މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ ވިޔަފާރީތަކަށް މި އަހަރުގެ މިހާތަނަށް ބޮޑު ކުރިއެރުންތަކެއް ލިބިފައިވާކަމަށް އެ ކުންފުނިން ބުނެފިއެވެ.
އެމްޓީސީސީގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމެއްގައި އެ ކުންފުނީގެ ހެޑް އޮފް ޑިޕާޓްމަންޓް، ޓްރޭޑިންގް، އިސްމާއިލް އަދްހަމް ވިދާޅުވީ އެ ކުންފުނިން ކުރިއަށްގެންދާ ޕްރޮމޯޝަންތަކަށް ޢާއްމުންގެ ބޮޑު ތަރުޙީބެއް ލިބެމުންދާކަމަށެވެ.
"މި ޖޫންމަހާ ހަމައަށްވެސް ޓާގެޓްކުރި ވަރަށްވުރެ ބޮޑަށް އެޗީވްވެފަ ހުރީ، އަދި ލަފާކޮށްފަ ހުރިގޮަތަށް ވިޔަފާރީގެ ކަންތައްތައް ކުރިއަށްދާނެކަމަށް ބެލެވޭ،" އަދްހަމް ވިދާޅުވިއެވެ.
އެމްޓީސީސީން ދަނީ ފުޅާ ދާއިރާއެއްގައި އޮޑިދޯނި ފަހަރުގައި އަޅާ އިންޖީން ރާއްޖެ ގެނެސް ވިއްކަމުންނެވެ. ޔަންމާ އިންޖީނުތައް މަރާމާތުކުރުމަށް އެމްޓީސީސީން ދާދިފަހުން ކުރިއަށްގެންދިޔަ ޔަންމާ ސާރވިސް ކެމްޕެއިނަށް ބޮޑު ތަރުޙީބެއް ލިބުނުކަމަށާއި، އެގޮތުން ކެމްޕެއިން ނިމުނުއިރު 52 އޮޑިދޯނި ފަހަރަށް ސަރވިސް ދެވިފައިވާކަމަށް އަދްހަމް ފާހަގަކުރެއްވިއެވެ.