މާލޭ ރަސްފަންނުގައި މޫދަށް އެރޭ ސަރަޙައްދު އާއްމުންނަށް ހުޅުވާލައިފިއެވެ. މި ސަރަހައްދު ހުޅުވާލަފައިވަނީ މިދިޔަ އާދިއްތަ ދުވަހުގެ ހަވީރުގެ ވަގުތެއްގައި ކަމަށް ސިޓީ ކައުންސިލުން މައުލޫމާތު ދެއްވައެވެ.
ޕީއެސްއެމް ނިއުސްއަށް މައުލޫމާތުދެއްވަމުން ސިޓީ ކައުންސިލްގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ ރަސްފަންނުގައި މޫދަށްއެރޭ ސަރަހައްދު އަލުން ހުޅުވާލާފައިވަނީ އެތަނަކީ މޫދަށް އެރި އުޅުމަށް ރައްކާތެރި ތަނެއްކަށް އެޗްޕީއޭއިން ކަށަވަރު ކޮށްދެއްވާފައިވާތީކަމަށެވެ. އެގޮތުން އެޗްޕީއޭއިން ހެދި ދެ ޓެސްޓުންވެސް ނުރައްކާތެރިކަމެއް ފެނިފައިނުވާކަމަށް ޝަމާއު ވިދާޅުވިއެވެ.
މާލޭ ރަސްފަންނުގައި މޫދަށް އެރޭ ސަރަޙައްދު ބަންދުކޮށްފައިވަނީ އެ ސަރަޙައްދުގައި ނަޖިސް ފެތުރިފައިވާކަމަށް ބެލެވޭތީ މިދިޔަ މަހުގެ 29 ވަނަ ދުވަހުއެވެ.
ރަސްފަންނުގެ މޫދަށް އެރޭ ސަރަހައްދުން ނަޖިސްކަމަށް ބެލެވޭ އެއްޗެހިތަކެއް ފެނިގެން އެޗްޕީއޭއިން ފުރަތަމަ ޓެސްޓް ހެދިއިރުވެސް ނުރައްކާތެރިކަމެއް ނެތްކަމަށް ސިޓީ ކައުންސިލުން ވިދާޅުވެފައިވެއެވެ. ނަމަވެސް އެ ސަރަހައްދަކީ ގިނަ އަދަދެއްގެ ރައްޔިތުން ބޭނުންކުރާ ސަރަހައްދެއްކަމުން އެތަން ހުޅުވާފައިވަނީ އެޗްޕީއޭއިން އިތުރު ޓެސްޓުތަކެއް ހަދައި އެތަނުގެ ރައްކާތެރިކަން ކަށަވަރު ކުރުމަށްފަހުގައި ކަމަށް ސިޓީ ކައުންސިލުން ވިދާޅުވެއެވެ.