ވެލާނާ އިންޓަރނޭޝަނަލް އެއަރޕޯޓުގެ ހުޅަނގު ފަރާތުގައި ތަރައްޤީކުރާ ވެސްޓް އޭޕްރަންގެ ފުރަތަމަ ބައިގެ މަސައްކަތް ނިންމާ ފްލައިޓް އޮޕަރޭޝަން ޓެސްޓު ކޮށްފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑުން ބުނީ އޭޕްރަންގައި މިމަހުގެ 26 ވަނަ ދުވަހު ކާމިޔާބުކަމާއެކު ޓެސްޓްކޯށްފައިވާކަމަށެވެ. އެ ކުންފުނިން އައި.ސީ.އޭ.އޯ ސޭފްޓީ ރިކުއަރމެންޓްސްއަށް ފެތޭނެހެން އޭޕްރަންގެ ގްރައުންޑް ހޭންޑްލިން އިކުއިޕްމަންޓްތައްވެސް ޓެސްޓްކޮށްފައިވާކަމަށެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމް.އޭ.ސީ.އެލުން ބުނީ ޕޭވްމަންޓާއި ޓެކްސީލޭން ހިމެނޭހެން ފަރުމާކޮށްފައިވާ މި އޭޕްރަންގައި ކޯޑް-އީ މަރުކާގެ 5 އެއަރކްރާފްޓާއި، ކޯޑް-ސީ މަރުކާގެ 7 އެއަރކްރާފްޓް ހިމެނޭހެން ޖުމްލަ 12 އެއަރކްރާފްޓު ޕާކުކުރެވޭނެ ކަމަށެވެ.
އެއަރޕޯޓުގެ ވެސްޓް އޭޕްރަންގެ މަސައްކަތް ކުރުމަށް ހަމަޖެހިފައިވަނީ މައިގަނޑު ތިން ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ މަސައްކަތް އެއްކޮށް ނިންމާލާފައިވާއިރު، ދެވަނަ ފިޔަވަހީގެ ދަށުން މިހާރުވެސް އެއަރކްރާފްޓްތައް ޕާކުކުރާ ސަރަޙައްދާއި، ޑޮމެސްޓިކް ޓަރމިނަލް ސަރަޙައްދު ހިމެނޭހެން ޕާކިން ސްޕޭސް އިތުރު ކުރުމަށް ވަނީ ހަމަޖެހިފައެވެ.
ވޭލާނާ އިންޓަރނޭޝަނަލް އެއަރޕޯޓުގެ ވެސްޓް އޭޕްރަން ބޮޑުކުރުމުގެ މަސައްކަތް އެމް.އޭ.ސީ.އެލުން ފަށާފައިވަނީ މިދިޔަ އަހަރުގެ ޖެނުއަރީމަހުގެ ތެރޭގައެވެ. މި މަސައްކަތްވެސް ކުރަމުންދަނީ އެއަރޕޯޓުގެ އައު ރަންވޭގެ މަސައްކަތްކޮށްފައިވާ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއިންނެވެ.
ވީ.އައި.އޭއަށް ދިމާވެފައިވާ ޖާގައިގެ ދަތިކަން ހައްލުކުރުމަށްޓަކާ އަލަށް ތަރައްޤީކުރާ ވެސްޓް އޭޕްރަންއަކީ ގާތްގަނޑަކަށް 70 ހާސް އަކަމީޓަރުގެ ޖާގައިގެ އޭޕްރަނެކެވެ. ވެސްޓް އޭޕްރަންގެ ފުރަތަމަ ބައިގެ މަސައްކަތް އެއްކޮށް ނިންމާލާފައިވާއިރު، އެއަރޕޯޓުގައި މީގެ ކުރިންވެސް ވަނީ ނޯތް އޭޕްރެނެއް ހަދާފައެވެ.
އެމްއޭސީއެލްއިން ބުނީ މިހާރު އިންތިޒާރުކުރަމުންދަނީ މޯލްޑިވްސް ސިވިލް އޭވިއޭޝަނާއި ޑިރެކްޓަރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަންގެ ފަރާތުން އޭޕްރަންގައި އޮޕަރޭޝަންތައް ހިންގުމުގެ ފައިނަލް ސެޓިފިކޭޝަން ލިބެންދެން ކަމަށެވެ.