މޯލްޑިވްސް ޕާޓްނަރޝިޕް ފޯރަމްގައި ބައިވެރިވެވަޑައިގަތް ބޭރުގެ ތިން ޢިއްޒަތްތެރިއަކު ރައީސުލްޖުމްހޫރިއްޔާ އިބްރާހީމް މިުޙައްމަދު ޞާލިޙްގެ އަރިހަށް އިޙްތިރާމުގެ ޒިޔާރަތެއްކުރައްވައިފިއެވެ.
ކުރުނބާ މޯލްޑިވްސް ގައި މިއަދު ވަކިވަކިން ބޭއްވެވި މި ބައްދަލުކުރެއްވުންތަކުގައި، ސަރބިއާގެ މިނިސްޓަރ އޮފް ލޭބަރ، އެމްޕްލޮއިމަންޓް، ވެޓަރަން އެންޑް ސޯޝަލް އެފެއާޒް، ޒޯރަން ޖޯޖަރވިޗާއި ޔޫ.އެން.ޑީ.ޕީގެ އދ.ގެ އެސިސްޓެންޓް ސެކްރެޓަރީ ޖެނެރަލް މިސްޓަރ ހައުލެންގް ޒޫ އަދި ޔޫއެންއޯޕީއެސްގެ އދ.ގެ އެސިސްޓެންޓް ސެކްރެޓަރީ ޖެނެރަލް މިސްޓަރ ވިޓާލީ ވެންޝެބޮއިމް ވަނީ ރައީސުލްޖުމްހޫރިއްޔާއާ ބައްދަލުކުރައްވާފައެވެ.
ސާބިއާގެ މިނިސްޓަރ އޮފް ލޭބަރ، އެމްޕްލޮއިމަންޓް، ވެޓަރަން އެންޑް ސޯޝަލް އެފެއާޒާއެކު ރައީސުލްޖުމްހޫރިއްޔާ ބޭއްވެވި ބައްދަލުކުރެއްވުމުގައި ރާއްޖޭގެ މަސައްކަތްތެރިންގެ ޙައްޤުތައް ކަށަވަރުކުރުމަކީ އެމަނިކުފާނު ވަރަށްބޮޑު އިސްކަމެއް ދެއްވާ ކަމެއްކަމަށާއި ރާއްޖޭގެ މަސައްކަތްތެރިންގެ ވެލްފެއާރގެ ކަންކަމަކީ ވެސް އެހާމެ މުހިންމުކަން ދެއްވާ ކަމެއްކަމުގައި ވިދާޅުވިއެވެ.
އަދި އދ.ގެ އެސިސްޓެންޓް ސެކްރެޓަރީ ޖެނެރަލް، ހައުލެންގް ޒޫއާއެކު ރައީސުލްޖުމްހޫރިއްޔާ ބޭއްވެވި ބައްދަލުވުމުގައި ޔޫ.އެން.ޑީޕީން ރާއްޖޭގައި ކުރިޔަށްގެންދަވާ މަސައްކަތްތައް ފާހަގަކުރައްވައި އެމަސައްކަތްތަކުން ރާއްޖޭގެ އިޤްތިޞާދީ އަދި އިޖްތިމާޢީ ކުރިއެރުމަށް އިތުރުބާރެއް ލިބިގެންދާކަމަށް ވިދާޅުވިއެވެ. ޔޫ.އެން.އޯ.ޕީ.އެސްގެ އދ.ގެ އެސިސްޓެންޓް ސެކްރެޓަރީ ޖެނެރަލް މިސްޓަރ ވިޓާލީ ވެންޝެބޮއިމާއެކު ރައީސުލްޖުމްހޫރިއްޔާ ބޭއްވެވި ބައްދަލުވުމުގައި ޔޫ.އެން.އޯ.ޕީ.އެސްގެ ފަރާތުން ރާއްޖެއަށް ދެއްވާ އެހީތެރިކަން ފާހަގަކުރެއްވިއެވެ. އަދި ޚާއްޞަކޮށް ފެނުގެ ރައްކާތެރިކަމާބެހޭ ދާއިރާއިން ރާއްޖެއަށް އެ ޖަމާޢަތުން ވެދޭ އެހީތެރިކަން ރައީސުލްޖުމްހޫރިއްޔާގެ ވާހަކަފުޅުގައި ފާހަގަކުރެއްވިއެވެ.