ރައްޔިތުންގެ ސަލާމަތާއި ރައްކާތެރިކަން ޔަޤީންކުރުމަކީ ކޮންމެ މީހެއްގެ ޒިންމާއެއް - ނައިބްރައީސް
ޤާނޫނާއި ޤަވާޢިދަށް ބަދަލެއް ގެނެސްފައި ނެތުމަކީ ރައްޔިތުންގެ ސަލާމަތާއި ރައްކާތެރިކަން ޔަޤީންކުރުމަށްޓަކައި އޮތް ހުރަހަކަށް ވެގެންނުވާނެކަމަށް ރައީސުލްޖުމްހޫރިއްޔާގެ ނާއިބް ފައިޞަލް ނަޞީމް ވިދާޅުވެއްޖެއެވެ.
2019އިން 2023އަށް ކަނޑައަޅާފައިވާ ނޭޝަނަލް ރޯޑް ސޭފްޓީ އެކްޝަން ޕްލޭން އިފްތިތާޙްކުރުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ނައިބްރައީސް ވަނީ މަގުމަތީގެ ހިނގައި އެކްސިޑެންޓްތަކުގެ މައްސަލަތަކަކީ މުޅި ރާއްޖެއަށްވެސް މިއަދު ކުރިމަތިވެފައިވާ ނުރައްކަތެރި ޙާދިސާތަކެއްކަން ފާހަގަކުރައްވާފައެވެ.
އަދި މިފަދަ ހާދިސާތައް ހުއްޓުވުމަށްޓަކައި އިތުރު ފިޔަވަޅުތައް އަޅަންޖެހޭކަމަށް ނައިބްރައީސް ވިދާޅުވިއެވެ. ނައިބްރައީސް ވިދާޅުވީ މަގުމަތީގައި ހިނގާ ޙާދިސާތައް ހުއްޓުވުމަށްޓަކައި ޤާނޫނާއި ޤަވާޢިދަށް ބަދަލެއް ގެނެސްފައި ނެތުމަކީ ރައްޔިތުންގެ ސަލާމަތާއި ރައްކާތެރިކަން ޔަޤީންކުރުމަށްޓަކައި އޮތް ހުރަހަކަށް ވެގެން ނުވާނެކަމަށާ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަކީ ކޮންމެ މީހެއްގެ ޒިންމާއެއްކަން ޤަބޫލުކުރަންޖެހޭކަމަށެވެ.
"މާލެ ސަރަހައްދުގައި ގިނަ އެކްސިޑެންތްތަކެއް ހިނގަމުންދިޔަނަމަވެސް ރާއްޖޭގެ އެކި ސަރަހައްދުތަކުގައި ޚާއްސަކޮށް ބޮޑެތި ރަށްތަކުގައި އެކްސިޑެންޓްތައް ހިނގާ މިންވަރުވެސް މަދެއް ނޫން.ރާއްޖޭގެ ރަށްތަކުގެ މަގުތައް ޒަމާނީ ފެންވަރަށް ތަރައްޤީކުރަމުންދާއިރު މިފަ ކަންކަމާމެދު ފުންކޮށް ވިސްނަން ޖެހޭ. މިފަދަ ހާދިސާތައް ހިނަގމުންދަނީ ރައްޔިތުންގެ ފަރުވާކުޑަކަމުން ނުވަތަ އެކަމަށް ދޭބންޖެހޭ ސަމާލުކަން ކުޑަވުމުގެ ސަބަބުން." ނައިބްރައީސް ވިދާޅުވިއެވެ.
ކޮންމެ ދުވަހަކު މަގުމަތީގައި އެކި ޙާދިސާތައް ހިނގައި ރައްޔިތުންނަށް އަނިޔާވަމުންދާއިރު މިކަމަށް ކޮންމެ ރައްޔިތަކު އަދި ޚާއްސަކޮށް ދިވެހި ކޮންމެ ޒުވާނަކު ވިސްނާ ފިކުރުކުރުމަށް ނައިބްރައީސް ވަނޯ ގޮވާލައްވާފައެވެ. އަދި މަގުތައް ބޭނުންކުރަމުންދާއިރު އެކަކު އަނެއްކަކާމެދު ވިސްނާލުމަށްވެސް ނައިބްރައީސް ވަނީ އިލްތިމާސްކޮށްފައެވެ. ނައިބްރައީސް ފައިޞަލް ނަޞީމް ވިދާޅުވީ 2020ވަނަ އަހަރު އަންނަންވާއިރަށް އެކްސިޑެންތަކުގެ 50 އިންސައްތައަށްވުރެވެސް ދަށްކުރުމަށް މަސައްކަތްކުރަންޖެހޭކަމަށެވެ.
"މިކަން ތަންފީޒުކުރުމަށްޓަކައި ހުރިހާ ފަރާތްތައް ގުޅިގެން ހަރިދަނާގޮތަކަށް މަސައްކަތްކުރުމަށް. އެކްސިޑެންޓްތައް މަދުކުރުމަށްޓަކައި މިހާރުވެސް ގިނަ މަސައްކަތްތަކެއް ކުރައްވަމުން ގެންދަވާކަމަށް. ބޮޑެތި ރަށްރަށުގައި ހިނގައި އެކްސިޑެންޓްތައް މަދުކުރުމަށްޓަކައި ޚާއްސަ ކެމްޕެއިނެއް ފެށުމަށް." ނައިބްރައީސް ވިދާޅުވިއެވެ.
މި ރަސްމިއްޔާތުގައި ވަނީ 2019އިން 2023 ކަނޑައަޅާފައިވާ ނޭޝަނަލް ރޯޑް ސޭފްޓީ އެކްޝަން ޕްލޭން އިފްތިތާހްކޮށްފައެވެ. މި އެކްޝަން ޕްލޭން އިފްތިތާޙްކޮށްދެއްވީ ނައިބްރައީސް ފައިޞަލް ނަޞީމެވެ. މިޕްލޭނަކީ މަގުމަތީގައި ހިނގާ ހާދިސާތަކުގެ ސަބަބުން މަރުވާ މީހުންނާއި އަނިޔާވާ މީހުންގެ ޢަދަދު ދެބައިކުޅަ އެއްބަޔަށް މަދުކުރުމާއި މަގުތަކަކީ ރައްކާތެރި އަދި ދުއްވާ އުޅަނދުތަކަކީ ރައްކާތެރި އުޅަނދެއްތޯ ކަށާވަރުކުރުންނެވެ. މީގެ އިތުރުން ކަނޑައަޅާފައިވާ ޤާނޫނުތަކާއި ޤަވާޢިދުތައް ހަރުދަނާކޮށް ތަންފީޒްކުރުމާއި މިހާރު ދެމުންގެންދާ އަވަސްފަރުވާގެ ތެރެއަށް ޓްރޮމޯކެއަރ ތަޢާރަފްކޮށް އެކްސިޑެންތަކަށް ދޭ ފަރުވާތައް ހަރުދަނާކުރުމަކީވެސް މި ޕްލޭންގެ މަޤްޞަދުތަކުގެ ތެރޭގައި ހިމެނޭކަމެކެވެ.