ތިން ކިލޯގެ މަސްތުވާތަކެއްޗާއިއެކު އިއްޔެރޭ ހައްޔަރުކުރި 2 މީހުން ދެވަނަ ފަހަރަށް ހައްޔަރުކުރުމުންވެސް ޖިނާއީ އިޖުރާއަތުގެ ގާނޫނުގައި ބުނާ ކަމެއް ފުލުހުން ފުރިހަމަކޮށްފައި ނުވާ ކަމަށް ބުނެ ކޯޓުން އެމީހުން މިނިވަންކޮށްފިއެވެ.
ހުޅުމާލޭގެ ގެއެއްގެ ތެރެއިން 3 ކިލޯގެ މަސްތުވާތަކެއްޗާއެކު މިދިޔަ ހޯމަ ދުވަހުގެ ރޭ ދެ މީހަކު ހައްޔަރުކުރީ ހުޅުމާލެ ކޯޓްގެ އަމުރެއްގެ ދަށުންނެވެ. މި މައްސަލާގައި ހައްޔަރުކޮށްފައިވަނީ އުމުރުން 25 އަހަރުގެ ފިރިހެންނަކާއި 52 އަހަރުގެ އަންހެންނެކެވެ. އެނގިފައިވާ ގޮތުގައި މި ދެމީހުންނަކީ މަންމައަކާއި ދަރިއެކެވެ.
މި ދެމީހުންގެ ބަންދުގެ މުއްދަތު ޖެހުމަށް އިއްޔެ ކުރިމިނަލްކޯޓަށް ހާޒިރުކުރުމުން މި ދެމީހުންވެސް ވަނީ ދޫކޮށްލާފައެވެ. އެމީހުން ކުރިމިނަލްކޯޓުން ދޫކޮށްލީ ހުޅުމާލޭ ކޯޓުން ނެރުނު އަމުރުގައި އެއް ސޮޕްހާ ފިޔަވާ އެހެން ސޮފްހާތަކުގައި އަމުރު ނެރުނު ފަނޑިޔާރުގެ ސޮއި ނެތުމުން ޖިނާއީ އިޖުރާއަތުގެ ގާނޫނުގައި ބުނާ ކޯޓު އަމުރެއްގެ ޝަރުތުތައް ފުރިހަމަވެފައި ނެތުމުންކަމަށް ބުނެއެވެ.
އެ ދެމީހުން ދޫކޮށްލިތާ 12 ވަރަކަށް ގަޑިއިރު ފަހުން ރޭ ދަންވަރު 3:15 އެހާކަންހާއިރު ފުލުހުން ވަނީ އަނެއްކާވެސް އެ ދެމީހުން ހައްޔަރުކޮށްފައެވެ. މި ފަހަރުވެސް އެމީހުން ހައްޔަރުކުރީ ހުޅުމާލޭ ކޯޓްގެ އަމުރެއްގެ ދަށުންނެވެ. އެހެންނަމަވެސް ބަންދުގެ މުއްދަތަށް މި ދެމީހުން މިއަދު ކޯޓަށް ހާޒިރުކުރުމުން އަނެއްކާވެސް ދޫކޮށްލިއެވެ. ޖިނާއީ އިޖުރާއަތުގެ ޤާނުނުގައި ބުނާ ކަމެއް ފުލުހުން ފުރިހަމަކޮށްފައި ނުވާކަމަށް ބުނެ މި ފަހަރު އެމީހުން ދޫކޮށްލީ އެމީހުން ހައްޔަރުކުރުމުގެ އަމުރުނެރުނު ހުޅުމާލޭ ކޯޓުންނެވެ.
ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަނުން މިއަދު ވިދާޅުވީ، އެ ދެމީހުން ދޫކޮށްލާފައި ވަނީ، ޝަރީޢަތްކުރުމާއިބެހޭ ޖިނާޢީ ޢިޖުރާޢަތުގެ ޤަވާޢިދުގެ 8 ވަނަ މާއްދާގެ "ހ" ގައި ބުނެފައިވާ ކަންކަން ފުރިހަމަ ނުވާތީކަމަށެވެ. އެ މާއްދާގައި ބުނެފއިވަނީ ބަންދާ މެދު ގޮތެއް ނިންމަން ހުށަހަޅަން ޖެހޭނީ އެ މައްސަލަ ތަހުގީގު ކުރުމަށް ހަވާލުވެ ހުރި ފަރާތް ކަމަށާއި އެ މީހަކު ކޯޓަށް ހާޒިރުވުމަށް އުޒުރުވެރިވާނަމަ، ޤާނޫނު ތަންފީޒުކުރާ އިދާރާގެ ރަސްމީ ލިޔުމަކާއެކު، ބަދަލުގައި އެ އިދާރާގެ އެހެން ފަރާތަކަށް ކޯޓަށް ހާޒިރު ވެވިދާނެކަމަށެވެ. އެހެންކަމުން މި ދެމީހުން ދޫކޮށްލާފައިވަނީ އެ މައްސަލަ ތަހުގީގުކުރުމުން ދިޔަ އޮފިސަރުގެ ބަދަލުގައި އެހެން އޮފިސަރަކު ހާޒިރުވުމުންނެވެ.
ފުލުހުން މި ދެ މީހުން ހައްޔަރުކޮށްފައިވަނީ މަސްތުވާތަކެތީގެ ވިޔަފާރި ކުރާކަމަށް ފުލުހުންގެ އިންޓެލިޖެންސަށް ލިބުނު މަޢުލޫމާތަކާ ގުޅިގެން. އެމީހުން ދިރިއުޅޭގެ ބަލައި ފާސްކުރުމުގެ ތެރޭގައި ފުލުހުން ވަނީ 3 ކިލޯގެ މަސްތުވާތަކެތި ހޯދާފައެވެ.
މަސްތުވާތަކެއްޗާއެކު ހުޅުމާލެއިން 2 މީހަކު ހައްޔަރުކޮށްފައިވާއިރު، ހޯމަ ދުވަހު ފުލުހުން ވަނީ މާލޭގައި ފުޅާ ދާއިރާގައި މަސްތުވާތަކެތީގެ ވިޔަފާރި ކުރަމުންދިޔަ ގެއަކުން 11 މީހަކު ހައްޔަރުކޮށްފައެވެ.