ތަޅަމުން ދިޔަ އިމާރާތަކުން ވެއްޓުނު ކޮންކްރީޓް ގަނޑަކުންޖެހި ޖެހިގެން ހުރި ގެއެއް ހަލާކުވެ ގެއްލުންތަކެއް ލިބިއްޖެއެވެ.
ފުލުހުން ބުނީ މިއަދު ހަވީރު ހިނގި މި ހާދިސާގައި ގެއްލުންވެފައިވަނީ މ ސަމަންދަރުގެއަށެވެ. މިއަދު 17:45 އެހާކަންހާއިރު ހިނގި މި ހާދިސާގައި އެއްވެސް މީހަކަށް ގެއްލުމެއް ލިބިފައިނުވާކަމަށް ފުލުހުން ބުނެއެވެ.
ފުލުހުން ބުނީ މ ގުލްބަހާރުގެ އިމާރާތް ތަޅަމުންދަނިކޮށް ވެއްޓުނު ކޮންކްރީޓް ގަނޑުން ޖެހި އެ އިމާރާތާޖެހިގެން ހުރި މ ސަމަންދަރުގޭގެ ދެވަނަ ފަންގިފިލާއިން ބައެެއް ހަލާކުވެ ވެއްޓިފައިވާކަމަށެވެ.
މި ހާދިސާގައި މީހަކަށް ގެއްލުން ނުވިނަމަވެސް ފާރު ތަޅައިގެން ގޮސް ވެއްޓިފައިވަނީ އެނދެއްގެ މައްޗަށެވެ. މި މައްސަލައިގެ މައުލޫމާތު ސިޓީ ކައުންސިލަށް ހިއްސާކޮށްފައިވާކަމަށްވެސް ފުލުހުން ބުނެއެވެ.
ފަހަކަށް އައިސް އުސް އިމާރާތްތަކުންނާއި ހަދަމުންދާ އިމާރާތްތަކުން ބައެއް ތަކެތި ވެއްޓި މަގުމަތިން ދަތުރުކުރި ބައެއް މީހުން ޒަހަމްވެފައިވެއެވެ.
ހަދަމުން ދިޔަ އިމާރާތެއްގެމަތިން ވެއްޓުނި ސިމެންތި ބަސްތާތަކުންޖެހި މިއަހަރު ކުރީކޮޅު ވަނި އުމުރުން 9 އަހަރުގެ ކުއްޖަކު މަރުވެފައެވެ.