މާލޭގައި 24 ގަޑިއިރު ވިޔަފާރިކުރުމަށް ހުޅުވާލި ފުރުސަތުގައި މިހާތަނަށް 5 ފަރާތަކަށް ހުއްދަ ދީފައިވާކަމަށް އިކޮނޮމިކް މިނިސްޓްރީން ހާމަކޮށްފިއެވެ.
އިކޮނޮމިކް މިނިސްޓްރީން 24 ގަޑިއިރު ވިޔަފާރިކުރުމަށް ހުއްދަ ދޫކޮށްފައިވަނީ 4 ރެސްޓޯރަންޓަކަށާއި އެއް ފިހާރައަކަށެވެ. ހުއްދަ ދިން ރެސްޓޯރަންޓްތަކަކީ، ދަ ސީހައުސް، ސަފްރޮން ކެފޭ، ނައިސް އެން ސްޕައިސްގެ އިތުރުން ވީވާ ކެފޭއަށެވެ. 24 ގަޑިއިރު ވިޔަފާރިކުރުމުގެ ހުއްދަ ދިން ފިހާރައަކީ ވިލިމާލޭ ފެރީ ޓާމިނަލުގައި ހުންނަ އެކްސްޕްރެސް މާޓަށެވެ.
އިކޮނޮމިކް މިނިސްޓްރީން މިދިޔަ އާދިއްތަ ދުވަހު ބުނެފައިވަނީ، މާލޭގައި 24 ގަޑިއިރު ވިޔަފާރިކުރުމަށް 8 ފަރާތަކުން ޝައުޤުވެރިކަން ފާޅުކޮށްފައިވާކަމަށެވެ. މިގޮތުން 4 ފަރާތެއްގެ އިންސްޕެކްޝަން ނިމި އެފަރާތްތަކަށް ހުއްދަ ދިނުމަށް ތައްޔާރުވަމުންދާކަމަށް އޭރު ވަނީ ބުނެފައެވެ.
24 ގަޑިއިރު ވިޔަފާރިކުރުމުގެ ހުއްދަ ދޭ ތަންތަނުގައި ހުންނަންޖެހޭ ޝަރުތުތަކުގެ ތެރޭގައި އެތެރެ ސާފުކޮށް ފެންނަ ގޮތަށް ހުރުމާއި، 24 ގަޑިއިރު އޮޕަރޭޓްކުރާ ކެމެރާ ހަރުކޮށްފައި ހުރުމާއި، ދުންފަތުގެ އިސްތިއުމާލު ކުރުން މަނާ ތަނަކަށްވުން ހިމެނެއެވެ.
މާލޭގައި 24 ގަޑިއިރު ވިޔަފާރިކުރުމަށް ހުއްދަ ދޭ ސަރަހައްދުތަކުގެ ތެރޭގައި ބޮޑުތަކުރުފާނު މަގު، ކަނބާއައިސާރަނި ހިނގުން، ފަރީދީމަގު، ސޯސަންމަގު، މެދުޒިޔާރަތްމަގު، ޖަނަވަރީމަގު، މަޖީދީމަގުގެ އިތުރުން ބުރުޒުމަގު، އޯކިޑުމަގު، އަމީނީމަގު އަދި ލޮނުޒިޔާރަތްމަގު ހިމެނެއެވެ. އިކޮނޮމިކް މިނިސްޓްރީން ބުނީ ހުއްދައަށްއެދޭ ހުރިހާ ފަރާތްތަކަށްވެސް ޝަރުތު ހަމަވާނަމަ ހުއްދަދޭނެކަމަށެވެ.