މިއަހަރު ރާއްޖެއިން މީހުން ޙައްޖަށް ގެންދިޔުމަށް އިތުރު 1000 ކޯޓާ ލިބިފައިވާކަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ހާމަކުރައްވައިފިއެވެ. މިކޯޓާގެ ތެރެއިން އެންމެގިނަ ފުރުސަތުތައް ދިނުމަށް ހަމަޖެހިފައިވަނީ ޙައްޖު ކޯޕަރޭޝަނަށް ކަމަށް ޕީއެސްއެމް ނިއުސްއަށް މަޢުލޫމާތުދެއްވަމުން އިސްލާމިކް މިނިސްޓަރ ޑރ.އަޙްމަދު ޒާހިރު ވިދާޅުވިއެވެ. އަދި އިސްލާމިކް މިނިސްޓްރީގެ އަމާޒަކީ މިއަހަރު ޙައްޖަށް މީހުން ގެންދިއުމުގެ ހުއްދަ ދީފައިވާ ކުންފުނިތަކަށް މި ކޯޓާތައް ދިންކަމަށް އިސްލާމިކް މިނިސްޓަރ ޑރ.އަޙްމަދު ޒާހިރު ވިދާޅުވެއެވެ. މަޢުލޫމާތު ލިބިފައިވާގޮތުގައި މިކޯޓާގެ ދަށުން އިތުރު މީހުން ޙައްޖަށް ނުގެންދަން ނިންމާފައިވަނީ ޒަޢީ ޙައްޖު ގްރޫޕުންނެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިހް ވިދާޅުވީ މިއހަރު ރާއްޖެއިން މީހުން ޙައްޖަށް ގެންދިޔުމުގައި ޢަމަލުކުރި ގޮތްތަކާމެދު ރައްޔިތުން ކަންބޮޑުވެ ޝަކުވާ ހުށައެޅިނަމަވެސް މިކަމުގައި ކޮރަޕްޝަނުގެ އެއްވެސް ޢަމަލެއް ނެތްކަން އޭސީސީން ހަމާކުރެއްވި ރިޕޯޓުން ހާމަވާކަމަށެވެ. އެހެންނަމަވެސް ޙައްޖުގެ ކަންކަން ކުރިއަށްގެންދިޔުމުގައި މިހާރަށްވުރެ ބޮޑަށް ދެފުށް ފެންނާނެގޮތަކަށް އެކަން ކުރިއަށްގެންދިޔުމަށް އިސްލާމިކް މިނިސްޓްރީއަށް އަންގަވާފައިވާނެކަމަށް ރައީސް ވިދާޅުވިއެވެ.
ސަޢޫދީ ޢަރަބިއްޔާއިން ކޮންމެ އަހަރަކުވެސް ރާއްޖެއަށް ރަސްމީކޮށްދެނީ 1000 ކޯޓާއެވެ. އަދި ފާއިތުވި އަހަރުތަކުގައި އިތުރު ކޯޓާގެ ގޮތުގައި އިތުރު 1000 ކޯޓާ ސަޢޫދީ ސަރުކާރުން ދަނީ ކޮންމެއަހަރަކުވެސް ދެއްވަމުންނެވެ. އެހެންނަމަވެސް މިކޯޓާ ލިބޭލެއް ލަސްވުމާއެކު ފަހު ވަގުތު މިކޯޓާއަށް ޙައްޖަށް މީހުން ގެންދިއުމަށް ގިނަ ދަތިތަކެއް ފާއިތުވި އަހަރުތަކުގައި ދިމާވިއެވެ.
ދެވަނަ ބުރުގައި ސަޢުދީ ސަރުކާރުގެ ފަރާތުން ކޯޓާ ދެނީ ފުރަތަމަ ބުރުގައި އެކި ސަބަބުތަކާހެދި ޙައްޖަށް ދިޔުމަށް ޤައުމުތަކަށް ދޫކޮށްފައިވާ ކޯޓާއަށް ހަމަވާ ވަރަށްވުރެ މަދުން ޤައުމުތަކުން ޙައްޖަށް މީހުން ދިޔުމަށް ނިންމުމާއެކު ބާކީވާ ކޯޓާތަކުންނެވެ.
މި އަހަރު ރާއްޖެއިން މީހުން ހައްޖަށް ގެންދިޔުމަށް ހުއްދަ ދީފައިވަނީ ޙައްޖު ކޯޕަރޭޝަންގެ އިތުރުން އަމިއްލަ 5 ޖަމާޢަތަކަށެވެ. ހައްޖު ކޯޕަރޭޝަނަށް ދީފައިވަނީ 550 ޖާގައެވެ. ނަމަވެސް މީގެ ތެރެއިން 80 ޖާގަ ވަނީ އިސްލާމިކް މިނިސްޓްރީގެ ބޭނުމަށް ނަގާފައެވެ. ޢަދި ކޮންމެ ޖަމާއަތަކަށް ދީފައިވަނީ 90 ޖާގައެވެ.
މިއަހަރު ރާއްޖެއިން މީހުން ޙައްޖައް ގެންދިއުމަށް 18 ކުންފުންޏަކުން އިސްލާމިކް މިނިސްޓްރީއަށް ޕްރޮޕޯސަލް ހުށައެޅިނަމަވެސް މަޢުލޫމާތު ފުރިހަމަ ނުވެގެން 6 ކުންފުންޏެއްގެ ޕްރޮޕޯސަލް ބާތިލްކޮށްފައިވެއެވެ.
ކުންފުނިތަކުން ހުށަހެޅި ޕްރޮޕޯސަލްތައް އިވެލުއޭޓްކުރުމަށްފަހު ހައްޖައް ގެންދިއުމުގެ ހުއްދަ، ހައްޖު ކޮޕަރޭޝަންގެ އިތުރުން ދެންނެ ދީފައިވަނީ ތަޒްކިއާ ޕްރައިވެޓް ލިމިޓެޑާއި ޒައީމާ ގްރޫޕް ޕްރައިވެޓް ލިމިޓެޑާއި މިނާ ޙައްޖު އެންޑް އުމްރާ ޕްރއިވެޓް ލިމިޓެޑާއި އެކްރޯ ޕްރައިވެޓް ލިމިޓެޑާއި އަލް ހަރަމައިން ޙައްޖު އެންޑް އުމްރާ މޯލްޑިވްސް ޕްރައިވެޓް ލިމިޓެޑެވެ.