ޔަމަނުގައި ކިޔަވަމުންދާ ދިވެހި ދަރިވަރުން ރާއްޖެ ގެނައުމުގެ އިންތިޒާމުތައް ހަމަޖެއްސުމުގެ މަސައްކަތް ކުރަމުންދާ ކަމަށް ދިވެހި ޚާރިޖިއްޔާއިން ހާމަކުރައްވައިފިއެވެ.ދިވެހި ޚާރިޖިއްޔާއިން ކުރި ޓްވީޓެއްގައި ބުނެފައިވަނީ، ޔަމަނުގައި ތިބި ދިވެހި ދަރިވަރުންނާއި، މުއާމަލާތު ކުރެވިފައިވާކަމަށާއި އެކުދިންގެ ހާލު ވަރަށް ގާތުން ބަލަމުންދާ ކަމަށެވެ. އަދި މިކަމާ ގުޅިގެން އެއްވެސް މައުލޫމާތެއް ފޯރުކޮށްދޭން ބޭނުންވާ ނަމަ ކޮންސިއުލާ ހޮޓްލައިން 7983400 އަށް ގުޅުމަށް ވެސް ޚާރިޖީ ވުޒާރާއިން އެދިވަޑައިގަންނަވައެވެ.ޔަމަނުގައި މިހާރު ހިނގަމުންދާ ދާޚިލީ ހަނގުރާމާގައި ހޫތީ ހަގުރާމަވެރިންނާއި ސަރުކާރަށް ތާއީދުކުރާ ހަގުރާމަވެރިންނާއި ދެމެދު ވަރުގަދަ ހަމަލާތަކެއް ބަދަލުކުރެވެމުންދާ މިދަނޑިވަޅުގައި އެޤައުމުގައި ތިބި އ.ދ.ގެ ސަތޭކަ މުވައްޒަފުންނާއި އެހެނިހެން ޤައުމުތަކުން ޔަމަނުގައި ބައިތިއްބާފައި ތިބި އަށްޑިހައަށްވުރެ ގިނަ ޑިޕްލޮމޭޓުން ވަނީ އެޤައުމުން ބާލާފައެވެ.މީގެ އިތުރުން އެޤައުމުގައި ތިބި އެކި ޤައުމުތަކުގެ ރައްޔިތުން އަނބުރާ އެމީހުންގެ ޤައުމުތަކަށް ގެނައުމުގެ މަސައްކަތް ގިނަ ޤައުމުތަކަކުން ވަނީ ފަށާފައެވެ. އޭގެ ތެރޭގައި އިންޑިޔާ، ސްރީލަންކާ، ޕާކިސްތާނު، ޗައިނާ، ފްރާންސް، ތައިލޭންޑް އަދި އިންޑޮނޭޝިޔާ ހިމެނެއެވެ.