ތަރިކަ ޙިމާޔަތްކޮށް އަންނަންއޮޮތް ޖީލުތަކަށް ވާސިލްކޮށްދިނުމަށް ފަރުދީ ޒިންމާ މުހިންމު- މިނިސްޓަރ ޔުމްނާ

ކާބަފައިން އަޅުގަނޑުމެންނާއި ހަމައަށް ވާސިލުކޮށްދީފައިވާ ތަރިކައިގެ އަގުބޮޑު އަމާނާތް، ކުރިއަށްއޮތް ޖީލުތަކަށް ވާސިލްކޮށްދިނުމުގައި އިޚްލާސްތެރިކަމާއެކު ފަރުދީ ޒިންމާ އަދާކުރުމަށް މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މަޢުމޫން ގޮވާލައްވައިފިއެވެ.

މިނިސްޓަރ މިކަމަށް ގޮވާލެއްވީ ދުނިޔޭގެ ތަރިކައިގެ ދުވަހާއި ގުޅިގެން ދެއްވި ޚިތާބުގައެވެ.

ދުނިޔޭގެ ތަރިކައިގެ ދުވަހާއި ގުޅިގެން މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މަޢުމޫން ދެއްވި ޚިޠާބުގައި، ތަރިކައިގެ މުހިންމުކަމާއި ތަރިކަ ހިމާޔަތްކުރުމަށް ގިނަ މަސައްކަތްތަކެއް ކުރަންޖެހޭކަން ވަނީ ފާހަގަކުރައްވާފައެވެ. މިނިސްޓަރ ވިދާޅުވީ ދިވެހިންގެ އިހުގެ ދިރިއުޅުމާއި އާދަތައް އަޅުގަނޑުމެންނާއި ހަމައަށް ވާސިލުވެފައިވަނީ، ކާބަފައިން ރައްކާތެރިކަމާއިއެކު އެ މަޢުލޫމާތާއި ތަންތަން ރައްކާތެރިކޮށް ބަލަހައްޓާފައިވާތީކަމަށެވެ. އަދި އޭރު ދިވެހިން ކޮށްއުޅުނު މަސައްކަތްތަކާއި، ދިރިއުޅުނު ގޮތްތަކާއި، ކުޅެ އުޅުނު ކުޅިވަރުތަކާއި، މިފަދަ އެންމެހައި ކަންތައްތައް، އޮޅުންފިލާނެހެން މި ޖީލާ ހަމައަށް އައިސްފައިވުމަކީ، ކާބައިން މި އަމާނާތް ރައްކާތެރިގޮތުގައި އަޅުގަނޑުމެންނާއި ހަމައަށް ފޯރުކޮށދީފައިވާ ކަމުގެ ހެއްކެއްކަމަށެެވެ. އެހެންކަމުން ކާބަފައިންގެ މި އަމާނާތް އަންނަ އޮތް ޖީލުތަކަށް ފޯރުކޮށްދިނުމަކީ މި ޖީލުގެ ޒިންމާއެއްކަން މިނިސްޓަރ ވަނީ ފާހަގަކުރައްވާފައެވެ.

މިނިސްޓަރ ވިދާޅުވީ ތަރިކަ ރައްކާތެރި ކުރުމުގައި އެންމެ ބޮޑު ރޯލެއް އަދާކުރެވޭނީ އާންމުންނަށްކަމުން މިކަމަށް އާންމުން ހޭލުންތެރިވާން ޖެހޭ ކަމަށެވެ. އަދި ޒުވާނުން މިކަމަށް ޝައުގުވެރިކުރުމާއި، ތަޢުލީމާއި ތަރުބިއްޔަތުގެތެރޭގައި، ޤައުމިއްޔަތާއި ތަރިކައިގެ މަޢޫލޫމާތު ހިމަނައި، ކުޑަކުދިންވެސް މިކަމަށް ހޭލުތެރިކުރަންޖެހޭކަމަށް މިނިސްޓަރ ވިދާޅުވިއެވެ.

"އަޅުގަނޑުމެންގެ ކާބަފައިން އަޅުގަނޑުމެންނާއި ޙަވާލުކުރައްވާފާ އަގުބޮޑު އަމާނާތް ރައްކައުތެރިކޮށް ދަމަހައްޓައި މިހާރުގެ ޖީލުތަކަށާއި އަންނާން އޮތް ޖީލުތަކަށް ފޯރުކޮށްދިނުމަކީ އަޅުގަނޑުމެން އެންމެންގެ ޒިންމާއެއް. އަޅުގަނޑުމެންގެ އެންމެންގެ ކޮނޑުގައި އެޅިފައިމިވާ ގައުމީ ވާޖިބު އަދި ފަރުދީ ޒިންމާ އަދާކުރުމަށް އަޅުގަނޑު ގޮވާލަން." މިނިސްޓަރ ވިދާޅުވިއެވެ.

ތަރިކައަކީ ދިވެހިންގެ ހަނދާންތަކާއި، ޝުޢޫރުތަކާއި، އަމިއްލަވަންތަކަމާއި އެންމެ ބޮޑަށް ގުޅިފައިވާ ކަންތައްތައްކަން ފާހަގަކުރައްވާ މިނިސްޓަރ ވަނީ ދިވެހިރާއްޖޭގެ އެކި ހިސާބުތަކުން ފެންނަންހުރި އާސާރީ ތަންތަނާއި، ތަކެއްޗާއި ވާރުތަވަމުން އައިސްފައިވާ ދިވެހިންގެ އާދަތަކާއި މަސައްކަތްތެރިކަން ދިވެހިންގެ ތަރިކައިން ފެންނަން ހުރިކަން ފާހަގަކުރައްވާފައެެވެ.

"ބަހުރުވަތައް، ހަދާފައިވާ ބިނާތައް، ގެންގުޅެފައިވާ ތަކެތި، މަސައްކަތްތެރިކަމާއި، ފަންނުވެރިކަމަކީ ރައްކާތެރިކުރަންޖެހޭ ތަރިކަ." މިނިސްޓަރ ވިދާޅުވިއެވެ.

މިނިސްޓަރވަނީ ތަރިކަ ހިމާޔަތް ކުރެއްވިއްޖެނަމަ ފަތުރުވެރިކަމުގެ ސިނާއަތުގެތެރެއިން، އިޤްތިޞާދީ މަންފާ ހޯދޭނެ ގޮތްތައްވެސް ފަހިވެގެންދާނެކަން ފާހަގަކުރައްވާފައެވެ.

ތަރިކަ ޙިމާޔަތްކުރުމުގެ މަސައްކަތުގެ ދަށުން ސަރުކާރުންވަނީ ރާއްޖޭގައި ހުރި ތަރިކައިގެ ލިސްޓެއް އެކުލަވާލުމުގެ މަސައްކަތްވެސް ފަށާފައެވެ. އަދި ކުރީގެ ފޮތްތަކުން ލިބިފައިވާ މަޢޫލުމާތާއި، ކައުންސިލްތަކާއި ގުޅިގެން ހަދާފައިވާ ތަރިކައިގެ ލިސްޓުގައި 400އަށްވުރެ ގިނަ ތަން ހިމަނާފައިވެއެވެ.

މީގެއިތުރުން ތަރިކަ ޙިމާޔަތްކުރުމުގެ މަސައްކަތް ހަރުދަނާކޮށް ކުރިއަށްގެންދިއުމަށް، ޤަނޫނީ ބާރު ހޯދުމަށް މަޖިލީހަށްވަނީ ތަރިކަ ޙިމާޔަތްކުރުމުގެ ބިލެއްވެސް ފޮނުވާފައެވެ. މި ބިލާއިއެކު، ތަރިކަ ދެނެގަންނާނެގޮތާއި، ހިމާޔަތްކުރާނެ ގޮތްތަކާއި، ތަރިކައާއިމެދު އިހުމާލުވާ ފަރާތްތަކަށް ފިޔަވަޅު އަޅާނެ ގޮތްތައްވެސް ކަނޑައެޅިގެންދާނެއެވެ.