ދިވެހިރާއްޖޭގައި ސްޓޭޓް އޮފް އިމަޖެންސީ އިޢުލާންކޮށްފަވާކަމަށާ، މާލެއަތޮޅު މާފުށީގައި މުޒާހަރާ ކުރަމުންދާކަމަށް ބުނެ އެމެރިކާ ސަރުކާރުން މިއަދު ނެރުނު ޓްރެވަލް އެޑްވައިޒަރީއަކީ ނުބައި މަޢުލޫމާތުތަކެއްގެ މައްޗަށް ބިނާކޮށް އޮޅުމަކުން ނެރެވުނު އެއްޗެއްކަމަށް އެމެރިކާ އެމްބަސީން ވިދާޅުވެފައިވާކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ ޝާހިދު ކުރައްވާފައިވާ ޓުވީޓެއްގައި ވިދާޅުވެފައިވަނީ ރާއްޖެއަށް ދަތުރު ނުކުރުމަށް އަންގައި އެމެރިކާއިން ނެރުނު ޓްރެވަލް އެޑްވައިޒަރީއަކީ އޮޅުމަކުން ނެރެވުނު އެއްޗަކަށްވާތީ އެކަން ރަނގަޅުކުރުމުގެ މަސައްކަތް މިހާރު އެޤައުމުގެ ސަރުކާރުން ކުރަމުންދާކަމަށް އެމެރިކާ އެމްބަސީން ވިދާޅުވާކަމަށެވެ.
އެމެރިކާ ސަރކާރުން ނެރުނު އެޑްވައިޒަރީގައިވަނީ ރާއްޖެއަށް ޓެރަރިސްޓު ހަމަލާއެއް ދިނުން ގާތްކަމަށާ، ރާއްޖެއަށް ދަތުރުކުރުމުގައި ސަލާލުކަން ދޭން ޖެހޭކަމަށެވެ. އެމެރިކާގެ ސްޓޭޓް ޑިޕާޓްމަންޓުން މިއަދު ނެރުނު މި އެޑްވައިޒަރީއަކީ "ލެވެލް 2" ޓްރެވަލް އެޑްވައިޒަރީއެކެވެ.