އުތީމުގައި ކަލްޗަރަލް ސެންޓަރު ހެދުމަށް ބޭނުންވާ ކުރެހުންތައްވަނީ ނިމިފައި - ހެރިޓޭޖް މިނިސްޓްރީ
ހއ.އުތީމުގައި އަޅާ ކަލްޗަރަލް ސެންޓަރުގެ ކުރެހުންތަކުގެ މަސައްކަތް ނިމިފައިވާކަމަށް މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖުން ވިދާޅުވެއްޖެއެވެ. ރާއްޖޭގެ އުތުރުގައި ހުރި އާސާރީ ތަންތަން ޙިމާޔަތްކުރުމާއި، ފަންނުވެރިކަން ދިރުވައި އާލާ ކުރުމުގެ މަޝްވަރާތައް ކުރުމަށް ހއ.ގެ ބައެއް ރަށްތަކަށް ހެރިޓޭޖް މިނިސްޓަރ ޔުމްނާ ވަނީ ދަތުރުފުޅެއް ފައްޓަވާފައެވެ. އެގޮތުން މިހާތަނަށް އެކަމަނާ ވަނީ ހއ.ގެ 4 ރަށަށް ޒިޔާރަތް ކުރައްވާފައެވެ.
މިނިސްޓަރ ޔުމްނާ އުތުރަށް ކުރައްވާ ދަތުރުފުޅުގައި ހއ.އުތީމަށާއި، ހޯރަފުއްޓާއި، އިހަވަންދުއާއި، އާސާރު ހިމެނޭ ފަޅު ރަށެއްކަމަށްވާ މަތީރަށްފުޅަށްވެސް ވަނީ ޒިޔާރަތްކުރައްވާފައެވެ. މިނިސްޓަރގެ މި ދަތުރުފުޅަކީވެސް މިރަށްރަށުގައި ހުރި އާސާރީ ތަންތަނަށް ޒިޔާރަތްކޮށް، ތަންތަން ޙިމާޔަތްކުރުމުގެ މަޝްވަރާތައް ކައުންސިލްތަކާއެކު ކުރިއަށްގެންދިއުމަށް ކުރައްވާ ދަތުރުފުޅެވެ.
މި ދަތުރުފުޅުގައި މިނިސްޓަރ ފުރަތަމަ ޒިޔާރަތްކުރަށްވާފައިވަނީ ހއ.އުތީމަށެވެ. އުތީމަށްކުރެއްވި ދަތުރުފުޅުގައި މިނިސްޓަރ ވަނީ އުތީމު ގަނޑުވަރާއި، ދުވަސްވީ މިސްކިތެއްކަމަށްވާ ކަނދުވަލު މިސްކިތާއި، ބޮޑުތަކުރުފާނުގެ ހަނދާނީ މަރުކަޒު ބައްލަވާލައްވާފައެވެ. އަދި ގަނޑުވަރު ބެލެހެއްޓުމުގެ މަސައްކަތްކުރާ ހަނދާނީ މަރުކަޒުގެ މުއައްޒަފުންނާއި، ކައުންސިލްގެ މެންބަރުންނާވެސް ވަނީ ބައްދަލުކުރައްވާފައެވެ.
މި ބައްދަލުވުމުގައި މަޝްވަރާކުރި ކަންތައްތަކުގެ ތެރޭގައި ހަނދާނީ މަރުކާޒުގެ އިމާރާތް ކަލްޗަރަލް ސެންޓަރަކަށް ބަދަލުކުރުމާ ގުޅޭގޮތުންވަނީ ވަނީ މަޢުލޫމާތު ޙިއްސާކޮށްފައެވެ. މިނިސްޓްރީއިން ވިދާޅުވެފައިވަނީ ކަލްޗަރަލްސެންޓަރުގެ ޑިޒައިނާއި ކޮންސެޕްޓް މަސައްކަތް ނިމިފައިވާކަމަށެވެ. ނަމަވެސް ކުރެހުންތައް ފައިނަލް ކުރާނީ ކައުންސިލުގެ ޚިޔާލަށް ބެލުމަށްފަހު ކަމަށް މިނިސްޓްރީއިންވަނީ ވިދާޅުވެފައެވެ. ހަނދާނީ މަރުކަޒަށް ބަދަލުގެންނައިރު ގަނޑުވަރަށް ޒިޔާރަތްކުރާ މީހުުންނަށް ތިބެވޭނެ އެކަމަޑޭޝަން ބްލޮކާއި ފާޙާނާ ބަރި ހެދުމާއި، ދާރުލް އާސާރެއް ހެދުމާއި، ކެފޭއަކާއި ސްވެނިއަރ ފިހާރައެއް ހެދުންވެސް ހިމެނެއެވެ.
މީގެއިތުރުން ގަނޑުވަރުގެ ފުރާޅު ބަދަލުކުރުމާއި ގުޅޭގޮތުންވެސްވަނީ މަޝްވަރާކޮށްފައެވެ.
މި ދަތުރުފުޅުގައި މިނިސްޓަރ ދެން ވަޑައިގެންފައިވަނީ ހޯރަފުއްޓަށެވެ. މިނިސްޓަރ ވަނީ އެރަށުގައި ހުންނަ ކުޑަ މިސްކިތް ބައްލަވާލައްވައި އެތަން ޙިމާޔަތްކުރުމާއި ގުޅޭގޮތުންވަނީ ކައުންސިލާއި މަޝްވަރާކުރައްވާފައެވެ. މީގެއިތުރުން ދުވަސްވީ ލިޔެކިޔުންތައް ދިގުމުއްދަތައް ފެންނާނެހެން ރައްކާތެރި ކުރުމާ ގުޅޭތުން ކައުންސިލުންވަނީ މަޝްވަރާކޮށްފައެވެ.
މިނިސްޓަރގެ މި ދަތުރުފުޅުގައި ދެން ވަޑައިގަތީ އާސާރީ ގިނަ ކަންތައްތަކެއް ހިމެނޭ މަތީރަށްފުޅަށެވެ. މިނިސްޓަރ ވަނީ އެރަށުގައި ހުރި ޒިޔާރަތް ބައްލަވާލައްވާފައެވެ.
މަތީރަށްފުޅަށް ކުރެއްވި ދަތުރުފުޅަށްފަހު މިނިސްޓަރ ދެން ވަޑައިގެންފައިވަނީ ހއ.އިހަވަންދުއަށެވެ. އިހަވަންދުއަށް ވަޑައިގެން އެރަށުގައި ހުރި އާސާރީ ތަންތަން ޙިމާޔަތްކުރުމާއި، ފަންނުވެރިކަން އިތުރުކުރުމާއި ގުޅޭގޮތުންވަނީ މަޝްވަރާކުރައްވާފައެވެ. އެގޮތުން މިރަށްތަކުގައި ރަށަށް ޚާއްސަވެގެން ކުރަމުން އަންނަ މަސައްކަތްތަކާއި މީހުންގެ ދިރިއުޅުމާއި، އާދަކާދައިގެ މަޢުލޫމާތު އެއްކުރުން ހިމެނެއެވެ.
ހެރިޓޭޖް މިނިސްޓްރީއިން ވިދާޅުވީ މިނިސްޓަރ ޔުމްނާގެ މި ދަތުރުފުޅުގައި މިނިސްޓްރީގެ ޓެކްނިިކަލް ޓީމްތަކުންވެސް ބައިވެރިވަމުންދާކަމަށެވެ. އަދި އާސާރީ ތަންތަނުގައި މަރާމާތަށް ބޭނުންވާ މަސައްކަތްތައްވެސް ދެނެގަންނަމުންދާކަމަށެވެ.