ސަރުކާރު ކޯލިޝަންގެ ޕާލިމަންޓްރީ ގްރޫޕްގެ ލީޑާރޝިޕު ނުފެންނަކަމަށާއި، ސަރުކާރުގެ މެންބަރުންގެ ބަދަހިކަން މަޖިލީހުގެ ތެރެއިން ފެނިގެން ނުދާކަމަށް ވިދާޅުވެ މަޖިލީހުގެ ނާއިބު ރައީސް އަދި ހުޅުހެންވެއިރު ދާއިރާގެ މެންބަރު މޫސާ މަނިކު ކޯލިޝަން މެންބަރުންނަށް ވަރަށް ބޯޑަށް ފާޑުވިދާޅުވެއްޖެއެވެ.
މޫސާ މަނިކު މިހެން ވިދާޅުވެފައިމިވަނީ، ރިޔާސީ ކޮމިޝަންތަކަށް ޤާނޫނީ ބާރުދޭބިލް ފާސްވާވަރަށް މަޖިލީހުގެ ތަޅުމުގައި ކޯރަމް ހަމަނުވެ ވިލް ފާސްނުކުރެވިފައިވާ ދަނޑިވަޅެއްގައެވެ.
ރައީސުލްޖުމްހޫރިއްޔާ އިބްރާހީމް މުޙައްމދު ޞާލިޙް އުފައްދަވާފައިވާ ރިޔާސީ ކޮމިޝަންތަކުގެ ބިލް ފާސްކުރުމަށް ބޭނުންވާ ޤާނޫނީ ޢަދަދަށް ވޯޓަށްއެހި ވަގުތު މަޖިލީހުގެ ތަޅުމުގައި މެންބަރުން ނެތުމުގެސަބަބުން ވޯޓަށް އެހޭގޮތްވަނީ ނުވެފައެވެ. އެބިލް ފާސްވުމަށްޓަކައި 43 މެންބަރުން މަޖިލީހުގެ ތަޅުމުގައި ތިބެން ޖެހޭއިރު އެ ޢަދަދާ ކައިރި މިންވަރަކަށްވެސް މެންބަރުން ހަމަވެފައެއްނުވެއެވެ.
އެކަމަށް ފާޑުވިދާޅުވަމުން މޫސާ މަނިކު ވިދާޅުވީ، އެމްޑީޕީގެ ދެ ލީޑާޝިޕުގެ ސަބަބުން އެމްޑީޕީ "ފުނޑުފުނޑު"ވެގެން ދާތަން މަޖިލީހުގެ ފެނިގެންދާކަމަށެވެ. ރައްޔިތުންގެ ތެރޭގައިވާ ފަސާދައާއި މީހުން މެރުން ހުއްޓުވުމަށާއި ކޮރަޕްޝަނަށް ޒީރޯ ޓޮލަރެންސްކަމަށް ވިދާޅުވެ ރައީސް ޞާލިޙް ހުށައެޅުއްވި ބިލް ފާސްކޮށްދެއްވުމަށް އެމަނިކުފާނު އެދިވަޑައިގެންނެވިތާ ފަންސާސް ދުވަސްވެފައިވާކަމަށާ، ނަމަވެސް އެއްވެސް ނަތީޖާއެއް ނިކުމެފައިނުވާކަމަށް އޭނާ ވިދާޅުވިއެވެ. އެހެންކަމުން ވަކިބަޔަކު ބޭނުންކަމެއް މަޖިލީހުގައި ކުރާތަން އަދިވެސް ފެނިގެންދާކަމަށް މޫސާ މަނިކު ވިދާޅުވިއެވެ.
"ވަކި ބަޔަކު ބޭނުންވީމަ މިތަނުގައި ކަންތައްތއް ކުރެވެމުންދާއިރު އަޅުގަނޑުދަންނަވާނީ ޖަލުގައި ބާންދާފައި އިނަސް އަދިވެސް ގަދައީ ރައީސް ޔާމީނޭ. ހަމަ ގަދައިއްޔޭ. ބޭނުންގޮތެއް މިތާ އެތެރޭގައި ހަދާލަންކެރޭނީ ގަދަވީމަ ނޫންތޯ" ރައީސް ޔާމީނަށް ތާޢީދުކުރައްވަމުން މޫސާ މަނިކު ވިދާޅުވި.
އެމްޑީޕީގެ ބަދަހިކަން މަޖިލީހުން ނުފެންނަކަން ފާހަގަކުރައްވައި މޫސާމަނިކުވަނީ އަންނަ މަޖިލިސް އިންތިޚާބުގައި އެމްޑީޕީއަށް މަޖިލީހުގެ އަޣުލަބިއްޔަތު ނުލިބޭނެކަމަށްވިދާޅުވެ ވަރަށް ބޮޑަށް ފާޑުވިދާޅުވެފައެވެ.
"3ދުވަސް ވިއރުވެސް ވޯޓު ހަމަވާވަރަށް މީހުން ހަމަނުކުރެވުނުކަމަކަށްނުވި ރައީސްގެ މުހިންމު ވަޢުދެއް ފުއްދުމަށް. ކޯރަމް ހަމަނުކުރެވިގެން. ބަދަހި ކޯލިޝަނާއި ޕީޖީ ގްރޫޕްގެ ލީޑަރޝިޕްވެސް ފެނިގެން ނުދޭ އިންގޭތޯ. އަޅުގަނޑު އަބަދުވެސް ދަންނަވަން ކޯލިޝަން ނުހިނގާނެ، ތަރައްޤީވެސް ނުކުރެވޭނެ އަދި ޤާނޫނުވެސް ނުހިނގާނެ". މޫސާ މަނިކު ވިދާޅުވި.
ސަރުކާރުގެ ކޯލިޝަންގެ ޕާލިމަންޓްރީ ގްރޫޕަށް މޫސާމަނިކު ފާޑުވިދާޅުވެފައިވާއިރު، ޢަދާލަތު ޕާޓީއަށް ނިސްބަތްވެވަޑައިގަންނަވާ މަކުނުދޫ ދާއިރާގެ މެންބަރު އަނާރާ ނައީމްވެސްވަނީ ކޯލިޝަންގެ ނިންމުންތަކަށާއި، މަސައްކަތްތަކަށް ކޯލިޝަންގައި ހިމެނޭ ޕާޓީތަކުން އިސްކަންދޭތަން ނުފެންނަކަމަށް ވިދާޅުވެފައެވެ.