ފަނޑިޔާރު އަލްއުސްތާޛު ޢަބްދުﷲ ދީދީ ޖޭއެސްސީއަށް ގޮންޖެއްސެވި މައްސަލަ ތަހްޤީޤުކުރުމަށް ޖުޑީޝަލް ސަރވިސްކޮމިޝަން ޖޭއެސްސީން ކޮމިޓީއެއް އެކުލަވާލައިފިއެވެ.
މިމައްސަލާގައި ފަނޑިޔާރު ޢަބްދުﷲ ދީދީ މިރޭވަނީ ޖޭއެސްސީއަށް ޙާޒިރުވެސްކޮށްފައެވެ. އޭނާ ޙާޒިރުކުރި ބައްދަލުވުމަށްފަހު ޖޭއެސްސީން ހާމަކުރެއްވިގޮތުގައި ފަނޑިޔާރު ޢަބްދުﷲ ދީދީ ރިޝްވަތު ނަންގަވާފައިވާކަމަށް ތުހުމަތުކުރައްވާ ރައްޔިތުންގެ މަޖިލީހުގެ ރައީސް ހުށަހަޅުއްވާފައިވާ މައްސަލައާއި ފަނޑިޔާރު ދީދީ މަޤާމުގެ ނުފޫޒު ބޭނުންކޮށްގެން ނާޖާއިޒް މަންފާތަކެއް ޙާޞިލްކުރެއްވުމަށް މަސައްކަތް ކުރެއްވިކަމަށް ތުހުމަތުކުރެވޭ މައްސަލަ ތަޙްޤީޤުކުރަމުންދާކަމުގެ މަޢުލޫމާތު މޯލްޑިވްސް ޕޮލިސް ސަރވިސްއިން މިމަހުގެ 12ވަނަދުވަހު ސިޓީއަކުން އަންގާފައިވާކަމަށެވެ.
މިކަމާ ގުޅިގެން މިމަހުގެ 12ވަނަ ދުވަހު ފަނޑިޔާރު ދީދީ މަސްޢޫލިއްޔަތުތަކާއި ވާޖިބުތަކުން އެކަހެރިކޮށް ބެހެއްޓުމަށް ޖޭއެސްސީން ނިންމާފައިވަނިކޮށް، އެ ނިންމުމަށް ގޮންޖައްސަވައި އޭނާ މަސައްކަތަށް ނިކުންނެވި ނިކުންނެވުމަކީ އެކަމުގައި އޭނާގެ ސުލޫކީ މައްސަލައެއް އޮތްކަމެއް ބެލެވޭކަމަށެވެ. އެހެންކަމުން މިމައްސަލަ ތަޙްޤީޤުކުރުމަށް ޖޭއެސްސީންވަނީ ވަކި ކޮމިޓީއެއް އެކުލަވާލާފައިކަމަށް އެކޮމިޝަނުން ހާމަކުރައްވައެވެ.
މިކޮމިޓީ އެކުލަވާލާނީ ޖޭއެސްސީގެ ހުރިހާ މެންބަރުން ހިމެނޭގޮތަށްކަމަށް ހުށަހެޅުމެއް އެކޮމިޝަނަށް ހުށަހެޅުނުކަމަށާ، އެހެންނަމަވެސް އެކޮމިޝަނުގެ މެމްބަރުންގެތެރެއިން ތިން މެންބަރަކު އެކަމަށް ތަނާޒުލުވުމާ ގުޅިގެން ކޮމިޓީ އެކުލަވާލީ އެ ތިން މެމްބަރުން ނުހިމަނާކަމަށްވެސް ޖޭއެސްސީން ވިދާޅުވެއެވެ.
ތަނާޒުލުވި މެމްބަރުން
- ކޮމިޝަނުގެ ރައީސް އަލްއުސްތާޛު ޢަބްދުﷲ ޢަރީފް
- ކޮމިޝަނުގެ މެންބަރު އަލްއުސްތާޛު ޢަބްދުލްޙަންނާން އަޙްމަދު
- ކޮމިޝަނުގެ މެންބަރު އަލްއުސްތާޛާ ލަޠީފާ ޤާސިމް
މި ކޮމިޓީން މިހާރުދަނީ މިމައްސަލަ ތަޙްޤީޤްކުރުމުގެ މަސައްކަތް ކުރަމުންކަމަށާ، އަދި މިރޭ 23:30 ގައި ފަނޑިޔާރު ޢަބްދުﷲ ދީދީގެ ބަޔާން ނެގުމަށް އޭނާ އެކޮމިޓީއަށް ހާޟިރުކޮށްފައި ވާކަމަށްވެސް ޖޭއެސްސީން ވިދާޅުވެއެވެ.
އިތުރަށް ވިދާޅުވުމަށް
މިރޭ ޖޭއެސްސީއަށް ޙާޒިރުވެވަޑައިގަތުމަށްފަހު ފަނޑިޔާރު ދީދީގެ ވަކީލުން ވިދާޅުވީ ޖޭއެސްސީން ބަލަމުންދާ މައްސަލާގައި ފަނޑިޔާރު ދީދީ އެކޮމިޝަނަށް އެއްބާރުލުން ދެއްވާނެކަމަށެވެ. މައްސަލަ ބަލަމުންދާ ދުވަސްވަރު ރަށުން ބޭރަށް ދާންޖެހިއްޖެނަމަ އެކަންވެސް ކޮމިޝަނަށް އަންގާނެކަމަށާ، އަދި ޢާއްމުކޮށް ހުޅުވާލައިގެން އެމައްސަލަ ކުރިއަށް ގެންދިއުމަށް އޭނާ އެދިވަޑައިގަންނަވާކަމަށްވެސް ވަކީލުން ވިދާޅުވިއެވެ.