ޚާޝޫޤްޖީގެ މަރާ ގުޅިގެން ތުހުމަތުކުރެވޭ ބަޔަކާ ދެކޮޅަށް ދަތިކުރުމުގެ ފިޔަވަޅުތައް އަޅާފައިވާނެ: ޕޮމްޕެއޯ
އިސްތަންބޫލްގައި ހުންނަ ސައޫދީ ކޮންސިއުލޭޓް ތެރޭގައި އަނިޔާވެރިގޮތަކަށް މަރާލި ސައޫދީ ނޫސްވެރިޔާ ޖަމާލް ޚާޝުގްޖީގެ މަރާ ގުޅުންހުރި ކަމަށް ތުހުމަތު ކުރެވޭ ސައޫދީ ސަތާރަ މީހަކާ ދެކޮޅަށް އެމެރިކާއިން ދަތިކުރުމުގެ ފިޔަވަޅުތައް އަޅާފައިވާނެ ކަމަށް އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވެއްޖެއެވެ.
ކޮންގްރެސްގެ ޚާރިޖީ ކަންތައްތަކާބެހޭ ސަބް ކޮމިޓީއަށް ހާޒިރުކޮށް، އެ ކޮމީޓީން ކުރި ސުވާލެއްގެ ޖަވާބުގައި ޕޮމްޕެއޯ ވިދާޅުވީ ޚާޝުގްޖީ މަރާލި ޖަރީމާއަކީ ގަބޫލުކުރެވޭނެ ކަމެއްނޫންކަމާއި އެ ޖަރީމާގެ ގާތިލުން ހޯދައި އެމީހުންނަށް ހައްގު އަދަބު ދިނުމަށް އެމެރިކާ ގެންދަނީ ސައޫދީ އަށް ބާރުއަޅަމުންކަމަށެވެ.
އެ މައްސަލާގައި ރައީސް ޑޮނަލްޑް ޓްރަމްޕް، ސައޫދީ އަށް ދޫ ނުދެއްވާކަމަށްވެސް ޕޮމްޕެއޯ ވިދާޅުވިއެވެ. ޖަމާލް ޚާޝުގްޖީގެ މަރަށް އިންކާރުކުރުމަށްފަހު ދުނިޔޭގެ ފިއްތުންތައް ބޮޑުވެގެން ސައޫދީ ސަރުކާރުންވަނީ އިސްތަންބޫލްގައި ހުންނަ ސައޫދީ ކޮންސިއުލޭޓް ތެރޭގައި އެޖަރީމާ ހިންގިކަމާއި އެކަމުގައި ޝާމިލްވަނީ ސައޫދީ މަސްއޫލުވެރިންކަމަށްވެސް އެއްބަސްވެފައެވެ.
މިއާއެކު ސައޫދީ ސަރުކާރުންވަނީ އެޖަރީމާ ތަހްގީގްކޮށް އެގާރަ މީހެއްގެ މައްޗަށް ސައޫދީ ކޯޓުތަކުގައި ދައުވާ އުފުލާފައެވެ. އެހެންނަމަވެސް ޚާޝުގްޖީ މަރާލި ޖަރީމާގެ ފަހަތުގައިވަނީ ސައޫދީ ވަލީއުލްއަހްދު މުހައްމަދު ބިން ސަލްމާން ކަމަށް ކުރެވޭ ތުހުމަތު ތަކަށް ސައޫދީ ސަރުކާރުން ގެންދަނީ އިންކާރުކުރަމުންނެވެ.