އިޖްތިމާއީ، އިގްތިޞާދީ ކަންކަން ކުރިއެރުވުމާ ގުޅޭގޮތުން ޒުވާނުންގެ ޚިޔަލާއި މަޝްވަރާ ހޯދުމަށް، "ވުމަން އެންޑް ޑިމޮކްރަސީ"އިން ޚާއްސަ ޕްރޮގްރާމެއް އިފްތިތާޙްކޮށްފިއެވެ.
"ޔޫތް ޓްރާންސްފޯމިންގ ޓުމޯރޯ"ގެ ނަމުގައި ކުރިއަށް ގެންދާ މި ޕްރޮގްރާމްގައި މުޖުތަމަޢުގައި ކުރިއެރުން ބޭނުންވާ ރޮނގުތަކަށް ޒުވާނުން ގެންނަން ބޭނުންވާ ބަދަލުތަކާއި ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށްވަނީ ހަމަޖެހިފައެވެ.
ވުމަން އެންޑް ޑިމޮކްރަސީގެފަރާތުން ވިދާޅުވީ މިފަދަ ޕްރޮގްރާމެއް ބާއްވަން ނިންމީ ޒުވާނުންނަކީ ޤައުމުގެ ކުރިމަގުކަމުގައިވާއިރު، ކުރިމަގަށްޓަކައި ޤައުމުގެ ހިންގުމަށް ގެންނަ ބަދަލުތަކަކީ، ކޮންމެހެން ޒުވާނުންގެ ޚިޔާލާއި މަޝްވަރާ ހިމެނޭހެން ގެންނަން ޖެހޭ ބަދަލަކަށް ވާތީކަމަށެވެ.
ހަތަރު ދުވަހަށް ބަހާލައިގެން ކުރިއަށްގެންދާ މިސެޝަންތަކުގައި، ޖުމްލަކޮށް ހުރިހާ ދާއިރާތަކެއް ހިމަނާފައިވާކަމަށް އެފަރާތުން ވިދާޅުވެއެވެ. އަދި މި ޕްރޮގްރާމްގެތެރެއިން، ޢާއްމުކޮށް ޖުމުތަމަޢުގައި ވާހަކަ ނުދެވޭ ގިނަ ދާއިރާތަކަކަށް ޒުވާނުންގެ ޚިޔާލާއި މަޝްވަރާ ހޯދުމަށް ހަމަޖެހިފައިވާކަމަށްވެސް އެފަރާތުން ވިދާޅުވިއެވެ.
މިސެޝަންތައް ކުރިއަށްގެންދާނީ ޒުވާނުންނާއި، އެކި ދާއިރާކުގެ ފަންނީ ބޭފުޅުންނާއި ސަރުކާރުގެ ކަމާގުޅޭ އިދާރާތައްވެސް ހިމެނޭގޮތަށެވެ. ވުމަންއިން އިން ޑިމޮކްރަސީއާއި އެމެރިކަން ސެންޓަރ މޯލްޑިވްސް އާއި މޯލްޑިވްސް ނޭޝަނަލް ޔުނިވްރަސިޓީ ގުޅިގެން ކުރިއަށްގެންދާ މި ސެޝަންތައް އޮންނާނީ މިމަހުގެ 10ވަނަ ދުވަހުން 14ވަނަދުވަހުގެ ނިޔަލަށެވެ. މި ޕްރޮގްރާމްގައި ބައިވެރިވުމުގެ ފުރުސަތު އުމުރުން 16އަހަރާއި 25 އަހަރާއި ދެމެދުގެ ޒުވާނުންނަށްވަނީ ހުޅުވާލާފައެވެ.