ރަޢީސުލްޖުމްހޫރިއްޔާގެ ނާއިބު ފައިސަލް ނަސީމް ހއ.މާރަންދުއާއި އިހަވަންދުއަށް ވަޑައިގެންފިއެވެ.
ނާއިބް ރައީސް މި ދެރަށަށް ވަޑައިގެންފައިވަނީ ރަށްރަށުގެ ހާލަތު ބައްލަވާލެއްވުމަށް ހއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ. މި ދަތުރުފުޅުގައި ނާއިބް ރައިސް ވަނީ މާރަންދޫ ކައުންސިލާއި ބައްދަލުކުރައްވައި، އެ ރަށަށް ދިމާވެފައިވާ ދަތިތަކާއި މިވަގުތަށް އެންމެ ބޮޑަށް ބޭނުންވެފައިވާ ކަންކަމާއި ރައްޔިތުންގެ ހުރި ޝަކުވާތައް އޮޅުންފިލުއްވާފައެވެ.
ރަށު ކައުންސިލިންގެ އިތުރުން، މާރަންދޫ ސިއްޙީ މަރުކަޒާއި، އިންޖީނުގެއާއި، ސްކޫލަށްވެސް ނާއިބް ރައީސް ވަނީ ޒިޔާރަތްކުރައްވާފައެވެ. އަދި މި ތަންތަނުގެ މުޢައްޒަފުންނާއި ބައްދަލު ކުރައްވައި، ހުރި ދަތިތައްވެސް އެމަނިކުފާނު ވަނީ އޮޅުންފިލުއްވަވާފައެވެ.
މި ދަތުރުފުޅުގައި ނާއިބް ރައީސް ވަނީ މިހާތަނަށް ހއ.މޮޅަދުއާއި، ހއ.އުލިގަމާއި، ހއ.ތުރާކުނާއި، ހއ.ހޯރަފުއްޓަށް ޒިޔާރަށްކުރައްވައި، ކައުންސިލްތަކާއި އެރަށްރަށުގައި ހުރި އެކި މުއައްސަސާތަކަށް ޒިޔާރަތްކުރައްވައި މުއައްޒަފުންނާއި ބައްދަލުކުރައްވާފައިވެއެވެ.
މީގެއިތުރުން ހޯރަފުށީ ސްޕީޑް ފެރީގެ ނިޒާމް އިފްތިތާޙްކޮށްދެއްވުމާއި، ހޯރަފުށި އެއަރޕޯޓް ސަރަޙައްދު ފެހިކުރުމަށް 500ގަސް އިންދުމުގެ ޕްރޮގްރާމްވެސް ނާއިބް ރައީސް ވަނީ އިފްތިތާހުކޮށްދެއްވާފައެވެ.
ނާއިބް ރައީސް ހއ. އަތޮޅަށް ކުރައްވާ ދަތުރުފުޅުގައި މިއަދު ދެން ވަޑައިގެންނެވުމަށް ހަމަޖެހިފައިވަނީ އިހަވަންދުއަށެވެ. މި ދަތުރުފުޅުގައި އެރަށުގެ މުޢައްސަސާތަކާއި ބައްދަލު ކުރެއްވުމުގެ އިތުރުން، އިހަވަންދޫ ސްޕީޑް ފެރީގެ ނިޒާމުވެސް ނާއިބް ރައީސް އިފްތިތާޙް ކޮށްދެއްވާނެއެވެ.