އަންހެނުން ބާރުވެރިކުރުމަށް ކުރާ މަސައްކަތްތަކަށް މިނިސްޓްރީން އަބަދުވެސް ތަރުހީބުދޭނެ- ޖެންޑަރ މިނިސްޓަރ

އަންހެނުން ބާރުވެރިކުރުވުމަށް އަމިއްލަ ޖަމްޢިއްޔާތަކުން ކުރާ މަސައްކަތްތަކަކީ، ޖެންޑަރ މިނިސްޓްރީއާއި، ސަރުކާރުން އެކަންކަމަށް ވަރަށް ބޮޑަށް ތަރުޙީބުދޭ ކަމެއްކަމަށް، ޖެންޑަރ މިނިސްޓަރ ޝިދާތާ ޝަރީފް ވިދާޅުވެއްޖެއެވެ.

މިނިސްޓަރ މިހެން ވިދާޅުވީ، އަންހެނުންގެ ދުވަހާއި ގުޅުވައިގެން ވިމެން އިން މެނޭޖަމަންޓް, ވިމް އިން ބޭއްވި ދުވުމުގައި ބައިވެރިވެ ވަޑައިގެން ވާހަކަފުޅުދައްކަވަމުންނެވެ.

ވިމެން އިން މެނޭޖްމަންޓް, ވިމްގެ އިން އަންހެނުންގެ ދުވަހާ ގުޅުވައިގެން ބޭއްވި ދުވުން ޚާއްޞަކޮށްފައިވަނީ ހަމައެކަނި އަންނެހުންނަށެވެ. މިދުވުމުގައި މިނިސްޓަރ އޮފް ޖެންޑަރ އެންޑް ފެމިލީ ޝިދާތާ ޝަރީފާއި، މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވަނީ ބަައިވެރިވެ ވަޑައިގެންފައެވެ.

މި ދުވުމާ ގުޅޭގޮތުން ވާހަކަފުޅު ދައްކަވަމުން ޖެންޑަރ މިނިސްޓަރ ޝިދާތާ ޝަރީފް ވިދާޅުވީ މިފަދަ ދުވުންތަކަކީ އަންހެނުންނަށް ދިމާވާ އެކި ކަހަލަ މައްސަލަތައް މުޖުތަމަޢުގެ ސަމާލުކަމަށް ގެނައުމަށް ކުރެވޭ މުހިންމު މަސައްކަތެއް ކަމަށެވެ. އަދި އެކި އުމުރުފުރާގެ އަންހެނުން އެއްތަނަކުން ބައްދަލުވެ، މިފަދަ މާޙައުލެއް ޤާއިމުވުމަކީ އަންހެނުންގެ މެދުގައި އޮންނަންވާ ގުޅުން ބަދަހިވެގެންދާ ކަމެއްގެ ގޮތުގައި މިނިސްޓަރ ފާހަގަކުރެއްވިއެވެ.

ވިމް އިން މިއަދު ބޭއްވި ދުވުގެ ޝިއާރުގެ ގޮތުގައި ކަނޑައަޅާފައިވާ "ބެލެންސް ފޯރ ބެޓަރ" އަށް އަލިއަޅުއްވާލައި މިނިސްޓަރ ވިދާޅުވީ، މިއަދުގެ ދުވުމުގެތެރެއިން ކުރިއަށްގެންދިޔަ އިތުރު ޙަރަކާތްތަކުންވެސް، ދިރިއުޅުމުގެ ހަމަހަމަކަމާއި، މުޖުތަމަޢުގައި އަންހެނުންނާއި ފިރިހެނުންގެ ތަފާތުކަން ނައްތާލުމުގެ މުހިންމުކަމަށް ބާރުއެޅިގެންދިޔަކަމަށެވެ.

"މިތަނުން ބައްދަލުވެއްޖެ ތުއްތުކުދިން، ޒުވާނުން، މެދުއުރުމީހުންނާއި، ދުވަސްވީމީހުން. އެންމެންގެ ގުޅުން ބަދަހިވެ ހޭލުންތެރިކުރުމަށް މަސައްކަތް ކުރި. އަންހެނުން ބާރުވެރިކުރަން ކުރަން އަމިއްލަ ޖަމިއްޔާތަކުން ކުރާ މަސައްކަތްތަކަށް ސަރުކާރުން ވަރަށް ތަރުޚީބުދެން، އަދި ސަރުކާރުގެ ފުރިހަމަ އެއްބާރުލުން ދޭނަން." މިނިސްޓަރ ވިދާޅުވިއެވެ.

މި ދުވުމާ ގުޅޭގޮތުން ވާހަކަދައްކަވަމުން ވިމްގެ ރައީސް މިންހާ ފާއިޒް ރަޝާދް ވިދާޅުވީ، ވިމްއިން އަބަދުވެސް މަސައްކަތްކުރަނީ އަންހެނުންނަކީ މުޖުތަމަޢުއަށް މުހިންމު ބައެއްކަން ހާމަކޮށްދިނުމަށްކަމަށެވެ. މި ދުވުމުގައި އެކި އޮފީސްތަކާއި ޖަމްޢިއްޔާތަކާއި ސްކޫލު ކުދިން ހިމެނޭހެން ހުރިހާ އުމުރުފުރައެއްގެ އަންހެނުން ބައިވެރިވެފައިވާއިރު، މީގެތެރޭގައި 2 މަހުގެ ކުއްޖަކުވެސް ހިމެނެއެވެ.

"ހަޤީގަތުގައި އަންހެނުންނަށް ދިމާވާ މައްސަލަތަކުން އަރައިގަތުމަށް މަސައްކަތްކުރުމަށް ވިމްއިން މި ބާރުއަޅަނީ. އަބަދު އެއްކަމެއްގައި އުޅުމުގެ ބަދަލުގައި ދިރިއުޅުމުގެ ކަންކަން ބެލެންސްކޮށް ގެންދިއުމަށް." މިންހާ ވިދާޅުވިއެވެ.

މި ދުވުމުގައި އެކި އުމުރުފުރާތަކުން ޖުމްލަ 5000ހާހާއި ގާތްކުރާ އަދަކަށް މީހުން ބައިވެރިވެފައިވާކަމަށް ވިމް އިން މަޢުލޫމާތުދެއެވެ. މިދުވުމުގެ ބައިވެރިން 3.8 ކިލޯމީޓަރަށް ދުވެފައިވެއެވެ.

އަންހެނުންގެ ދުވަސް ފާހަގަކުރުމަށް ވިމް އިން މިދިޔަ އަހަރުވެސް ދުވުމެއް ބާއްވާފައިވެއެވެ.