ރާއްޖޭގެ އިޤްތިޞާދީ ކަނޑުގެ ސަރަޙައްދަށް ޤަވާޢިދާ ޚިލާފަށް ވަދެއުޅުނު ބޭރުގެ ހަތަރު މަސް ބޯޓު މާލެ ގެނެސްފިއެވެ.
މި ބޯޓުތައް އެމްއެންޑީއެފް ކޯސްޓްގާޑުގެ ބެލުމުގެ ދަށުން ހުޅުމާލެ ބަނދަރަށް ގެނެސްފައިވަނީ މިއަދު ހަވީރު ހަތަރުގަޑި ފަންސާސް ހަތެއް ހާއިރުއެވެ. މިމަސްބޯޓުތައް ކޯސްޓްގާޑް ބެލުމުގެދަށަށް ގެނެސްފައި ވަނީ ވ.ފުލިދޫގެ އިރުން ސަތޭކަ ސާޅީސް ނޯޓިކަލް މޭލު ބޭރުންނެވެ.
މި 4 މަސްބޯޓު ރާއްޖެ ސަރަހަދަށް ވަދެ އުޅެނިކޮށް ފެނިފައިވަނީ މިމަހުގެ ހަތަކުން ނުވަޔަކަށް، އެމްއެންޑީއެފް ކޯސްޓްގާޑާއި، އިންޑިއާގެ ކޯސްޓްގާޑް ގުޅިގެން ކުރިއަށްގެންދިޔަ ޑޯނިއަރ ފްލައިޓްގެ ސަވައިލަންސް ޕެޓްރޯލްގެ ތެރެއިންކަމަށް އެމްއެންއެންޑީއެފުން ވިދާޅުވެއެވެ.
ޤަވާޢިދާ ޚިލާފަށް ރާއްޖޭގެ އިޤްތިޞާދީ ކަނޑުގެ ސަރަޙައްދަށް ވަދެ އުޅުނު މި ހަތަރު މަސް ބޯޓުގެ ތެރެއިން ތިން ބޯޓުގެ ތެރެއިން ކޮންމެ ބޯޓެއްގައި ހަތް މީހުން ތިބިކަމަށާ އެނެއްބޯޓުގައި ހަ މީހުން ތިބިކަމަށް އެމްއެންޑީއެފް އިން މަޢުލޫމާތުދެއްވައެވެ.
ނޫސްވެރިންނަށް މަޢުލޫމާތު ދެއްވަމުން ކޯސްޓް ގާރޑްގެ ޕްރިންސްޕަލް ޑައިރެކްޓަރ ލެފްޓިނެންޓް ކާނަލް މުޙައްމަދު ސަލީމް ވިދާޅުވީ މި ބޯޓުތައް އަތުލައިގަތްފައިވަނީ ސީދާ މަސްވެރިކަން ކުރަން ތިއްބާ ނޫންކަމަށާއި ނަމަވެސް މަސްވެރިކަން ކޮށްފައިވާ ނިޝާންތައް ފެންނަން ހުރިކަމަށެވެ. އަދި އަތުލައިގަތް ބޯޓުތަކުގެ ތެރެއިން ދެ ބޯޓުގެ ތެރެއިން ކޮންމެ ބޯޓެއްގައި ދެ ޓަނެއްހާ މަސް ހުރިކަމަށްވެސް އޭނާ ވިދާޅުވިއެވެ. ކޮސްޓްގާޑުން ބެލިބެލުމުން މިހާތަނަށް ރާއްޖެ އެތެރެކުރުން މަނާ އެއްޗެއް ފެނިފައި ނުވާކަމަށާއި މިކަމުގެ އިތުރު ތަޙްޤީގުތައް ފުލުހުން ކުރާނެކަމަށްވެސް ސަލީމް ވިދާޅުވިއެވެ.
އެމްއެންޑީއެފް އިން ވިދާޅުވީ މިއަދުގެ ވަގުތެއްގައި މޯލްޑިވްސް ޕޮލިސް ސަރވިސްއާ އުޅަނދުތައް ހަވާލުކުރުމުގެ މަސައްކަތް ކުރަމުންދާނެކަމަށެވެ. ބޭރުގެ ޤައުމުތަކާ ގުޅިގެން ކޮންމެ މަހަކު އެއްފަހަރު ޖޮއިންޓް ސަވައިލަންސް އޮޕަރޭޝަންތައް ކުރިއަށް ގެންދާނެކަމަށް އެމްއެންޑީއެފްއިން ވިދާޅުވެއެވެ. އަދި ރާއްޖޭގެ އެއްވެސް ސަރަޙައްދަކުން ރާއްޖެއިން ބޭރުގެ ބޯޓެއް މަސްވެރިކަން ކުރާ ކަމުގެ މަޢުލޫމާތެއް ލިބިއްޖެނަމަ އެކަން އެންގުމަށްވެސް އެމްއެންޑީއެފް އިން އިލްތިމާސް ކުރެއެވެ. މީގެ ކުރިންވެސް ވަނީ ރާއްޖޭގެ ސަރަހަދަށް ޤަވައިދާ ޚިލާފަށް ވަދެއުޅުނު ލަންކާ މަސްބޯޓުތަކެއްވެސް ސިފައިންގެ ބެލުމުގެ ދަށަށް ގެނެސްފައެވެ.