ތަފާތު ބަލިތަކާ ގުޅޭ މަޢުލޫމާތުތައް ހިމަނައި އާއްމުން އެފަދަ ބަލިތަކަށް ހޭލުންތެރިކުރުމުގެ ގޮތުން "ދޯދި" ނަމުގައި މަޖައްލާއެއް އިފްތިތާޙްކޮށްފިއެވެ.
ޑައިބެޓީސް ސޮސައިޓީ އޮފް މޯލްޑިވްސްއަށް 19 އަހަރު ފުރުމާ ގުޅިގެން ބޭއްވި ރަސްމިއްޔާތުގައި މި މަޖައްލާ އިފްތިތާޙްކޮށްދެއްވީ ހަޔަރ އެޑިއުކޭޝަން މިނިސްޓަރ ޑރ.އިބްރާޙިމް ޙަސަންއެވެ.
މި މަޖައްލާގައި ކެއުމަށް އެންމެ ރަނގަޅު ކާނާއާއި ކެންސަރާ ދުރުހެލިވެ ރައްކާތެރިވުމަށްޓަކައި ކުރަންޖެހޭ ކަންކަން ސިއްޙީ މާހިރުންގެ އެހީތެރިކަމާއެކު ހިމަނާފައިވާނެކަމަށް ޑައިބެޓީސް ސޮސައިޓީ އޮފް މޯލްޑިވްސް އިން ބުނެއެވެ. އަދި ގައިގައިން އަރާ ބަލިތަކާއި ނަފްސާނީ ބަލިތަކުގެ މަޢުލޫމާތުފަދަ މުހިންމު ގިނަ މައުލޫމާތުތަކެއް ހިމަނާފައިވަނެކަމަށްވެސް ޑައިބެޓީސް ސޮސައިޓީ އޮފް މޯލްޑިވްސް އިން ބުނެއެވެ. އަދި މި މަޖައްލާ ވެގެންދާނީ އެކި ބަލިތަކާމެދު ފަންނީ މާހިރުން ޝާއިއުކޮށްފައިވާ ލިޔުންތަކަށް މަޝްވަރާކުރެވޭނެ ޕްލެޓްފޯމަކަށް ކަމަށްވެސް އެ ޖަމްޢިއްޔާއިން ބުނެއެވެ.
މި ރަސްމިއްޔާތުގައި ވާހަކަފުޅުދައްކަވަމުން ހަޔަރ އެޑިއުކޭޝަން މިނިސްޓަރ ޑރ.އިބްރާހިމް ހަސަން ވަނީ "ދޯދި" މަޖައްލާގައި މުހިންމު މަޢުލޫމާތުތަކެއް ހިމެނޭއިރު މި މަޖައްލާއިން ފަންނީ މާހިރުންނާއި ކިޔަވާ ދަރިވަރުން ގުޅިގެން މަސައްކަތް ކުރުމުގެ ފުރުޞަތު ލިބިގެންދާނެކަން ފާހަގަކުރައްވާފައެވެ.
"ދޯދި " މި މަޖައްލާ ނެރުމަށް ހަމަޖެހިފައިވަނީ އަހަރަކު ދެފަހަރުއެވެ. މި މަޖައްލާގެ ފުރަތަމަ އެޑިޝަން މިއަހަރުގެ ދުނިޔޭގެ ހަކުރު ބަލީގެ ދުވަސްކަމަށްވާ 14 ނޮވެމްބަރުގައި ނެރުމަށް ހަމަޖެހިފައިވާކަމަށް އެ އެސޯސިއޭޝަނުން ބުނެއެވެ.