ރައްކާތެރިގޮތުގައި ކަނޑު ދަތުރުކުރުމާ ގުޅޭގޮތުން ކެޕްޓަނުން ތަމްރީންކުރުމަށް ޓްރެއިނިންގ ޕްރޮގްރާމެއް ފަށައިފިއެވެ. އެލީއާ އިންވެސްޓްމަންޓުން ކުރިއަށްގެންދާ މިޕްރޮގްރާމުގައި ކެޕްޓަނުންނަށް ކަނޑުމަތީގައި ދިމާވެދާނެ ނުރައްކާތަކާއި ކުއްލި ހާލަތްތަކުގައި އަޅަންޖެހޭ ސަލާމަތީ ފިޔަވަޅުތަކާއި، ފަސްޓް އެއިޑާއި ފަޔާ ފައިޓިންގެ އިތުރުން އައުޓްބޯޑް އިންޖީނާ ބެހޭ ޢާއްމު މަޢުލުމާތުތައް ކިޔާދެވޭނެއެވެ.
"އެލިއާ ބޯޓް އޮޕަރޭޓަރސް ޓްރެއިނިނގް ޕްރޮގްރާމް 2019"އަކީ އެލިއާއިން ބާއްވާ މިފަދަ 6ވަނަ ޕްރޮގްރާމެވެ. ޕްރޮގްރާމް ފަށްޓަވައިދެއްވައި ވާހަކަދައްކަވަމުން އެލިއާގެ މެނޭޖިންގ ޑިރެކްޓަރ އަލާއު ޢަލީ ވިދާޅުވީ ކަނޑު ދަތުރަކީ ރާއްޖޭގެ އެއްތަނުން އަނެއްތަނަށް ދިނުމުގެ މައި ނިޒާމަށްވާއިރު، މިޚިދުމަތް އެންމެ ރާއްކާތެރިގޮތުގައި ދިނުމުގައި އެންމެ ބޮޑީ ކެޕްޓަނުންގެ ޒިންމާކަމަށެވެ.
މި ފަދަ ޕްރޮގްރާމެއް މެދުވެރިކޮށް ކެޕްޓަނުން ތަމްރީން ކުރަން ނިންމާފައިވަނީ އެމީހުންނަކީ، ކަނޑުމަތީގައި ދިމާވާ ހާދިސާގެ ޙާލަތްތަކުގައި އެންމެ ފުރަތަމަ ފިޔަވަޅު އަޅަންޖެހޭ މީހުންކަމަށްވާތީކަމަށެވެ. އަލާއު ވިދާޅުވީ ރައްކާތެރިކަމުގެ އިތުރުން، ކަނޑުތަކުގެ ދުޅަހެޔޮކަމާއި، ކަނޑުތައް ސާފުކޮށް ބޭއްވުމުގައިވެސް ކެޕްޓަނުންގެ ރޯލު މުހިންމުކަމަށެވެ.
"އަހަރަމެންގެ ބޮޑު އާމްދަނީއެއި ގުޅިފައިވަނީ ކަނޑާއި. މަސްވެރިކަން، ފަރުވެރިކަމުން އެންމެ ބޮޑު އާމްދަނީއެއްލިބެނީ. އެހެންވީމަ ކަނޑުތަކުގެ ދުޅަހެޔޮކަން މުހިންމު." އަލާއު ވިދާޅުވިއެވެ.
ޓްރެއިންނިގް ޕްރޮގްރާމް ޝަރަފުވެރި ކޮށްދެއްވައި ވާހަކަފުޅުދައްކަވަމުން އިލެކްޓްރިކަލް އެންޑް މެކޭނިކަލް އިންޖިނިއަރިންގެ ކޮމާންޑިންގ އޮފިސަރ ލެފްޓިނެޓް ކާނަލް ހަސަން ޝާހިދު ވިދާޅުވީ ރާއްޖޭގެ %99 ކަނޑަށްވާއިރު، ކަނޑު ދަތުރުގެ ނިޒާމަކީ އާއްމުންގެ ފުރާނައާއި ވަރަށް ބޮޑަށް ގުޅިފައިވާ ކަމެއް ކަމަށެވެ. އެހެންކަމުން ގަނޫނާއި ގަވައިދުތަކާއި އެއްގޮތައް އުޅަނދުގެ ކަންކަން ބެލެހެއްޓުމާއި، ޢަމަލުތައް ބެހެއްޓުމަށް ސަމާލުކަން ދިނުމަށްވަނީ އެދިފައެވެ.
"އުޅަނދުގެ ސަލާމަތީ ކަންކަން ހަމަކުރަންޖެހޭ. ކަމެއް ދިމާވެއްޖެއްޔާ ދެން ކަންތައް ކުރަންވީގޮތް އިންގެންޖެހޭ. އަދި ކެޕްޓަންގެ ފިޒިކަލް އަދި މެންޓަލް ހެލްތްވެސް ވަރަށް މުހިންމު." ކޮމާންޑިންގ އޮފިސަރ ލެފްޓިނެޓް ކާނަލް ހަސަން ޝާހިދު ވިދާޅުވިއެވެ.
މި ޓްރެއިނިންގ ޕްރޮގްރާމްގައި ދަތުރުފަތުރުގެ ޚިދުމަތްދޭ ކުންފުނިތަކާއި ރިސޯޓްތައް ހިމެނޭހެން 45 ބޯޓް ކެޕްޓަނުން ބައިވެރިވެއެވެ. މި ޕްރޮގްރާމަކީ 3ދުވަހުގެ ޕްރޮގްރާމެކެވެ.