތިމާވެށި ޙިމާޔަތް ކުރުމަށް ބާރުއެޅުމާއި ޕްލާސްޓިކާ ދެކޮޅަށް އަޑުއުފުލުން ހިމެނެއެވެ.
2016ވަނަ އަހަހރުން ފަށައިގެން އަންހެން ޑައިވަރުންގެ ކޮމިއުނިޓީ "މުދު ގޮއްޔެ"އިން އަންނީ މިފަދަ ޑައިވް ޙަރަކާތްތައް ބާއްވަމުންނެވެ. މި ޙަރަތާތް ހަމައެކަނި މާލެ ސަރަޙައްދަށް ޢަމާޒުކޮށްގެން ކުރިއަށްގެންދިޔަ ނަމަވެސް، މިކަން މުޅި ރާއްޖެއަށް ފުޅާކުރުމަކީ "މޫދު ގޮއްޔެ"ގެ ވިސްނުމެކެވެ. އަދި ބައިންލްއަޤްވީ ޑައިވް ހަރަކާތްތަކުގައި ރާއްޖޭގެ އަންހެން ޑައިވަރުންނަށް ބައިވެރިވުުގެ ފުރުސަތު ދިނުމަށް ޕަޑީއާއި ގުޅިގެން އެފަރާތުންދަނީ މަސައްކަތް ކުރަމުުންނެވެ.