ދަޢުލަތުގެ ބެލުމުގެ ދަށުގައި ދިރިއުޅެމުންދިޔަ ދެ ކުއްޖަކު ފަތުރުވެރިކަމާ ގުޅޭ ތަމްރީން ހޯދުމަށް "މައިނަރ ހޮޓެލްސް ގުރޫޕް އެކްސްޕްލޯރަރ" ޕްރޮގްރާމްގައި ބައިވެރިވެއްޖެއެވެެ.
މި ޕްރޮގްރާމްގައި ބައިވެރިވެފައިވަނީ ކުޑަކުދިންގެ ހިޔާގައި ދިރިއުޅެމުން ދިޔަ ދެކުދިންނެވެ. އެއް އަހަރު ދުވަހުގެ މުއްދަތަކަށް ކުރިއަށް ގެންދާ މިޕްރޮގްރާމް ފުރިހަމަކުރުމަށް ހަމަޖެހިފައިވަނީ މައިނަރ ހޮޓެލްސް ގްރޫޕްގެ ފަރާތުން ރާއްޖޭގައި ހިންގަމުންދާ އަނަންތަރާ މޯލްޑިވްސްގައެވެ. މިޕްރޮގްރާމް ފުރިހަމަކުރާ ބައިވެރިންނަށް މައިނަރ ހޮޓެލްސް ގުރޫޕްގެ ފަރާތުން ހޮސްޕިޓަލިޓީ ދާއިރާގެ ލެވެލް ތިނެއްގެ ސެޓްފިކެޓެއް ދިނުމަށް ހަމަޖެހިފައިވާކަމަށް ޖެންޑަރ މިނިސްޓްރީން ވިދާޅުވެއެވެ. މި ޕްރޮގްރާމްގައި ރިސޯޓުގެ އެކި ދާއިރާތަކުގައި ޢަމަލީގޮތުން މަސައްކަތް ތަޖުރިބާކުރުމާއި އޮންލައިން ކްލާސްތަކުގައި ކިޔެވުމުގެ ފުރުޞަތު ލިބެއެވެ.
މި ޕްރޮގްރާމް އިފްތިތާޙްކުރުމުގެ ގޮތުން ހޮޓެލް ޖެންގައި ބޭއްވި ރަސްމިއްޔާތުގައި ވާހަކަފުޅުދައްކަވަމުން ޖެންޑަރ މިނިސްޓަރ ޝިދާތާ ޝަރީފް ވިދާޅުވެފައިވަނީ އަންނަތަރާ މޯލްޑިވްސްގެ ފަރާތުން ރާއްޖެއަށް ލިބިގެންދަނީ އިޤްތިޞާދީ ފައިދާ އެކަނި ނޫންކަމަށާ، އިޖްތިމާޢީ ގޮތުންވެސް ގިނަ ފައިދާތަކެއް ކުރަމުންދާކަމަށެވެ. އެގޮތުން މިޕްރޮގްރާމަކީ މިފަދަ މުހިއްމު އެއް ޕްރޮގްރާމްކަމަށާއި މިއީ ހޮސްޕިޓަލިޓީ އަދި ޓުއަރިޒަމްގެ ދާއިރާއަށް ޝައުގުވެރިކަން ހުންނަ ދައުލަތުގެ ބެލުމުގެ ދަށުގައި ދިރިއުޅޭ ކުދިންގެ މުސްތަޤްބަލު ބިނާކުރުމަށް ލިބިގެންދާ މުހިއްމު ފުރުޞަތެއް ކަމަށެވެ. މައިނަރ ހޮޓެލްސް ގުރޫޕް އެކްސްޕްލޯރަރ ޕްރޮގްރާމްގައި މީގެ ކުރިންވެސް ކުޑަކުދިންގެ ހިޔާގެ ކުއްޖަކު ބައިވެރިވެ ވަނީ ގުރެޖުއޭޓް ވެފައެވެ.
ދައުލަތުގެ ބެލުމުގެ ދަށުގައި ދިރިއުޅޭ ކުޑަކުދިން ވަޒީފާގެ މާހައުލަށް ނުކުތުމަށް ކުންފުނިތަކާއި އެކި މުއައްސަސާތަކާއ ގުޅިގެން ޖެންޑަރ މިނިސްޓްރީގެ ފަރާތުން އަންނަނީ އެކި ފުރުޞަތުތައް ތަނަވަސްކޮށްދެއްވަމުންނެވެ.